Nsumuinu 15:1-33
15 Diandamuna dia bupole* didi dituyisha luonji,+Kadi dîyi dishile* didi dilundula tshiji.+
2 Ludimi lua bena meji ludi luenza mudimu bimpe ne dimanya,+Kadi mukana mua batatakane mudi mubafula butshimbakane.
3 Mêsu a Yehowa adi miaba yonso,Atangila babi ne bimpe.+
4 Ludimi lua bupole* ludi mutshi wa muoyo,+Kadi ngakuilu mubi udi utekesha mu mikolo.*
5 Mutshimbakane udi upetula dinyoka dia tatuende,+Kadi muntu mudimuke udi witaba mubelu.*+
6 Mu nzubu mua muntu muakane mudi biuma bivule,Kadi bintu bidi mudimu wa muntu mubi upatula* bidi bimukebela lutatu.+
7 Mishiku ya bena meji idi itangalaja dimanya,+Kadi muoyo wa muntu mutatakane kawena wenza nanku to.+
8 Mulambu wa bantu babi mmubi kumpala kua Yehowa,+Kadi disambila dia bena bululame didi dimusankisha.+
9 Yehowa udi ukina njila wa muntu mubi,+Kadi yeye udi unanga muntu udi ulonda buakane.+
10 Dinyoka didi dimueneka dibi* kudi muntu udi umbuka mu njila,+Kadi muntu yonso udi ukina mubelu neafue.+
11 Lukita* ne muaba wa kabutu* bidi buashi ku mêsu kua Yehowa.+
Kadi netuambe tshinyi bua mioyo ya bantu!+
12 Musekianganyi kena unanga udi umubela* to.+
Kakulomba lungenyi kudi bena meji nansha.+
13 Muoyo wa disanka udi usanguluja mpala,Kadi kusama kua muoyo kudi kuzengeja lungenyi.+
14 Muoyo udi ne lungenyi udi ukeba dimanya,+Kadi mukana mua batatakane mudi mudia* butshimbakane.+
15 Matuku onso a muena dikenga mmabi,+Kadi muntu udi ne muoyomusangale* udi anu utshionkomoka.+
16 Kuikala ne bintu bikese mu ditshina dia Yehowa nkuimpe+Kupita kuikala ne biuma bia bungi kadi muikale ne kanyinganyinga.*+
17 Kudia bisekiseki muaba udi dinanga nkuimpe+Kupita kudia ngombe wa manyi* muaba udi lukinu.+
18 Muntu muena tshiji tshia lukasa udi usonsola dikokangana,+Kadi muntu udi kayi ukuata tshiji lukasa udi utuyisha matandu.+
19 Njila wa muena lulengu udi bu lupangu lua mêba,+Kadi njila wa bantu bakane udi bu tshibeba tshilandakane.+
20 Muana wa meji udi usankisha tatuende,+Kadi muntu mutatakane udi upetula mamuende.+
21 Butshimbakane budi disanka kudi muntu udi kayi ne lungenyi lujalame,*+Kadi muntu udi ne dijingulula dia malu udi uya buludiludi mutangile kumpala.+
22 Malu malongolola adi apangila padiku kakuyi dishintakaja dia ngenyi,*Kadi malu adi enda bimpe mu bungi bua bafidi ba ngenyi.*+
23 Muntu udi usanka padiye ufila diandamuna diakane,*+Ne dîyi diamba mu tshikondo tshiakane ndimpe be!+
24 Njila wa muoyo udi ufikisha kuulu bua muntu udi ne busunguluji,+Bua kumuepula ku Lukita* ludi muinshi.+
25 Yehowa neupule nzubu wa badibandishi,+Kadi nealame mukalu wa mukaji mukamba.+
26 Yehowa udi ukina malu adi muntu mubi upangadija,+Kadi mêyi adi asankisha mmakezuke kudiye.+
27 Muntu udi upetela bintu mu njila mubi udi ukebela ba mu nzubu muende lutatu,*+Kadi muntu udi ukina mbuejilu neashale ne muoyo.+
28 Muoyo wa muntu muakane udi welangana meji kumpala kua kuandamuna,*+Kadi mukana mua bantu babi mudi mubafula malu mabi.
29 Yehowa udi kule ne bantu babi,Kadi udi uteleja disambila dia bantu bakane.+
30 Mêsu adi abalakana adi asankisha* muoyo;Lumu luimpe ludi lukolesha mifuba.*+
31 Muntu udi uteleja mibelu idi ifila muoyoUdi ne muaba munkatshi mua bena meji.+
32 Muntu udi ubenga dinyoka udi upetula muoyo* wende,+Kadi muntu udi uteleja mibelu udi upeta dijingulula dia malu.*+
33 Ditshina dia Yehowa ndilongesha bua kupeta meji,+Ne kumpala kua butumbi kudi didipuekesha.+
Note
^ Anyi “dimpe.”
^ Anyi “didi disama.”
^ Anyi “Ludimi ludi luondopa.”
^ Ku mua.: “udi uzaza lungenyi.”
^ Anyi “dikanyina.”
^ Anyi “lupetu lua muntu mubi.”
^ Anyi “dipite bukole.”
^ Anyi “ne Abadone.”
^ Anyi “umukanyina.”
^ Anyi “mudi mulondakaja.”
^ Anyi “muimpe.”
^ Anyi “dipampakana.”
^ Ku mua.: “mudishila mu tshidilu.”
^ Ku mua.: “kayi ne muoyo munda.”
^ Anyi “muyuki wa ku ditshi.”
^ Anyi “bafidi ba mibelu.”
^ Ku mua.: “diandamuna dia mukana muende.”
^ Anyi “bundu.”
^ Anyi “wela meji bimpe a mushindu wa kuandamuna; wela meji kumpala kua kuakula.”
^ Ku mua.: “ludiundisha mifuba.”
^ Anyi “Kutapa dîsu ne musangelu kudi kusankisha.”
^ Anyi “anyima.”
^ Ku mua.: “dimuma dia muoyo.”
