Dutelonome 32:1-52
32 “Wewe diulu, teya matshi, meme nengakule,Buloba buteleje mêyi a mukana muanyi.
2 Malu andi ndongesha nealoke bu mvula,Mêyi anyi neapueke bu lumuma,Bu mvula ya yebayeba pa bisonsaNe bu mvula ya mudimbi pa bikunyibua.
3 Bualu nemmanyishe dîna dia Yehowa.+
Nuakule bua bunene bua Nzambi wetu!+
4 Yeye udi Dibue, mudimu wende wonso mmupuangane,+Bualu njila yende yonso mmiakane.+
Nzambi wa lulamatu+ utu kayi wenza bibi;+Yeye udi muakane ne mululame.+
5 Bobu ke badi benze malu mabi.+
Ki mbana bende to, badi ne dinyanguka munda muabu.+
Mbantu ba tshipungu tshikonyangale ne tshibi!+
6 Eu ke mushindu unudi ne bua kuenzela Yehowa malu+Nuenu bantu batshimbakane, badi kabayi ne meji anyi?+
Yeye kena Tatuebe uvua muenze bua wikalaku,+Uvua mukuenze ne mukujadike bikole anyi?
7 Uvuluke matuku a kale;Nuele meji bua bidimu bia bipungu bikadi bipite.
Ebeja tatuebe, yeye neakuambile;+Bakulu bebe, bobu nebakumanyishe.
8 Pavua Mutambe Bunene mupeshe bisamba bumpianyi buabi,+Pavuaye mutapulule bana ba Adama,*+Wakajadika mikalu ya bisamba+Bilondeshile bungi bua bana ba Isalele.+
9 Bualu tshisamba tshia Yehowa ntshiende tshitupa;+Yakoba mbumpianyi buende.+
10 Yeye wakamusangana mu buloba butupu+Ne mu tshipela tshia munda mutupu, mudi mikunda yumvuika.+
Wakamunyunguluka bua kumulama, yeye kumutabalela,+Ne wakamukuba bu kamonyi ka dîsu diende.+
11 Anu bu mudi nyunyi wa mukanku unyukula disua diende,Upapala pa mutu pa tuana tuende,Ubalula mapuapua ende, utuangata,Utuambula pa mapuapua ende,+
12 Yehowa nkayende uvua wenda umulombola;*+Kavua ne nzambi wa ku babende nansha umue to.+
13 Yeye wakamuendesha pa miaba mitumbuke ya pa buloba,+Bua adie bintu bia pa madimi.+
Wakamudiisha ne buitshi bua ku mukuna wa dibueNe mafuta a mu dibue dikole,
14 Manteka a ngombe ne mabele a mikoko,Pamue ne mikoko mitambe buimpe,*Ne bimpanga bia mikoko bia mu Bashana, ne mbuji ya mpumbu,Pamue ne ntete ya blé ya mimpe menemene;*+Wewe kunua mvinyo wa mashi* a tumuma tua mvinyo.
15 Pakadiunda Yeshuluna,* wakatua museba ne buntomboji.
Udi mudiunde, udi mulue ne bujitu, udi muase difu.+
Nunku yeye wakalekela Nzambi uvua mumuenze,+Kupepejaye Dibue dia lupandu luende.
16 Bakamujula tshiji ne nzambi ya ku babende;+Bavua bamufiikisha munda ne malu mabi.+
17 Bavua balambula milambu kudi bademon, ki nkudi Nzambi to,+Kudi nzambi ivuabu kabayi bamanye,Ya mipiamipia ivua mipatuke matuku mashale aa,Kudi nzambi ivua bankambua benu kabayi bamanye.
