Misambu 9:1-20
Kudi muludiki; wa Muta-labene.* Mujiki wa Davidi.
א [Alefe]
9 Nenkutumbishe, Yehowa wanyi, ne muoyo wanyi mujima;Nengambilangane midimu yebe yonso ya kukema.+
2 Nensanke ne nentunke bua bualu buebe;Wewe Mutambe Bunene, nengimbe misambu ya kutumbisha nayi* dîna diebe.+
ב [Bete]
3 Padi bena lukuna banyi balukila tshianyima,+Nebatetuke ne nebajimine kumpala kuebe.
4 Bualu udi ulumbulula tshilumbu tshianyi tshiakane;Udi usomba mu nkuasa webe wa bukalenge ulumbuluisha ne buakane.+
ג [Gimele]
5 Udi mutandishe bisamba+ ne mubutule bantu babi,Ujimija dîna diabu kashidi ne tshiendelele.
6 Muena lukuna mmubutudibue bua kashidi;Wewe wakashimbula bimenga biabu,Ne tshivulukilu tshiabu tshionso netshijimine.+
ה [He]
7 Kadi Yehowa mmusombe mu nkuasa wa bukalenge kashidi,+Mmujadike nkuasa wende wa bukalenge bikole bua kulumbuluisha kuakane.+
8 Nealumbuluishe buloba budi bantu basombele* mu buakane;+Neakosele bisamba bilumbu ne buakane.+
ו [Waw]
9 Yehowa nealue tshinyemenu tshikole* kudi badibu bakengesha,+Tshinyemenu tshikole mu bikondo bia dikenga.+
10 Badi bamanye dîna diebe nebakueyemene;+Wewe Yehowa, kuakulekela badi bakukeba nansha.+
ז [Zayine]
11 Imbayi misambu ya kutumbisha nayi Yehowa udi musombele mu Siona;Manyishayi bienzedi biende munkatshi mua bukua bantu.+
12 Bualu Yeye udi usombuela mashi abu udi ubavuluka;+Kakupua muadi wa bakengi muoyo to.+
ח [Hete]
13 Undeje luse, Yehowa wanyi; mona dikenga dianyi dia kudi badi bankine,Wewe udi unjula ku biibi bia lufu,+
14 Bua mmone mua kumanyisha bienzedi biebe bidi biakanyine butumbi mu biibi bia muana wa bakaji wa Siona+Ne kusankila mu bienzedi biebe bia lupandu.+
ט [Tete]
15 Bisamba mbidine mu dijimba divuabi biumbule;Dikasa diabu bobu bine ndikuatshibue mu bukondo buvuabu basokoke.+
16 Yehowa mbamumanyine ku dilumbuluisha didiye ukumbaja.+
Muntu mubi mmukuatshibue mu buteyi bua mudimu wa bianza biende.+
Higayone.* (Sela)
י [Yode]
17 Bantu babi nebalukile tshianyima too ne ku Lukita,*Bisamba bionso bidi bipua Nzambi muoyo.
18 Kadi kabakupua bapele muoyo misangu yonso to;+Anyi ditekemena dia bena bupuekele kadiakujimina nansha.+
כ [Kafe]
19 Juka, Yehowa wanyi! Kulekedi muntu ufuafua utshimuna to.
Bisamba bilumbuluishibue kumpala kuebe.+
20 Yehowa wanyi, ubakuatshishe buôwa;+Bisamba bimanye ne: badi anu bantu bafuafua. (Sela)
