Yehezekele 23:1-49
23 Dîyi dia Yehowa diakalua kabidi kundi, diamba ne:
2 “Muana wa muntu, kuvua bakaji babidi bana ba mamu umue.+
3 Bakalua bandumba mu Ejipitu;+ bakaditua mu bundumba katshia ku bunsongakaji buabu. Bakababonda ku mabele abu muomu amu, ne bakababata pa biadi biabu bia bukamama.
4 Mêna abu avua Ohola,* mukulumpe, ne muanabu wa bakaji Oholiba.* Bakalua banyi meme ne bakalela bana ba balume ne ba bakaji. Bua mêna abu, Ohola ke Samalea,+ ne Oholiba ke Yelushalema.
5 “Ohola wakabanga kuenda bundumba+ patshivuaye wanyi meme. Yeye wakalakana bananga bende bavua bamuzukila,+ bena mutumba nende bena Ashû.+
6 Bavua banguvena bavuale bilamba bia dikala dia ble ne bakokeshi bindondi, buonso buabu bansongalume bimpe kumona babande pa tubalu tuabu.
7 Yeye wakatungunuka ne kuenda bundumba ne bana ba balume bonso batambe buimpe ba Ashû, ne wakadinyanga+ ne mpingu ya muendi* ya bavuaye walakana.
8 Kakalekela bundumba buende buvuaye wenda mu Ejipitu to, bualu bavua balale nende ku bunsongakaji buende, bakababata tshiadi tshiende tshia bukamama ne bakamupongoluela majinga abu makole.*+
9 Nunku ngakamufila mu tshianza tshia bananga bende bavua bamuzukila, bana ba Ashû,+ bavuaye walakana.
10 Bakela butaka buende patoke,+ bakakuata bana bende ba balume ne ba bakaji,+ ne bakamushipa ku muele wa mvita. Wakalua ne lumu lubi munkatshi mua bakaji, ne bakamukosela tshibawu.
11 “Pakamona muanabu wa bakaji Oholiba bualu ebu, lukuka luende luakalua lutambe bubi, ne bundumba buende buvua bubi menemene kupita bua yayende.+
12 Yeye wakalakana bena mutumba bende bana ba balume ba Ashû,+ banguvena ne bakokeshi bindondi bavua bavuale bimpe bitambe ne babande pa tubalu, buonso buabu bansongalume bimpe kumona.
13 Pakadinyangaye, ngakamona ne: bubidi buabu bavua balonde njila wa muomumue.+
14 Kadi wakatungunuka ne kuvudija bienzedi biende bia bundumba. Wakamona bantu balume bondola mu tshimanu, bimfuanyi bia bena Kasada biondola ne bilaba dikala dikunze,
15 bavuale mikaba mu tshimono, bikale ne bilamba bijingila ku mitu yabu bilembelele, bikale ne tshimuenekelu tshia bilobo bia mvita, buonso buabu bafuane bena Babilona, balelela mu buloba bua bena Kasada.
16 Wakatuadija kubalakana diakamue pakabamonaye, ne wakabatumina batuadi ba mukenji mu Kasada.+
17 Nunku bana ba balume ba Babilona bakatungunuka ne kulua pa bulalu buende bua dienzela mananga, ne bobu bakamunyanga ne lukuka luabu.* Bobu bamane kumunyanga, yeye* wakumbuka kudibu ne muengu.
18 “Pavuaye utungunuka ne kuditua mu bundumba ne dikamakama ne kushiya butaka buende patoke,+ ngakumbuka kudiye ne muengu, anu bu mumvua* mumbuke kudi muanabu wa bakaji ne muengu.+
19 Wakatungunuka ne kuvudija bienzedi biende bia bundumba,+ uvuluka matuku a ku bunsongakaji buende pavuaye wenda masandi mu buloba bua Ejipitu.+
20 Wakabalakana bu bakaji babanjija ba balume badi ne bitupa bia mubidi bia bulume bu bia mpunda ne badi ne bitupa bia lulelu bu bia kabalu.