18 Wewe wakapua Dibue+ divua dikulele muoyo,Ne kuakavuluka Nzambi uvua mukulele.+
19 Pakamona Yehowa bualu abu, wakababenga+Bualu bana bende ba balume ne bana bende ba bakaji bavua bamufiikishe munda.
20 Ke yeye kuamba ne: ‘Nembasokoke mpala wanyi;+Nemmone tshiabafikila.
Bualu mbena mu tshipungu tshibi,+Bana badi kabayi ne lulamatu.+
21 Mbanjule tshiji* ne tshintu tshidi katshiyi nzambi;+Mbamfiikishe munda ne mpingu yabu ya tshianana.+
Nunku nembajule mukawu ne tshidi katshiyi tshisamba;+Nembafiikishe munda ne tshisamba tshipote.+
22 Bualu tshiji tshianyi ntshitemeshe kapia+Kikala ne bua kutema too ne mu ndondo ya Lukita,*+Ne nekuoshe buloba ne bintu bidi bitolokapuNe nekakuate bishimikidi bia mikuna.
23 Nemvudije makenga abu;Nembajikijile mikete yanyi.
24 Nebaletele bua nzala+Ne dibanda dia mubidi kapia bikole ne dibutuka dibi nebibadie.+
Nembatumine mênu a nyama+Ne lulengu lua nyoka ya mu lusenga.
25 Pambelu, muele wa mvita neubashiye mu madilu;+Munda, mudi buôwa bukole+Bua nsongalume ne nsongakaji utshidi kamama,Muana ne muntu wa nsuki mitoke.+
26 Mvua mua kuikala muambe ne: “Nembatangalaje;Nengenze bua tshivulukilu tshiabu tshijimine munkatshi mua bantu,”
27 Bu kabuyi bua buôwa bukole bumvua nabu bua tshienza muena lukuna,+Bualu baluishi badi mua kukudimuna bualu abu bibi.+
Badi mua kuamba ne: “Bukole buetu mbutshimune;+Yehowa ki nguvua muenze bionso ebi to.”
28 Bualu bobu badi tshisamba tshidi katshiyi ne meji,*Ne kakuena lungenyi munkatshi muabu to.+
29 Bu bobu nansha bikale ne meji!+ Bavua mua kuelangana meji bua bualu ebu.+
Bavua mua kuela meji bua tshiabafikila.+
30 Mmunyi muvua muntu umue mua kulondakaja bantu tshinunu,Ne bantu babidi mua kunyemesha bantu binunu 10?+
Kabivua mua kuenzeka bu Dibue diabu kadiyi dibapane+Ne Yehowa kayi mubafile kudibu.
31 Bualu dibue diabu kadiena bu Dibue dietu to,+Nansha bena lukuna betu mbamanye bualu ebu.+
32 Bualu muonji wabu wa tumuma tua mvinyo mmufumine ku muonji wa tumuma tua mvinyo wa mu SodomaNe mu madimi a mu Amola.+
Tumuma tuabu tua mvinyo ntumuma tua mulungu,Bisumbu biabu bia tumuma tua mvinyo bidi ne bululu.+
33 Mvinyo wabu ndulengu lua nyoka,Lulengu lubi lua nyoka wa kobra.
34 Meme tshiena mulame malu abu onso,Muakangile mu nzubu wanyi wa kulamina bintu anyi?+
35 Disombuela ndianyi, ne dinyoka,+Pakumbana tshikondo padi dikasa diabu diselemuka,+Bualu dituku dia dikenga diabu dikadi pabuipi,Ne bualu budi bubindile nebulue lukasa.’
36 Bualu Yehowa nealumbuluishe tshisamba tshiende,+Ne neumvuile bena mudimu bende luse*+Padiye umona ne: bukole buabu mbukepele,Ne anu bantu badi kabayi ne bukole ne badi bateketangane ke badi bashale.
37 Dîba adi neambe ne: ‘Nzambi yabu idi penyi,+Dibue divuabu banyemena,
38 Ivua idia mafuta a milambu yabu,*Inua mvinyo wa milambu yabu ya bia kunua?+
Ijuke, inuambuluishe.
Ilue muaba wenu wa kunyemena.
