Yehezekele 28:1-26
28 Dîyi dia Yehowa diakalua kabidi kundi, diamba ne:
2 “Muana wa muntu, ambila mulombodi wa Tulo ne: ‘Mona tshidi Mukalenge Mutambe Bunene Yehowa wamba:
“Bualu muoyo webe mmulue ne didibandisha,+ udi utungunuka ne kuamba ne: ‘Meme ndi nzambi.
Ndi musombe mu nkuasa wa bukalenge wa nzambi munkatshinkatshi mua mbuu.’+
Kadi wewe udi anu muntu, kuena nzambi to,Nansha muudi udiumvua mu muoyo webe ne: udi nzambi.
3 Mona! Wewe udi ne meji kupita Danyele.+
Kakuena bualu busokoka nansha bumue budi busokome kuudi.
4 Udi mudivuije mubanji ku meji ebe ne ku dijingulula diebe dia malu,Ne udi utungunuka ne kudibutshila or ne arjan mu bibutshilu biebe.+
5 Bungenda mushinga buebe bupiluke buakakupetesha biuma bia bungi,+Ne muoyo webe wakalua ne didibandisha bua biuma biebe.”’
6 “‘Nunku mona tshidi Mukalenge Mutambe Bunene Yehowa wamba:
“Bu muudi udiumvua mu muoyo webe ne: udi nzambi,
7 Ndi nkutumina bantu ba ku babende bua kukuluisha, tshisamba tshidi katshiyi ne luse ku bisamba bionso,+Ne bobu nebapatuile bulengele bua meji ebe miele yabu ya mvitaNe nebanyange bulengele buebe budi ne butumbi.+
8 Nebakupuekeshe mu dijimba,*Ne wewe neufue lufu lua tshikisu munkatshinkatshi mua mbuu mualabale.+
9 Neutungunuke ne kuambila muntu udi ukushipa ne: ‘Meme ndi nzambi’ anyi?
Newikale anu muntu wetu eu mu tshianza tshia badi bakunyanga, kuakuikala nzambi to.”’
10 ‘Neufue lufu lua bantu badi kabayi batengula ku tshianza tshia bantu ba ku babende,Bualu meme muine ngudi muakule,’ ke mudi Mukalenge Mutambe Bunene Yehowa wamba.”
11 Dîyi dia Yehowa diakalua kabidi kundi diamba ne:
12 “Muana wa muntu, ela kasala* bua bualu bua mukalenge wa Tulo, ne muambila ne: ‘Mona tshidi Mukalenge Mutambe Bunene Yehowa wamba:
“Wewe uvua tshitembelu tshia bupuangane,*Muwule tente ne meji+ ne mulengele tshishiki.+
13 Wewe uvua mu Edene, budimi bua Nzambi.
Uvua mulengeja ne mabue onso a mushinga mukole,Dibue dia ribi, dia topaze, ne dia jaspe;dibue dia krizolite, dia onikse, ne dia jade; dibue dia safire, dia tirkuaze,+ ne dia emerode;Ne bitekelu biawu ne masoso awu bivua bienza ne or.
Bavua baalongolole dituku divuabu bakufuke.
14 Ngakakuteka mukeluba muela manyi udi ubuikila.
Wewe uvua pa mukuna wa tshijila wa Nzambi,+ ne wakendakana munkatshi mua mabue a kapia.
15 Kuvua ne kalema mu njila yebe katshia ku dituku diuvua mufukibueToo ne pakasanganabu dipanga buakane munda muebe.+
16 Bua bungenda mushinga buebe buvule,+Wewe wakuwula tente ne tshikisu, ne wakatuadija kuenza mpekatu.+
Nunku nenkuipate ku mukuna wa Nzambi bu tshintu tshinyanguke ne nenkubutule,+Kule ne mabue a kapia, wewe mukeluba udi ubuikila.
17 Muoyo webe wakalua ne didibandisha bua bulengele buebe.+
Wakanyanga meji ebe bua bulengele buebe budi ne butumbi.+
Nenkuimanshe panshi pa buloba.+
Nenkuvuije tshintu tshia kubandila kumpala kua bakalenge.
18 Bua tshilema tshiebe tshinene ne bungenda buebe bua dishima, wewe udi munyange miaba yebe minsantu.
Nengenze bua kapia kateme munkatshi muebe, ne nekakubutule.+
Nenkushiye butu pa buloba kumpala kua bonso badi bakutangila.
19 Bonso bavua bakumanye munkatshi mua bukua bantu nebashale bakutangile bakatshila.+
Nshikidilu webe nealue mu tshimpitshimpi ne neikale wa dikema,Ne kuakuikalaku kabidi bua kashidi.”’”+
20 Dîyi dia Yehowa diakalua kabidi kundi diamba ne:
21 “Muana wa muntu, tangija mpala webe ku Sidona,+ ne amba mêyi a buprofete amufikila.
22 Udi ne bua kuamba ne: ‘Mona tshidi Mukalenge Mutambe Bunene Yehowa wamba:
“Mona ndi nebe tshilumbu, wewe Sidona, ne nentumbishibue munkatshi muebe;Nunku bantu nebafike ku dimanya ne: meme ndi Yehowa pandi nkumbaja dilumbuluisha kudiye ne ndileja wa tshijila munda muende.
23 Nentume tshipupu munda muende ne mashi neapueke mu misesu yende.
Bantu bashipibue nebakuluke munkatshi muende padi muele wa mvita umuluila ku nseke yonso;Nunku nebafike ku dimanya ne: meme ndi Yehowa.+
24 “‘“Pashishe nzubu wa Isalele kakuikala kabidi munyunguluka kudi tumitshi tua mêba a lulengu ne mêba adi asama,+ bantu badi babenzela malu ne dipetu to; nunku bantu nebafike ku dimanya ne: meme ndi Mukalenge Mutambe Bunene Yehowa.”’
25 “‘Mona tshidi Mukalenge Mutambe Bunene Yehowa wamba: “Pangasangisha kabidi nzubu wa Isalele kumbukila munkatshi mua bukua bantu muvuabu babatangalaje,+ nendileje wa tshijila munkatshi muabu ku mêsu kua bisamba.+ Nunku nebasombe mu buloba buabu+ bumvua mupeshe muena mudimu wanyi Yakoba.+
26 Nebasombamu talalaa,+ nebibake nzubu ne nebadime madimi a tumuma tua mvinyo,+ ne nebasombe talalaa pangakumbaja dilumbuluisha kudi bonso badi babanyunguluke badi babenzela malu ne dipetu;+ nunku nebafike ku dimanya ne: meme ndi Yehowa Nzambi wabu.”’”
Note
^ Anyi “lukita.”
^ Ku mua: “uvua utua tshidikijilu tshitampi.”
^ Anyi “imba musambu wa madilu.”
