Mukanda wa Kumpala wa Kulondolola 20:1-8
20 Ku ntuadijilu kua tshidimu,* dîba divua bakalenge baya ku mvita, Yoaba+ wakalombola bantu ku mvita, kubutulaye buloba bua bena Amona; wakalua, kutshintshimikaye Laba+ pavua Davidi yeye mushale mu Yelushalema.+ Yoaba wakaluisha Laba, kumubumbulaye.+
2 Pashishe Davidi wakangata tshifulu tshia bukalenge tshivua ku mutu kua Malakama, kusanganaye ne: tshivua ne bujitu bua ntalanta* mujima wa or, ne tshivua ne mabue a mushinga mukole; bakatshiasa Davidi ku mutu. Wakangata kabidi bintu bia bungi bivuabu banyenge mu tshimenga.+
3 Wakapatula bantu bavuamu, yeye kubateka ku mudimu+ wa dipanda mabue ne nsele* ne wa dienza mudimu ne biamu bitue ne tusuyi. Ke tshivua Davidi wenzela bimenga bionso bia bena Amona. Ndekelu wa bionso, Davidi ne bisumbu bionso bia basalayi bakapingana ku Yelushalema.
4 Panyima pa bualu ebu, mvita yakakutuka ku Gezê ne bena Peleshete. Dîba adi Sibekai+ muena Husha wakashipa Sipai uvua wa mu ndelanganyi ya bena Lefa,+ ne bakabakokesha.
5 Kuakenzeka kabidi mvita ne bena Peleshete, ne Elehanana muana wa Yaî wakashipa Lami muanabu ne Goleyata+ muena Gata uvua ne difuma divua ne tshikuatshidi tshienze bu mutshi wa ku tshiamu tshia muluki wa bilamba.+
6 Mvita yakakutuka kabidi ku Gata+ kuvua muntu mukuabu munene mule wa mfiondo,+ muikale ne minu isambombo ku tshianza tshionso ne bana ba nkasa basambombo ku dikasa dionso, minu yonso mikale 24; yeye pende uvua wa mu ndelanganyi ya bena Lefa.+
7 Uvua anu ubunda Isalele.+ Nunku Yonatana muana wa Shimeya,+ muanabu ne Davidi, wakamushipa.
8 Eyi ivua ndelanganyi ya bena Lefa+ mu Gata,+ ne yakakuluka ku tshianza tshia Davidi ne ku tshianza tshia bena mudimu bende.
Note
^ Mmumue ne: mu muvu wa luya. Anyi “printemps.”
^ Kilo mitue ku 34,2. Tang. Tshis. B14.
^ Anyi “si.”