Ekesode 15:1-27
15 Tshikondo atshi Mose ne bena Isalele bakimbila Yehowa musambu eu ne:+
“Nengimbile Yehowa, bualu mmutumbishibue bikole.+
Kabalu ne uvua mukabande, yeye mmubiele mu mbuu.+
2 Yah* udi makanda anyi ne bukole buanyi, bualu mmulue lupandu luanyi.+
Eu ke Nzambi wanyi, nemmusamune;+ Nzambi wa tatu wanyi,+ nemmutumbishe.+
3 Yehowa mmuluanganyi wa mvita munene.+ Yehowa ndîna diende.+
4 Matempu a Palô ne tshiluilu tshiende, Yeye mmubiele mu mbuu,+Ne baluanganyi bende ba mvita batambe bunene mbadine mu Mbuu Mukunze.+
5 Mâyi a mavuala makole akababuikila; bakadina mu ndondo anu bu dibue.+
6 Wewe Yehowa, tshianza tshiebe tshia balume tshidi ne bukole bua bungi;+Wewe Yehowa, tshianza tshiebe tshia balume tshidi mua kusunsula muena lukuna.
7 Mu bunême buebe bunene, udi mua kuela badi bakuluisha panshi;+Udi utuma tshiji tshiebe tshikole, tshidi tshibosha anu bu tukolakola.
8 Ku mupuya wa mu mimpempe yebe, mâyi akadikunguija;Akimana tendee, akanda mâyi a bungi;Mâyi a mavuala makole akakuatakana munkatshi mua mbuu.
9 Muena lukuna wakamba ne: ‘Nembalondakaje! Nembapete!
Nentapulule bintu bindi munyenge too ne pandi* ngukuta!
Nentule muele wanyi wa mvita! Tshianza tshianyi netshibakokeshe!’+
10 Wewe wakapudija ne mupuya webe, mbuu kubabuikilaye;+Bakadina mu mâyi manene anu bu tshiamu tshia plomb.
11 Nnganyi udi bu wewe Yehowa munkatshi mua nzambi mikuabu?+
Nnganyi udi bu wewe udi udileja wa bukole mu bunsantu?+
Yeye udi wa kutshina ne misambu ya kumutumbisha nayi, ne Udi wenza malu a kukema.+
12 Wewe wakolola tshianza tshiebe tshia balume, ne buloba buakabamina.+
13 Mu dinanga diebe dia lulamatu udi mulombole bantu baudi mupikule;+Mu bukole buebe neubalombole mu muaba webe wa tshijila wa kusombela.
14 Bisamba nebiumvue;+ nebikanke;Kanyinganyinga kakole* nekakuate bena Peleshete.
15 Tshikondo atshi bamfumu* ba Edome nebumvue buôwa;Luzakalu nelukuate bakokeshi ba bukole* ba Moaba.+
Bantu bonso ba mu Kanâna nebatekete mu maboko.+
16 Ditshina ne buôwa bukole nebibakuate.+
Bualu bua bukole bua tshianza tshiebe, nebapange kunyunga anu bu dibueToo ne papita tshisamba tshiebe, wewe Yehowa,Too ne papita+ tshisamba tshiuvua muenze.+
17 Neulue nabu ne neubakune pa mukuna wa bumpianyi buebe,+Muaba mujadika uudi wewe Yehowa mudilongoluele bua kusomba,Muaba munsantu udi bianza biebe, wewe Yehowa, bijadike.
18 Yehowa neakokeshe bu mukalenge bua kashidi ne tshiendelele.+
19 Pavua tubalu tua Palô ne matempu ende a mvita ne basalayi bende bavua babande pa tubalu babuele mu mbuu,+Yehowa wakapingaja mâyi a mbuu pa mutu pabu,+Kadi bena Isalele bakendela pa buloba bume munkatshi mua mbuu.”+
20 Pashishe muprofete mukaji Mîyama, muanabu ne Alona, wakangata ngoma mu tshianza tshiende, ne bantu bakaji bonso bakamulonda ne ngoma ne maja.
21 Mîyama wakapunguluja bantu balume ne:
“Imbilayi Yehowa, bualu mmutumbishibue bikole.+
Kabalu ne uvua mukabande, yeye mmubiele mu mbuu.”+
22 Pashishe Mose wakumbuka ne bena Isalele ku Mbuu Mukunze, bobu kuya mu tshipela tshia Shû, kuendabu matuku asatu mu tshipela, kadi kabakapeta mâyi to.
23 Bakafika ku Mala,*+ kadi kabavua mua kunua mâyi a ku Mala to, bualu avua ne bululu. Ke bualu kayi wakinyika muaba au ne: Mala.
24 Nunku bantu bakatuadija kunungana bua Mose+ bamba ne: “Netunue tshinyi?”
25 Wakadidila Yehowa,+ Yehowa kumulejaye mutshi kampanda. Pakawelaye mu mâyi, mâyi akalua mimpe.
Muaba au Yeye wakabatekela mukenji ne tshishimikidi tshia dilumbuluisha, Yeye kubateka mu diteta muaba au.+
26 Wakamba ne: “Wewe muteleje dîyi dia Yehowa Nzambi webe ne muoyo mujima, ne muenze malu adi mimpe ku mêsu kuende, ne muteye ntema ku mêyi ende, ne mulonde mêyi ne mikandu biende bionso,+ tshiakukutumina disama nansha dimue dia ku masama amvua mutumine bena Ejipitu to,+ bualu meme Yehowa ke udi ukuondopa.”+
27 Panyima pa malu aa, bakafika ku Elima, muaba uvua mishimi ya mâyi 12 ne mabue a ngaji 70. Nunku bakatudila muaba au pabuipi ne mâyi.
Note
^ “Yah” ntshikepeshilu tshia dîna dia Yehowa.
^ Anyi “padi anyima wanyi.”
^ Ku mua.: “Dikengakana dia pa kulela.”
^ Ku mua.: “basheike.” Sheike uvua mfumu wa tshisa.
^ Anyi “batshikokesha nkaya.”
^ Diumvuija: “Bululu.”
