Mukanda muibidi wa Yone 1:1-13
1 Meme, muntu mukulumpe,* kudi mukaji musungula ne kudi bana bende bandi munange bushuwa, ne ki nganu meme nkayanyi, kadi kabidi bonso badi bafike ku dimanya bulelela,
2 bua bulelela budi munda muetu ne buikala netu kashidi.
3 Ngasa, luse ne ditalala bia kudi Nzambi Tatu ne kudi Yezu Kristo, Muana wa Tatu, nebikale netu, pamue ne bulelela ne dinanga.
4 Ndi nsanka bikole menemene bualu ndi mupete bamue ba mu bana bebe benda mu bulelela,+ anu bu mutuvua bapete mukenji kudi Tatu.
5 Nunku mpindieu ndi nkulomba, wewe mukaji, bua tunangangane. (Tshiena nkufundila mukenji mupiamupia, kadi eu utuvua nawu katshia ku tshibangidilu.)+
6 Mona tshidi dinanga diumvuija: bua tutungunuke ne kuenda bilondeshile mikenji yende.+ Eu ke mukenji, anu bu munudi bumvue katshia ku tshibangidilu: bua nutungunuke ne kuendelamu.
7 Bualu bena mashimi ba bungi mbapatuke pa buloba,+ bantu badi kabayi bitaba mudi Yezu Kristo mulue mu mubidi.+ Eu ke muena dishima ne muluishi wa Kristo.+
8 Nudimuke buenu nuenu bine, bua kanujimiji bintu bitudi benzele mudimu bua kupeta, kadi bua nupete difutu dionso dikumbane.+
9 Muntu yonso udi uya kumpala kayi ushala mu dilongesha dia Kristo kena ne Nzambi to.+ Muntu udi ushala mu dilongesha edi, yeye ke udi ne Tatu ne Muana.+
10 Muntu yeye mulue kunudi kayi ulua ne dilongesha edi, kanumuakididi mu nzubu yenu+ ne kanumuedi muoyo to.
11 Bualu muntu udi umuela muoyo mmuabanyanganyi nende wa midimu yende mibi.
12 Nansha mundi ne malu a bungi a kunufundila, tshiena musue kuenza nunku ne dibeji ne mâyi a mukanda to, kadi ndi mutekemene bua kulua kunudi, bua kuakula nenu mpala ne mpala, bua disanka dienu dikumbane dionso.
13 Bana ba muanenu wa bakaji, udi muntu musungula, badi bakutumina muoyo.
Note
^ Anyi “mukulu.”
