Misambu 74:1-23
Masikile.* Wa Asafa.+
74 Nzambi wanyi, bua tshinyi udi mutubenge kashidi?+
Bua tshinyi tshiji tshiebe tshidi tshitemena* mikoko ya mu mpata muebe?+
2 Vuluka bantu* bauvua mupete kale,+Tshisa tshiuvua mukuule bua tshikale bumpianyi buebe.+
Vuluka mukuna wa Siona uuvua musombele.+
3 Ludika makasa ebe too ne ku bikulu bia kashidi.+
Muena lukuna mmunyangakaje bintu bionso mu muaba wa tshijila.+
4 Baluishi bebe mbele mbila mikole mu muaba webe wa kudisangishila.*+
Mbasamu mabendele abu bobu bu bimanyinu.
5 Bavua anu bu bantu badi bajudila ditu dishitakane tusuyi.
6 Mbanyangakaje bimfuanyi bionso+ bivua biondola mu tshimanu tshiawu ne tusuyi ne milonda.
7 Mbatue muaba webe munsantu kapia.+
Mbanyange ntenta wa tshitendelelu udi ne dîna diebe, ne mbamuele panshi.
8 Bobu ne bana babu mbadiambile mu mioyo yabu ne:
“Miaba yonso ya kudisangishila ya Nzambi* idi mu ditunga idi ne bua kuoshibua.”
9 Kakuena bimanyinu bietu bitudi mua kumona;Kakuena kabidi muprofete nansha umue to,Ne muntu nansha umue wa munkatshi muetu ki mmumanye mutantshi wanenga bualu ebu to.
10 Nzambi wanyi, muluishi neatungunuke ne bipendu too ne dîba kayi?+
Muena lukuna neapepeje dîna diebe bua kashidi anyi?+
11 Bua tshinyi udi ukanda tshianza tshiebe, tshianza tshiebe tshia balume?+
Tshipatula mu tshiadi tshiebe,* ubatuishe ku ndekelu.
12 Kadi Nzambi udi Mukalenge wanyi katshia ku kale,Yeye udi wenza bienzedi bia lupandu pa buloba.+
13 Wewe udi muvuandulule mbuu ne bukole buebe;+Udi mutayishe mitu ya nyama minene ya mu mbuu mu mâyi.
14 Wewe udi muzaze mitu ya Leviyatane;*Udi muyifile bu tshiakudia kudi bantu, kudi badi basombele mu bipela.
15 Udi mukanguile mishimi ne tusulu tua mâyi njila;+Udi mumishe misulu ivua ipueka anu kupueka.+
16 Munya nguebe, ne butuku kabidi.
Wewe udi muenze butoke* ne dîba.+
17 Udi mujadike mikalu yonso ya buloba;+Udi muenze muvu wa luya lukole ne muvu wa mashika makole.*+
18 Yehowa wanyi, vuluka bipendu bia muena lukuna,Mudi bantu batshimbakane bapetula dîna diebe.+
19 Kufidi muoyo* wa kamanda nkutshi* kebe kudi nyama ya tshisuku to.
Muoyo wa bantu bebe badi mu dikenga, kuwupu muoyo bua kashidi nansha.
20 Vuluka tshipungidi,Bualu miaba ya mîdima ya pa buloba mmiuwule ne bisombelu bia tshikisu.
21 Muntu udi muzajibue kapinganyi muedibue mâyi ku makasa to;+Bapuekele ne bapele batumbishe dîna diebe.+
22 Jukaku, wewe Nzambi, udilumbuluile tshilumbu tshiebe.
Vuluka mudi batshimbakane bakupenda dituku dijima.+
23 Kupu malu adi baluishi bebe bamba muoyo.
Diyoyo dia badi bakuela mpata didi dibanda dîba dionso.
Note
^ Ku mua.: “tshifuimina.”
^ Ku mua.: “tshisumbu tshiebe.”
^ Anyi “muaba webe wa masangisha.”
^ Anyi “Miaba yonso idibu batendelela Nzambi.”
^ Anyi “mu mibunyi ya tshilamba tshiebe.”
^ Anyi “tshintu tshidi tshitokesha.”
^ Anyi “été ne hiver.”
^ Anyi “anyima.”
^ Anyi “kakutshikutshi.”