21 Wewe wakatamba kujinga tshikadilu tshia bundu tshia ku bunsongakaji buebe mu Ejipitu+ pavuabu bababate tshiadi tshiebe ne mabele a bunsongakaji buebe.+
22 “Nunku Oholiba, mona tshidi Mukalenge Mutambe Bunene Yehowa wamba: ‘Mona, ndi nkujudila bananga bebe+ bauvua* mulekele ne muengu, ne nenkutuminabu bua kukuluishabu bafumina ku nseke yonso,+
23 bana ba balume ba Babilona+ ne bena Kasada+ bonso, ne balume ba mu Pekoda+ ne Shoa ne Koa, pamue ne bana ba balume bonso ba Ashû. Buonso buabu mbansongalume bimpe kumona, banguvena ne bakokeshi bindondi, bilobo bia mvita ne bantu basungula,* bonso babande pa tubalu.
24 Nebakuluishe ne matempu a mvita ne nkata bidi bienza mutoyi, ne tshisumbu tshinene tshia basalayi, ne ngabu munene ne ngabu mukese* ne tshifulu. Nebadilonge bakunyunguluke ku nseke yonso, ne nembapeshe bukokeshi bua kulumbuluisha, nebakulumbuluishe mu mushindu udibu bamone mukumbane.+
25 Nenkuleje tshiji tshindi natshi bua bualu buebe, ne bobu nebakuenzele malu ne tshiji tshikole. Nebakukose diulu ne matshi, ne bantu bebe badi bashala nebafue ku muele wa mvita. Nebaye ne bana bebe ba balume ne ba bakaji, ne bantu bebe badi bashala nebababutule ne kapia.+
26 Nebakuvule bilamba biebe+ ne nebanyenge bilengejilu* biebe bimpe.+
27 Nentuishe tshikadilu tshiebe tshia bundu ne bundumba buebe+ buakatuadijila mu buloba bua Ejipitu+ ku ndekelu. Wewe neulekele kubitangila, ne kuakuvuluka kabidi Ejipitu nansha.’
28 “Bualu mona tshidi Mukalenge Mutambe Bunene Yehowa wamba: ‘Mona, nkadi pa kukufila mu bianza bia baudi mukine, bauvua* mumbuke kudibu ne muengu.+
29 Nebakuenzele malu ne lukinu ne nebangate bintu bionso biudi mutatshile+ ne nebakushiye butaka, kuyi kantu pambidi. Butaka bua masandi ebe budi buenza bundu ne tshikadilu tshiebe tshia bundu ne bundumba buebe nebiedibue patoke.+
30 Nebakuenzele malu aa bualu wakalondakaja bisamba bu ndumba,+ bualu wakadinyanga ne mpingu yabu ya muendi.+
31 Udi mulonde njila wa muomumue ne wa yayebe,+ ne nenteke dikopo diende mu tshianza tshiebe.’+
32 “Mona tshidi Mukalenge Mutambe Bunene Yehowa wamba:
‘Neunue dikopo diondoke ne dialabale dia yayebe,+Ne neulue tshintu tshia kusekabu ne tshia kupetula, dikopo didi diuwule tente.+
33 Dikuatshika dia maluvu ne kanyinganyinga nebikupite bukole,*Dikopo dia buôwa ne kabutu,Dikopo dia yayebe, Samalea.
34 Newikale ne bua kudinua ne kudimana,+ ne kukunya bipese biadi bia diima,Pashishe neupande mabele ebe.
“Bualu meme ke udi muakule,” ke mudi Mukalenge Mutambe Bunene Yehowa wamba.’
35 “Nunku mona tshidi Mukalenge Mutambe Bunene Yehowa wamba: ‘Bu muudi mumpue muoyo ne mubenge kunnemeka ne muoyo mujima,*+ newambule bipeta bia tshikadilu tshiebe tshia bundu ne bia bienzedi biebe bia bundumba.’”
36 Pashishe Yehowa wakangambila ne: “Muana wa muntu, neulumbuluishe Ohola ne Oholiba+ ne neubaleje bienzedi biabu bia muendi anyi?
