Nsumuinu 4:1-27
4 Bana banyi, telejayi mubelu wa tatu;+Teyayi ntema bua nupete dijingulula dia malu,
2 Bualu nennupeshe diyisha dimpe;Kanulekedi dilongesha* dianyi.+
3 Mvua muana wa bushuwa kudi tatuanyi+Ne eu uvua mamuanyi mutambe kunanga.+
4 Yeye wakandongesha, kuambaye ne: “Muoyo webe ukuate mêyi anyi bikole.+
Lama mikenji yanyi ne ushale ne muoyo.+
5 Peta meji, peta dijingulula dia malu.+
Kupu muoyo, ne kusesuki ku malu andi ngamba.
6 Kualekedi to, ne wowu neakukube.
Uanange, ne wowu neakulame.
7 Meji ntshintu tshia mushinga mukole,*+ nunku peta meji,Ne mu bintu bionso biudi upeta, upete kabidi dijingulula dia malu.+
8 Uangate ne mushinga wa bungi menemene, ne owu neakubandishe.+
Owu neakupeshe lumu, bualu udi muwupukile.+
9 Owu nease tshikata tshimpe tshia lumu ku mutu kuebe;Neakulengeje ne tshifulu tshia butumbi tshia bulengele.”
10 Teleja, muananyi, ne itaba mêyi anyi,Bidimu bia muoyo webe nebikale bia bungi.+
11 Nenkulongeshe mu njila wa meji;+Nenkulombole mu tujila tua bululame.+
12 Paudi wenda, makasa ebe kaakupeta tshipumbishi;Ne wewe munyeme, kuakutondoka to.
13 Ukuate mubelu bikole; kuwulekedi to.+
Uwulame, bualu wowu udi muoyo webe.+
14 Kubuedi mu njila wa bantu babi,Ne kuendedi mu njila wa bena malu mabi.+
15 Umuepuke, kumulondi to;+Umbukaku, ne pita ne njila webe.+
16 Bualu bobu kabena mua kulala padibu kabayi banji kuenza bualu bubi.
Kabena bapeta tulu padibu kabayi banji kushindisha muntu.
17 Badi badia diampa dia malu mabi,Ne badi banua mvinyo wa tshikisu.
18 Kadi njila wa bantu bakane udi bu butoke bua bukenke bua mu dinda dindaBudi buenda butoka anu kutoka too ne padi munda munya mukumbana.+
19 Njila wa bantu babi udi bu mîdima;Bobu ki mbamanye tshidi tshibalenduisha.
20 Muananyi, teya ntema ku mêyi anyi;Teleja bimpe* malu andi ngamba.
21 Kumbushi mêsu ebe kudiwu;Ualame munda menemene mua muoyo webe,+
22 Bualu owu adi muoyo kudi badi baapeta+Ne adi makanda a mubidi bua mubidi wabu mujima.*
23 Kumpala kua bintu bionso biudi ulama, ulame muoyo webe,+Bualu munda muawu mudimupatuka mishimi yamuoyo.
24 Umbusha ngakuilu mukonyangale kuudi,+Ne miyuki ya bibenda yikale kule nebe.
25 Mêsu ebe adi ne bua kutangila anu kumpala,Eyowa, tangija mêsu ebe* anu kumpala kuebe.+
26 Ulandakaje* njila wa makasa ebe,+Ne njila yebe yonso neyikale mijalame.
27 Kuinami ku dia balume anyi ku dia bakaji.+
Umbusha makasa ebe ku malu mabi.
Note
^ Anyi “mukenji.”
^ Anyi “tshia kumpala.”
^ Ku mua.: “Inyika ditshi diebe ku.”
^ Ku mua.: “bua musunyi wabu wonso.”
^ Anyi “mêsu ebe adi abalakana.”
^ Anyi pamuapa: “Ukonkonone bimpe.”
