Yelemiya 1:1-19
1 Aa mmêyi a Yelemiya* muana wa Hilekiya, umue wa ku bakuidi ba mu Anatota+ mu buloba bua Benyamina.
2 Dîyi dia Yehowa diakalua kudiye mu matuku a Yoshiya+ muana wa Amona,+ mukalenge wa Yuda, mu tshidimu tshia 13 tshia bukokeshi buende.
3 Diakalua kabidi mu matuku a Yehoyakima+ muana wa Yoshiya, mukalenge wa Yuda, too ne ku ndekelu kua tshidimu tshia 11 tshia Sedekiya+ muana wa Yoshiya, mukalenge wa Yuda, too ne pakakuatabu Yelushalema mu ngondo muitanu kuyabu nende ku babende.+
4 Dîyi dia Yehowa diakalua kundi, diamba ne:
5 “Kumpala kua meme kukuenza mu difu, mvua mukumanye,*+Ne kumpala kua wewe kuledibua,* mvua mukujidile.*+
Mvua mukuvuije muprofete kudi bisamba.”
6 Kadi ngakamba ne: “Kaah, Mukalenge Mutambe Bunene Yehowa!
Tshiena mumanye mua kuakula,+ bualu ntshidi anu muana.”*+
7 Ke Yehowa kungambila ne:
“Kuambi ne: ‘Ntshidi anu muana’ to.
Bualu udi ne bua kuya kudi bantu bonso kundi nkutuma,Ne udi ne bua kuamba malu onso andi nkuambila bua kuamba.+
8 Kutshinyi bua tshimuenekelu tshiabu,+Bualu ‘Meme ndi nebe bua kukupandisha,’+ ke mudi Yehowa wamba.”
9 Nunku Yehowa wakolola tshianza tshiende, kulengaye mukana muanyi.+ Pashishe Yehowa wakangambila ne: “Ndi muteke mêyi anyi mukana muebe.+
10 Tangila, ndi mukuteke lelu eu bua wikale ku mutu kua bisamba ne ku mutu kua makalenge, bua kujula ne kushimbula, bua kubutula ne kubumbula, bua kuibaka ne kukuna.”+
11 Dîyi dia Yehowa diakalua kabidi kundi, diamba ne: “Yelemiya, udi umona tshinyi?” Ke meme kuamba ne: “Ndi mmona ditamba dia mutshi wa amande.”*
12 Yehowa wakangambila ne: “Udi mumuenenamu, bualu ndi mutabale bikole bua bualu bua dîyi dianyi bua kudikumbaja.”
13 Dîyi dia Yehowa diakalua kundi musangu muibidi, diamba ne: “Udi umona tshinyi?” Ke meme kuamba ne: “Ndi mmona luesu* lusaba,* ne mushiku walu mutangile ku nord.”
14 Pashishe Yehowa wakangambila ne:
“Dikenga nedipatukile ku nordNedikuate bantu bonso badi mu buloba.+
15 Bualu ‘ndi mbikila mêku onso a makalenge a ku nord,’ ke mudi Yehowa wamba,+‘Ne bobu nebalue; yonso wa kudibu neateke nkuasa wende wa bukalenge
Ku tshibuelelu tshia biibi bia Yelushalema,+Bua kuluisha bimanu biende nseke yonso
Ne bua kuluisha bimenga bionso bia Yuda.+
16 Nemmanyishe mêyi anyi a dilumbuluisha bua bualu buabu bua malu abu mabi onso,Bualu mbandekele,+Ne badi bafuimishila nzambi mikuabu muishi wa mulambu+Ne binamina midimu ya bianza biabu.’+
17 Kadi udilongolole bua kuenza bualu,*Ne udi ne bua kujuka ne kubambila malu onso andi nkuambila bua kuamba.
Kuzakadi bua bualu buabu,+Bua meme tshikuzakeji kumpala kuabu.
18 Bualu lelu ndi mukuvuije tshimenga tshikolesha,Dikunji dia tshiamu tshifiike, ne bimanu bia tshiamu tshia mitaku kudi matunga onso,+Kudi bakalenge ba Yuda ne bakokeshi bende,Kudi bakuidi bende ne bantu ba mu buloba.+
19 Bushuwa bobu nebakuluishe,Kadi kabakukupita bukole* to,Bualu ‘Meme ndi nebe+ bua kukupandisha,’ ke mudi Yehowa wamba.”
Note
^ Diumvuija pamuapa: “Yehowa udi utumbisha.”
^ Ku mua.: “kumpala kua wewe kupatuka mu lukutu.”
^ Anyi “mukuteke ku luseke.”
^ Anyi “mukusungule.”
^ Anyi “nsonga.”
^ Ku mua.: “udi mutabale.”
^ Anyi “luesu lua mushiku munene.”
^ Ku mua.: “ludibu bapudile,” bileja kapia kapepula kadi muinshi.
^ Ku mua.: “suika mukaba mu tshimono tshiebe.”
^ Anyi “kabakukutshimuna.”