37 Bobu mbende masandi,*+ ne mashi adi ku bianza biabu. Ki mbende anu masandi ne mpingu yabu ya muendi patupu to, kadi mbapitshishe kabidi bana babu bavuabu bandelele mu kapia bu biakudia bia mpingu yabu.+
38 Kabidi, mona tshidibu bangenzele: Bavua banyange muaba wanyi munsantu mu dituku adi, ne bavua banyange nsabatu yanyi.
39 Bobu bamane kushipa bana babu bu milambu milambula mpingu yabu ya muendi,+ bakabuela muaba wanyi munsantu bua kuwunyanga+ mu diodi dituku adi. Ke tshivuabu benze munda mua nzubu wanyi meme.
40 Bakatumina too ne bantu mutuadi wa mukenji bua kuluabu bafumina kule.+ Pavuabu benda balua, wewe wakuowa mâyi, wewe kupenta mêsu ebe ne kudilengeja ne bilengejilu.+
41 Wakasomba pa bulalu+ buimpe butambe ne mêsa mateka kumpala kuabu,+ pauvua muteke musenga wanyi wa manananshi+ ne manyi anyi.+
42 Mutoyi wa musumba wa bantu bavua kabayi basamisha mutu uvua umvuika muaba au, munkatshi muabu muvua bakuatshiki ba maluvu bavuabu bafume nabu mu tshipela. Bakavuadika bakaji bikanu ku maboko ne bifulu bia butumbi ku mitu yabu.
43 “Pashishe ngakamba bua bualu buende yeye uvua mupungile bua masandi ne: ‘Mpindieu neatungunuke ne kuenda bundumba buende.’
44 Nunku bakatungunuka ne kubuela kudiye anu bu mutu muntu uya kudi ndumba. Ke muvuabu babuele kudi Ohola ne Oholiba, bakaji ba tshikadilu tshia bundu.
45 Kadi bantu bakane nebamulumbuluishe ne dilumbuluisha didi dikumbanangane ne masandi+ ne diela mashi panshi;+ bualu bobu mbakaji bendi ba masandi, ne badi ne mashi ku bianza biabu.+
46 “Bualu mona tshidi Mukalenge Mutambe Bunene Yehowa wamba: ‘Nebabatumine tshiluilu tshia basalayi bua kubavuija tshintu tshidi tshikuatshisha buôwa ne tshintu tshia kupawula.+
47 Tshiluilu tshia basalayi etshi netshibase mabue,+ ne netshibatape ne miele ya mvita. Nebashipe bana babu ba balume ne ba bakaji,+ ne neboshe nzubu yabu ne kapia.+
48 Nentuishe tshikadilu tshia bundu ku ndekelu mu buloba ebu, ne bakaji bonso nebapete kalasa ne kabakutentula tshikadilu tshiebe tshia bundu+ to.
49 Nebakutumine bipeta bia tshikadilu tshiebe tshia bundu ne bia mpekatu yebe mienza ne mpingu yebe ya muendi; nunku neufike ku dimanya ne: meme ndi Mukalenge Mutambe Bunene Yehowa.’”+
Note
^ Diumvuija: “Ntenta wende.”
^ Diumvuija: “Ntenta wanyi udi munda muende.”
^ Tshiambilu tshia mu tshiena Ebelu etshi tshidi mua kuikala tshipetangana ne muaku “tumvi tua nyama” ne mbenze natshi mudimu bua kuleja kapeja.
^ Anyi “masandi.”
^ Anyi “masandi abu.”
^ Anyi “anyima wende.”
^ Anyi “bu muvua anyima wanyi.”
^ Anyi “bavua anyima webe.”
^ Ku mua.: “bantu babikidisha.”
^ Ngabu mukese uvuabu batamba kuambula kudi bedi ba mikete.
^ Anyi “biju.”
^ Anyi “bavua anyima webe.”
^ Ku mua.: “nebikukutshishe.”
^ Ku mua.: “munkupe panyima pebe.”
^ Mmumue ne: masandi a mu nyuma.
