Musambu wa Solomo 5:1-16
-
Mulami wa mikoko (1a)
-
Bakaji ba mu Yelushalema (1b)
-
‘Kuatshikayi ne dinanga!’
-
-
Nsongakaji (2-8)
-
Udi ulonda tshilota tshiende
-
-
Bana ba bakaji ba Yelushalema (9)
-
“Nku tshinyi kudi munanga webe muimpe kupita munanga kayi mukuabu yonso?”
-
-
Nsongakaji (10-16)
-
“Kena tshipangidi munkatshi mua bantu binunu 10” (10)
-
5 “Ndi mubuele mu budimi buanyi,+Wewe muanetu wa bakaji, mubangila wanyi.
Ndi musangishe mire wanyi ne bilengejilu bianyi bia mupuya muimpe.+
Ndi mudie dipula* dianyi dia buitshi ne buitshi buanyi;Ndi munue mvinyo wanyi ne mabele anyi.”+
“Diayi, balunda banyi bananga!
Nuayi, nukuatshike mishindu ya kuleja dinanga!”+
2 “Ndi mulale, kadi muoyo wanyi mmutabale.+
Adi ndîyi dia munanga wanyi ukokola!”
“Ngunzuluila, wewe muanetu wa bakaji, munanga wanyi,Nkutshi wanyi, wanyi udi kayi ne kalema!
Bualu mutu wanyi mmutalale ne lumuma,Bipia bia nsuki yanyi mbitalale ne mutalela wa butuku.”+
3 “‘Ndi muvule nkanzu wanyi.
Ndi ne bua kumuvuala kabidi anyi?
Ndi muowe mâyi ku makasa anyi.
Ndi ne bua kuafiikisha kabidi anyi?’
4 Munanga wanyi wakumbusha tshianza tshiende mu disoso dia tshiibi,Ne majinga anyi bua bualu buende akajuka.
5 Ngakajuka bua kunzuluila munanga wanyi;Bianza bianyi biakamatshisha mire,Ne minu yanyi yakamatshisha mire wa mâyi mâyi,Pa bikuatshidi bia tshikangilu tshia tshiibi.
6 Ngakunzuluila munanga wanyi,Kadi munanga wanyi ukavua mumbuke, ukavua muye.
Ngakadiumvua mushikile* pavuaye muye.*
Ngakamukeba, kadi tshiakamupeta to.+
Ngakamubikila, kadi kakangandamuna to.
7 Bansentedi bavua banyunguluka mu tshimenga bakampeta.
Bakantuta, bakantapa mputa.
Bansentedi ba pa bimanu bakannyenga tshitambala tshianyi.*
8 Ndi nnutshipisha, nuenu bana ba bakaji ba mu Yelushalema ne:
Nuenu bapete munanga wanyi,Numuambile ne: dinanga didi dinsamisha.”
9 “Nku tshinyi kudi munanga webe muimpe kupita munanga kayi mukuabu yonso,Wewe mukaji mutambe bakuabu bulengele?
Nku tshinyi kudi munanga webe muimpe kupita munanga kayi mukuabu yonsoBua wewe kututshipisha mutshipu wa nunku?”
10 “Munanga wanyi mmuimpe bikole ne mmukunzubile;Kena tshipangidi munkatshi mua bantu binunu 10.
11 Mutu wende ngua or, or mutambe buimpe.
Bipia bia nsuki yende bidi bu malala a dibue adi apepa,*Mifiike anu bu nyunyi wa tshikololo.
12 Mêsu ende adi bu nyunyi ya nkutshi ku tusulu tua mâyi,Yowa mu mabele,Misombe ku dijiba diuwule tente.*
13 Matama ende adi bu bulalu bua bilengejilu bia mupuya muimpe,+Mabula a bisonsa bia dipembu dimpe.
Mishiku yende mbilongo bia kapapankole, imatshisha mire wa mâyi mâyi.+
14 Bianza biende bidi mbungulu ya or, milengeja ne mabue a krizolite.
Difu diende didi mubanga munona mulamika mabue a safire.
15 Mikolo yende idi makunji a mabue a marbre mateka pa bitaku bia or mutambe buimpe.
Tshimuenekelu tshiende tshidi bu Lebanona, katshiyi ne tshidi natshi mumue bu mitshi ya sedre.+
16 Mukana* muende muine mmushême,Ne biende bionso mbilengele.+
Ke dinanga dianyi au, ke munanga wanyi au, nuenu bana ba bakaji ba mu Yelushalema.”
Note
^ Anyi “dikatshi.”
^ Anyi “Anyima wanyi wakapatuka.”
^ Anyi pamuapa: “Anyima wanyi wakanshiya pavuaye muakule.”
^ Anyi “tshilamba tshianyi tshia kubuikila ku mutu.”
^ Anyi pamuapa: “bu tushishi tua ngaji ya kankinda.”
^ Anyi pamuapa: “ku mielelu ya tshina tshia mâyi.”
^ Ku mua.: “Tshilakalaka.”
