Misambu 148:1-14
148 Tumbishayi Yah!*
Tumbishilayi Yehowa kumbukila mu diulu;+Mutumbishayi mu miaba mitumbuke ya muulu.
2 Nuenu banjelu bende bonso, mutumbishayi.+
Wewe tshiluilu tshiende tshionso, mutumbisha.+
3 Wewe dîba ne ngondo, mutumbishayi.
Nuenu mitoto yonso idi ikenka, mutumbishayi.+
4 Mutumbishayi, wewe diulu didi ditumbuke muulu menemene*Ne mâyi adi pa mutu pa diulu.
5 Biobi bitumbishe dîna dia Yehowa,Bualu yeye wakatuma dîyi, biobi biakafukibua.+
6 Udi ubilama bijadika kashidi ne tshiendelele;+Mmuele mukenji udi kawuyi mua kufua.+
7 Tumbishilayi Yehowa pa buloba,Nuenu bifukibua binene bidi mu mbuu ne nuenu mâyi male onso,
8 Nuenu mipenyi ne mvula wa mabue, neje ne matutu mafikuluke,Wewe tshipepele tshikole tshidi tshikumbaja dîyi diende,+
9 Nuenu mikuna minene ne mikuna mikese yonso,+Nuenu mitshi ya bimuma ne nuenu mitshi ya sedre yonso,+
10 Nuenu nyama ya tshisuku+ ne nuenu bimuna bionso,Nuenu bintu bidi bidikoka panshi ne nyunyi idi ne mapuapua,
11 Nuenu bakalenge ba pa buloba ne nuenu bisamba bionso,Nuenu bakokeshi ne nuenu balumbuluishi bonso ba pa buloba,+
12 Nuenu bansongalume ne nuenu bansongakaji,*Bantu bakulumpe pamue ne bana.*
13 Batumbishe dîna dia Yehowa,Bualu dîna diende nkayadi didi kuulu kule kudibu kabayi mua kufika.+
Bunene buende budi pa mutu pa buloba ne diulu.+
14 Neabandishe bukole* bua bantu bende,Bua bualu bua butumbi bua bena lulamatu bende bonso,Bua bana ba Isalele, bantu badi pabuipi nende.
Tumbishayi Yah!*
Note
^ Anyi “Aleluya!” “Yah” ntshikepeshilu tshia dîna dia Yehowa.
^ Ku mua.: “diulu dia mu diulu.”
^ Ku mua.: “bansongakaji batshidi tumama.”
^ Anyi “Bakulakaje pamue ne bansonga.”
^ Ku mua.: “lusengu.”
^ Anyi “Aleluya!” “Yah” ntshikepeshilu tshia dîna dia Yehowa.
