Yehezekele 12:1-28
12 Dîyi dia Yehowa diakalua kabidi kundi, diamba ne:
2 “Muana wa muntu, udi musombele mu nzubu wa bantomboji. Badi ne mêsu bua kumona, kadi kabena bamona to, badi ne matshi bua kumvua, kadi kabena bumvua+ to, bualu badi nzubu wa bantomboji.+
3 Kadi wewe, muana wa muntu, longolola mabuki ebe bua kuya ku babende. Pashishe, udi ne bua kuya ku babende mu munya bobu batangile. Ndaku ku babende umbuka muaba uudi musombele uya muaba mukuabu, bobu batangile. Pamuapa nebajingulule bualu ebu, nansha mudibu nzubu wa bantomboji.
4 Patula mabuki ebe masuika bua kuya ku babende mu munya, bobu batangile, ne pashishe dilolo, udi ne bua kumbuka bu muntu udibu bakuate baya nende ku babende, bobu batangile.+
5 “Tubula disoso mu tshimanu, ne patuilapu bintu biebe,+ bobu batangile.
6 Patshidibu batangile, teka bintu biebe pa dikaya ne patuka nabi mu mîdima. Ubuikile ku mêsu bua kumonyi buloba, bualu ndi nkuvuija tshimanyinu kudi nzubu wa Isalele.”+
7 Ngakenza anu muvuabu bangambile bua kuenza. Mu munya, ngakapatula mabuki anyi bu mabuki a kuya nawu ku babende, ne dilolo ngakatubula disoso mu tshimanu ne tshianza. Pakafiika panshi, ngakapatula bintu bianyi, mubiambule pa dikaya mu mêsu muabu.
8 Mu dinda dîyi dia Yehowa diakalua kabidi kundi, diamba ne:
9 “Muana wa muntu, nzubu wa Isalele, nzubu wa bantomboji, kavuaku mukuebeje ne: ‘Udi wenza tshinyi’ anyi?
10 Bambila ne: ‘Monayi tshidi Mukalenge Mutambe Bunene Yehowa wamba: “Dîyi edi didi ditangila mfumu+ udi mu Yelushalema ne nzubu wa Isalele mujima udi mu tshimenga.”’
11 “Amba ne: ‘Ndi tshimanyinu kunudi.+ Anu bu mundi muenze emu, ke muikalabu mua kubenzela. Nebaye ku babende, nebakuatshibue.+
12 Mfumu udi munkatshi muabu neambule bintu biende pa dikaya ne neumbuke mu mîdima. Yeye neatubule disoso mu tshimanu, neapatuilapu bintu biende.+ Neabuikile ku mêsu bua kamonyi buloba to.’
13 Nemmuele bukondo buanyi, ne yeye neakuatshibue mu bukondo buanyi.+ Pashishe nenye nende mu Babilona, mu buloba bua bena Kasada, kadi yeye kakubumona to; yeye neafuilamu.+
14 Bantu bonso badi bamunyunguluke, bamuambuluishi bende, ne bisumbu biende bia basalayi, nembatangalaje mu nseke yonso;+ nentule muele wanyi wa mvita bua kubipata.+
15 Nebafike ku dimanya ne: meme ndi Yehowa pandi mbamuangalaja munkatshi mua bisamba ne mbatangalaja munkatshi mua matunga.
16 Kadi nengepule ndambu wa kudibu ku muele wa mvita, ku tshiyole tshia nzala ne ku tshipupu, bua bamone mua kuakula bua bienzedi biabu bibi bionso munkatshi mua bisamba muayabu; ne bobu nebafike ku dimanya ne: meme ndi Yehowa.”
17 Dîyi dia Yehowa diakalua kabidi kundi, diamba ne:
18 “Muana wa muntu, udi ne bua kudia diampa diebe ne luzakalu ne kunua mâyi ebe ne dilubakana ne dipampakana.+
19 Ambila bantu ba mu ditunga ne: ‘Monayi tshidi Mukalenge Mutambe Bunene Yehowa wambila bantu badi basombele mu Yelushalema ne mu buloba bua Isalele: “Nebadie diampa diabu ne dipampakana ne nebanue mâyi abu ne buôwa bua bungi, bualu buloba buabu nebushale munda mutupu menemene+ bua tshikisu tshia bantu bonso badi basombelamu.+
20 Bimenga bidi bantu basombele nebibutudibue, ne ditunga nedilue buloba bua munda mutupu;+ ne nenufike ku dimanya ne: meme ndi Yehowa.”’”+
21 Dîyi dia Yehowa diakalua kabidi kundi, diamba ne:
22 “Muana wa muntu, elu ndusumuinu kayi lunudi nalu mu Isalele ludi luamba ne: ‘Matuku adi apita, ne tshikena kumona tshionso tshidi tshilua tshianana’?+
23 Nunku bambila ne: ‘Monayi tshidi Mukalenge Mutambe Bunene Yehowa wamba: “Nengimanyike lusumuinu elu, kabakulutela kabidi bu lusumuinu mu Isalele nansha.”’ Kadi bambila ne: ‘Matuku adi pabuipi,+ ne tshikena kumona tshionso netshikumbane.’
24 Bualu kakuakuikala kabidi tshikena kumona tshia dishima anyi lubuku lua lubombo* mu nzubu wa Isalele nansha.+
25 ‘“Bualu meme Yehowa nengakule. Dîyi dionso dindi ngamba nedikumbane kakuyi dijanguluka nansha dikese.+ Mu matuku ebe,+ wewe nzubu wa bantomboji, nengambe dîyi ne nendikumbaje,” ke mudi Mukalenge Mutambe Bunene Yehowa wamba.’”
26 Dîyi dia Yehowa diakalua kabidi kundi, diamba ne:
27 “Muana wa muntu, mona tshidi bantu ba Isalele bamba:* ‘Tshikena kumona tshidiye umona ntshia matuku a bungi atshidi kumpala kumbukila ku mpindieu, ne yeye udi wamba mêyi a buprofete a matuku atshilualua atshidi kule.’+
28 Nunku bambila ne: ‘Monayi tshidi Mukalenge Mutambe Bunene Yehowa wamba: “‘Kakuena dîyi dianyi nansha dimue diajanguluka to; tshionso tshindi ngamba netshikumbane,’ ke mudi Mukalenge Mutambe Bunene Yehowa wamba.”’”