39 Mpindieu monayi ne: meme, meme ke yeye,+Kakuena nzambi mikuabu pa kumbusha meme.+
Ndi nshipa, ne ndi mfila muoyo.+
Ndi ntapa,+ ne nenguodope,+Ne kakuena muntu udi mua kusungila mukuabu mu tshianza tshianyi.+
40 Bualu ndi njula tshianza tshianyi muulu,Ne ndi nditshipa ne: “Bulelela, bu mundi meme ne muoyo bua kashidi,”+
41 Meme musakishe muele wanyi wa mvita udi ubalakanaNe mulongolole tshianza tshianyi bua kulumbuluisha,+Nensombuele baluishi banyi+Ne nennyoke bantu badi bankine.
42 Nengenze bua mikete yanyi yinue mashi yikuatshike,Ne muele wanyi wa mvita neudie munyinyi,Ne mashi a bantu badibu bashipe ne badibu bakuate,Ne mitu ya bamfumu ba bena lukuna.’
43 Nuenu bisamba, sankayi pamue ne tshisamba tshiende,+Bualu neasombuele mashi a bena mudimu bende,+Neasombuele baluishi bende+Ne neabuikidile buloba bua tshisamba tshiende mpekatu.”*
44 Nunku Mose wakalua, kuambaye mêyi onso a musambu eu mu matshi a tshisamba,+ yeye ne Hoshea*+ muana wa Nuna.
45 Pakajikija Mose kuambila Isalele mujima mêyi onso aa,
46 wakabambila ne: “Teyayi ntema ku mêyi onso andi nnuambila bua kunudimuija lelu aa,+ bua nutumine bana benu dîyi bua badimuke bua kuenza mêyi onso a Mikenji eyi.+
47 Bualu edi ki ndîyi dia tshianana kunudi to, kadi didi diumvuija muoyo wenu,+ ne bua dîyi edi nenulale matuku a bungi mu buloba bunudi nusabukila Yadene bua kuangata.”
48 Yehowa wakakula ne Mose dituku dimue dimue adi, wamba ne:
49 “Banda ku mukuna wa Abalima eu,+ mukuna wa Nebo,+ udi mu buloba bua Moaba, bitangilangane ne Yeliko, umone buloba bua Kanâna bundi mpesha bena Isalele bua buikale buabu.+
50 Pashishe neufuile ku mukuna uukadi pa kubanda eu, ne neusangishibue kudi bena mu tshisamba tshienu,* anu muvua muanenu Alona mufuile ku mukuna wa Hô+ ne musangishibue kudi bena mu tshisamba tshiabu,
51 bualu nuenu bonso babidi nuvua bapange lulamatu kundi munkatshi mua bena Isalele ku mâyi a Meliba+ ku Kadeshe mu tshipela tshia Sine, bualu kanuvua banjidile kumpala kua tshisamba tshia Isalele.+
52 Neumuenene buloba pa bule, kadi kuakubuela mu buloba bundi mpesha tshisamba tshia Isalele to.”+
Note
^ Anyi pamuapa: “bukua bantu.”
^ Mmumue ne: Yakoba.
^ Ku mua.: “mafuta a mikoko.”
^ Ku mua.: “mafuta a ku tuonyi tua ntete ya blé.”
^ Anyi “mâyi.”
^ Diumvuija: “Muntu muakane,” muanzu wa bunême bua Isalele.
^ Anyi “mukawu.”
^ Anyi pamuapa: “tshijika matshi ku mibelu.”
^ Anyi “neanyingalale bua bena mudimu bende.”
^ Anyi “idia milambu yabu mitambe buimpe.”
^ Anyi “neabulengeje.”
^ Ke dîna dia ntuadijilu dia Yoshua. Hoshea ntshikepeshelu tshia dîna Hoshaiah didi diumvuija ne: “Musungila kudi Yah; Yah mmusungile.”
^ Eu mmushindu wa kuakula bua lufu mu ngakuilu wa kasala.
