Misambu 147:1-20
147 Tumbishayi Yah!*
Mbimpe kuimba misambu ya kutumbisha nayi* Nzambi wetu;Mona mudibi bienza disanka ne bikumbane bua kumutumbisha!+
2 Yehowa udi wibaka Yelushalema;+Udi usangisha pamue ba mu Isalele bavuabu batangalaje.+
3 Yeye udi wondopa badi ne mioyo misunsuke;Udi usuika mputa yabu.
4 Udi ubala bungi bua mitoto;Udi uyibikila buonso buayi mu mêna ayi.+
5 Mukalenge wetu mmunene ne udi ne bukole bupite bungi;+Dijingulula diende dia malu ndipite tshipidi.+
6 Yehowa udi ujula bena bupuekele,+Kadi udi ukupa bantu babi panshi.
7 Imbilayi Yehowa misambu ne diela tuasakidila;Imbayi misambu ya kutumbisha nayi Nzambi wetu tshiapamue ne lunzenze,
8 Yeye udi ubuikila diulu ne matutu,Yeye udi upesha buloba mvula,+Yeye udi umenesha bisonsa+ pa mikuna.
9 Yeye udi upesha nyama biakudia,+Ubipesha bana ba bikololo badi babilomba.+
10 Kena usanka bua bukole bua kabalu;+Nansha mikolo ya muntu idi ne bukole kayena imukemesha.+
11 Yehowa udi usanka bua bantu badi bamutshina,+Bua bantu badi bindile dinanga diende dia lulamatu.+
12 Wewe Yelushalema, tumbisha Yehowa.
Wewe Siona, tumbisha Nzambi webe.
13 Yeye udi ukolesha milonda ya ku biibi bia tshimenga tshiebe;Udi ubenesha bana bebe badi munda muebe.
14 Yeye udi ubueja ditalala mu buloba buebe;+Udi ukukutshisha ne ntete ya blé mutambe buimpe.*+
15 Yeye udi utuma dîyi diende pa buloba;Dîyi diende didi diya lubilu lukole.
16 Yeye udi utuma neje bu miosa ya mikoko;+Udi utangalaja bisunsukile bia mabue a mashika anu bu butu.+
17 Udi ukupa mabue ende a mvula* panshi bu bisunsukile bia diampa.+
Nnganyi udi mua kutua mashika ende tshiadi?+
18 Yeye udi utuma dîyi diende, adi enguluka.
Udi ututshisha tshipepele tshiende,+ mâyi adi apueka.
19 Yeye udi umanyisha Yakoba dîyi diende,Umanyisha Isalele mêyi ne mikandu biende ne mêyi ende a dilumbuluisha.+
20 Ki mmuenzele ba mu tshisamba tshikuabu nunku to;+Ki mbamanye bualu nansha bumue bua mêyi ende a dilumbuluisha.
Tumbishayi Yah!*+
Note
^ Anyi “Aleluya!” “Yah” ntshikepeshilu tshia dîna dia Yehowa.
^ Anyi “mijiki bua.”
^ Ku mua.: “bifutafuta bia ntete ya blé.”
^ Anyi, “mabue a mashika.”
^ Anyi “Aleluya!” “Yah” ntshikepeshilu tshia dîna dia Yehowa.