Nahuma 1:1-15
1 Dîyi diamba bua bualu bua Niniwe didi ne:+ Mukanda wa tshikena kumona tshia Nahuma* muena Elekosha:
2 Yehowa udi Nzambi udi ulomba bua bamulamate anu yeye+ ne udi udisombuela;Yehowa udi udisombuela ne mmudiakaje bua kuleja tshiji tshiende tshikole.+
Yehowa udi udisombuela kudi baluishi bende,Ne udi ulama tshiji tshiende tshikole bua bena lukuna bende.
3 Yehowa kena ukuata tshiji lubilu,+ ne udi ne bukole bua bungi,+Kadi Yehowa kakukanda dinyoka didi dikumbanyine nansha kakese.+
Njila wende udi mu tshipepele ne mvunde bidi bibutula,Ne matutu adi lupuishi lua makasa ende.+
4 Udi ukanyina mbuu,+ ne udi umukamisha;Ne udi ukamisha misulu yonso.+
Bashana ne Kâmele bidi bifubidila,+Ne bilongo bia mu Lebanona bidi bifubidila.
5 Mikuna minene idi ikanka bua bualu buende,Ne mikuna mikese idi yenguluka.+
Buloba nebudiele muulu bua bualu bua mpala wende,Pamue ne ditunga ne bonso badi basombelamu.+
6 Nnganyi udi mua kuimana kumpala kua tshiji tshiende?+
Ne nnganyi udi mua kukandamena bukole bua tshiji tshiende?+
Tshiji tshiende tshikole netshipongolodibue bu kapia,Ne mabue neatayike bua bualu buende.
7 Yehowa mmuimpe,+ mmuaba wa kusokomena dituku dia dikenga.+
Yeye mmumanye* bantu badi banyemena kudiye.+
8 Neabutule muaba wende* butubutu ne mâyi adi apasalala,Ne mîdima neyilondakaje bena lukuna bende.
9 Ntshifufu kayi tshinuelela Yehowa?
Yeye udi ubutula butubutu.
Dikenga kadiakujuka musangu muibidi to.+
10 Bualu mbapindakane bu mêba,Ne badi bu bantu badi bakuatshike maluvu;*Kadi neboshike bu nsona miume.
11 Muntu udi welela Yehowa tshifufu tshibi neafumine kuudi,Ufila mibelu idi kayiyi ne mushinga.
12 Mona tshidi Yehowa wamba:
“Nansha muvuabu ne bukole buabu buonso ne bikale ba bungi,Nansha nanku, nebatapibue ne nebajimine.*
Ndi mukukengeshe,* kadi tshiakukukengesha kabidi to.
13 Mpindieu nentshibule tshikokedi tshiende tshidi kuudi,+Ne nenkose mu bitupa bibidi bintu bidibu bakusuike nabi.
14 Yehowa mmutume dîyi bua bualu buebe* ne:‘Kabakutungunuja kabidi dîna diebe to.
Nenjimije mpingu misonga ne mpingu ya tshiamu* mu nzubu* wa nzambi yebe.
Nenkuenzele lukita, bualu udi wa kupetula.’
15 Mona! Makasa a muntu udi ulua ne lumu luimpe adi pa mikuna,Muntu udi umanyisha ditalala.+
Wewe Yuda, sekelela bibilu biebe,+ futa mitshipu yebe,Bualu muntu tshianana kakupitshila kabidi munkatshi muebe nansha.
Yeye neabutudibue butubutu.”
Note
^ Diumvuija: “Musambi.”
^ Anyi “udi utabalela.”
^ Mmumue ne: wa Niniwe.
^ Anyi “maluvu ebe a ntete ya blé.”
^ Anyi pamuapa: “ne yeye neapite.”
^ Mmumue ne: Yuda.
^ Mmumue ne: Ashû.
^ Anyi “mpingu ya tshiamu tshiengulula.”
^ Anyi “ntempelo.”
