Misambu 101:1-8
Wa Davidi. Mujiki.
101 Nengimbe bua dinanga dia lulamatu ne bua kulumbuluisha kuakane.
Wewe Yehowa, nenkuimbile misambu ya kukutumbisha nayi.*
2 Nengenze malu ne budimu, tshiyi mua kubandibua.*
Ndîba kayi diwalua kundi?
Nengende mu bululame bua muoyo wanyi+ munda mua nzubu wanyi.
3 Tshiakuteka tshintu tshidi katshiyi ne mushinga* ku mêsu kuanyi.
Ndi mukine bienzedi bia badi basesuka kule ne tshidi tshiakane;+Tshiakubuelakanamu nansha.*
4 Muoyo udi ne malu makonyangale udi kule nanyi;Tshiakuitaba* bualu bubi to.
5 Muntu udi ushiminyina mukuende bualu mu musokoko,+Nemmupuwishe.*
Muntu udi ne mêsu a didibandisha ne muoyo wa diambu,Tshiakumuitaba nansha.
6 Nentangile kudi bena lulamatu ba pa buloba,Bua bobu basombe nanyi.
Muntu udi wenda kayi mua kubandibua* neangenzele mudimu.
7 Kakuena muena dishima wasomba mu nzubu muanyi nansha,Kakuena muena mafi wimana kumpala kuanyi.*
8 Mu dinda dionso nempuwishe* bantu babi bonso ba pa buloba,Bua kubutula benji ba malu mabi bonso mu tshimenga tshia Yehowa.+
Note
^ Anyi “nenkuimbile mijiki.”
^ Anyi “ne muoyo mutoke.”
^ Anyi “tshia patupu.”
^ Anyi “Bienzedi biabu kabiena bindamata.”
^ Ku mua.: “Tshiakumanya.”
^ Anyi “Nemmushipe.”
^ Anyi “ne muoyo mutoke.”
^ Ku mua.: “kumpala kua mêsu anyi.”
^ Anyi “nenshipe.”
