Genese 22:1-24
22 Panyima pa bualu ebu, Nzambi mulelela wakateka Abalahama mu diteta;+ kumubikilaye ne: “Abalahama!” Yeye kuandamuna ne: “Mmeme eu!”
2 Kumuambilaye ne: “Angata koku muanebe, muanebe umuepele uudi munange bikole,+ Izaka,+ uye ku buloba bua Moliya,+ umulambule kuinaku bu mulambu wa kuosha, pa mukuna ungakuleja.”
3 Abalahama wakajuka pa dinda menemene, kusuikaye tshiseba pa mpunda wende, kuangataye bena mudimu bende babidi pamue ne muanende Izaka. Wakapanda nkunyi ya mulambu wa kuosha, pashishe kujukaye, kuyaye muaba uvua Nzambi mulelela mumuambile.
4 Dituku disatu, Abalahama wakabandisha mêsu ende, kumuenenaye muaba au ku bule.
5 Ke Abalahama kuambila bena mudimu bende ne: “Shalayi nuenu muaba eu ne mpunda, kadi meme ne nsongalume eu netuye kuntu kuaka bua kutendelela, pashishe netupingane kunudi.”
6 Nunku Abalahama wakangata nkunyi ya mulambu wa kuosha, kuyambikaye muanende Izaka. Pashishe kuambulaye kapia ku bianza ne kele,* kuyabu bonso babidi pamue.
7 Ke Izaka kubikilaye tatuende Abalahama ne: “Tatu!” Kuandamunaye ne: “Ee! Muananyi,” Izaka kuamba kabidi ne: “Kapia nkoku aka, nkunyi nyoyi eyi, kadi mukoko wa mulambu wa kuosha udi penyi?”
8 Abalahama kuamba ne: “Muananyi, Nzambi nkayende neafile mukoko wa mulambu wa kuosha.”+ Bonso babidi bakatungunuka ne luendu.
9 Ndekelu wa bionso, bakafika muaba uvua Nzambi mulelela mumuleje; Abalahama kuasaye tshioshelu muaba au, yeye kulongapu nkunyi. Wakasuika muanende Izaka bianza ne makasa, kumutentekaye pa tshioshelu pa mutu pa nkunyi.+
10 Pashishe Abalahama wakolola tshianza tshiende, kuangataye kele* bua kushipaye muanende.+
11 Kadi muanjelu wa Yehowa wakamuela dîyi kumbukila mu diulu wamba ne: “Abalahama, Abalahama!” Yeye kuandamuna ne: “Mmeme eu!”
12 Ke yeye kuamba ne: “Kuenzedi nsongalume bibi, kumuenzedi bualu nansha bumue to; mpindieu ngamanyi ne: udi utshina Nzambi, bualu kuena mumpale* muanebe, webe umuepele to.”+
13 Ke Abalahama kubandisha mêsu, ne kumonaye kumpala kuende tshimpanga tshia mukoko tshivua ne nsengu yatshi mikalame mu tumitshi, ntanta ne muaba uvuaye. Ke Abalahama kuya kuangata tshimpanga atshi, kutshilambulaye bu mulambu wa kuosha pa muaba wa muanende.
14 Nunku Abalahama wakabanga kubikila muaba au ne: Yehowa-yile.* Ke bualu kayi batshidi bamba too ne lelu ne: “Ku mukuna wa Yehowa, tshintu netshifidibue.”+
15 Muanjelu wa Yehowa wakela kabidi Abalahama dîyi kumbukila mu diulu musangu muibidi,
16 wamba ne: “Yehowa udi wamba ne: ‘Ndi nditshipa mu dîna dianyi+ ne: bu muudi muenze bualu ebu, kuyi mumpale* muanebe, webe umuepele,+
17 meme nenkubeneshe bushuwa ne nemvudije bushuwa muanebe* bu mitoto ya muulu ne bu nsenga ya ku muelelu kua mbuu;+ ne muanebe* neanyenge tshiibi* tshia bena lukuna bende.+
18 Ku diambuluisha dia muanebe,*+ bisamba bionso bia pa buloba nebipete dibenesha buabi biobi, bualu udi mumvue dîyi dianyi.’”+
19 Pashishe Abalahama wakapingana kudi bena mudimu bende, bakajuka, kupinganabu pamue ku Bê-sheba;+ ne Abalahama wakatungunuka ne kusombela ku Bê-sheba.
20 Panyima pa malu aa, bakambila Abalahama ne: “Mona, Mileka mmulelele pende muanenu Nahô+ bana ba balume:
21 Usa, muanende muanabute, ne muanabu Buza, ne Kemuele tatuende wa Alama,
22 ne Kesede, ne Hazo, ne Piledasha, ne Yidilafa, ne Betuele.”+
23 Betuele wakalela Lebeka.+ Mileka wakalelela Nahô muanabu ne Abalahama bana muanda mukulu abu.
24 Leuma, mukaji uvuaye mubanjije, wakalela pende bana ba balume: Teba, Gahama, Tahasha, ne Mâka.
Note
^ Anyi “kele ka kushipa naku nyama.”
^ Anyi “kele ka kushipa naku nyama.”
^ Anyi “mungimine.”
^ Diumvuija: “Yehowa neafile tshidi tshikengedibua; Yehowa neatangile bualu abu.”
^ Anyi “mungimine.”
^ Ku mua.: “dimiinu diebe.” Muaku eu mu tshiena Ebelu udi mua kuikala kabidi ku bungi.
^ Ku mua.: “dimiinu diebe.” Muaku eu mu tshiena Ebelu udi mua kuikala kabidi ku bungi.
^ Anyi “bimenga.”
^ Ku mua.: “dimiinu diebe.”
