Yelemiya 48:1-47
-
Mêyi a buprofete a bualu buafikila Moaba (1-47)
48 Bua Moaba,+ mona tshidi Yehowa wa biluilu, Nzambi wa Isalele, wamba:
“Diakabi dia Nebo,+ bualu mbamubutule!
Kiyatayima+ mmufuishibue bundu ne mmukuatshibue.
Tshisokomenu tshikole* ntshifuishibue bundu ne ntshitayisha.+
2 Kabena batumbisha kabidi Moaba.
Mbele tshifufu bua dikuluka diende mu Heshebona+ ne:
‘Luayi, tumubutulayi bua kikadi kabidi tshisamba.’
Wewe pebe, Mademene udi ne bua kushala mupuwe,Bualu muele wa mvita udi ukulonda.
3 Kudi mutoyi wa lubila lukole ufumina mu Holonayima,+Mutoyi wa kabutu ne dikuluka dinene.
4 Moaba mmubutudibue.
Bana bende badi badila.
5 Pa kakunakuna ka Luhita badi batungunuka ne kudila padibu benda babanda.
Ne mu njila udi mupueke ufumina ku Holonayima, badi bumvua mbila ya tunyinganyinga bua dikenga.+
6 Nyemayi, pandishayi mioyo* yenu!
Nudi ne bua kulua bu mutshi wa jenevriye mu tshipela.
7 Bu muudi weyemena midimu yebe ne bubanji buebe,Nebakukuate pebe.
Ne nebakuate Kemoshe+ kuyabu nende ku babende,Pamue ne bakuidi bende ne bakokeshi bende.
8 Mubutudi neabuele mu tshimenga ne mu tshimenga,Ne tshimenga nansha tshimue katshiakupanduka.+
Tshibandabanda* netshijimine,Ne buloba bulandakane* nebubutudibue, anu bu mudi Yehowa muambe.
9 Tekelayi Moaba tshimanyinu,Bualu padiye ukuluka mu kabutu, neanyeme,Ne bimenga biende nebilue tshintu tshidi tshikuatshisha buôwa,Kamuyi muntu musombelamu.+
10 Mulawu wikale kudi muntu udi wenza mudimu wa Yehowa ne kalengu!
Mulawu wikale kudi muntu udi ukanda muele wende wa mvita bua kawumatshishi mashi panshi!
11 Bena Moaba ki mbatatshishibue katshia ku bunsonga buabu,Bu mvinyo udi musombe pa bishikishiki.
Ki mbabumbushe mu kapanza babapongoluele mu kakuabu,Ne kabatu banji kubakuata baye nabu ku babende nansha.
Ke bualu kayi muenya wabu mmushale anu muomumue,Ne dipembu diabu ki ndishintuluke to.
12 “‘Nunku, monayi! matuku adi alua,’ ke mudi Yehowa wamba, ‘angatuma bantu bua kubatonkola. Nebabatonkole, nebashiye tupanza tuabu munda mutupu, ne nebatayishe milondo yabu minene bipese bipese.
13 Bena Moaba nebafuishibue bundu bua Kemoshe, anu bu mudi nzubu wa Isalele mufuishibue bundu bua Betele uvua tshieyemenu tshiabu.+
14 Mmunyi munudi nupeta dikima dia kuamba ne: “Tudi bilobo bia mvita, badiakaje bua kuluangana”?’+
15 ‘Moaba mmubutudibue,Bimenga biende mbikuatshibue,+Ne bansongalume bende ba mushinga mukole mbashipibue,’+
Ke mudi Mukalenge, muena dîna dia Yehowa wa biluilu+ wamba.
16 Dikenga dia bena Moaba didi dilua mu katupa kîpi emu,Ne dikuluka diabu didi disemena lukasa luonso.+
17 Bonso badi babanyunguluke nebabumvuile luse,Bonso badi bamanye dîna diabu.
Nubambile ne: ‘Ke mudibu batshibule mutshi wa bukole, dikombo dia bulengele nunku!’
18 Pueka umbuke ku butumbi buebe,Somba panshi ne nyota,* wewe muana wa bakaji udi musombele mu Dibona,+Bualu mubutudi wa Moaba mmulue bua bualu buebe,Ne neabutule miaba yebe mikolesha.+
19 Imana kumpenga kua njila utangile, wewe udi musombele mu Aloê.+
Ebeja mulume udi unyema, ne mukaji udi upanduka ne: ‘Ntshinyi tshidi tshienzeke?’
20 Moaba mmufuishibue bundu ne mmukuatshike buôwa.
Elayi kabobo ka muadi ne dilayi.
Manyishayi mu Ânona+ ne: Mbabutule Moaba.
21 “Dilumbuluisha ndilue mu buloba bulandakane,*+ bua Holona, bua Yahasa,+ ne bua Mefâta;+
22 bua Dibona,+ bua Nebo,+ ne bua Bete-dibelatayima;
23 bua Kiyatayima,+ bua Bete-gamula, ne bua Bete-meona;+
24 bua Keliyota+ ne bua Bosela; ne bua bimenga bionso bia mu buloba bua Moaba bidi kule ne bidi pabuipi.
25 ‘Bukole bua* Moaba mbukoshibue;Mbatshibule diboko diende,’ ke mudi Yehowa wamba.
26 ‘Mukuatshishishayi maluvu,+ bualu mmudibandishe kumpala kua Yehowa.+
Moaba udi udivuandakaja mu bilushi biende,Ne udi tshintu tshia kusekabu.
27 Isalele kavuaku tshintu tshia kuseka kuudi anyi?+
Bavuaku bamusangane munkatshi mua bivi,Bua wewe kukupa mutu webe ne kuakula bibi bua bualu buende anyi?
28 Umbukayi mu bimenga ne sombelayi pa mukuna wa dibue, nuenu badi basombele mu Moaba,Ne nulue bu nyunyi wa nkutshi udi wibakila disua diende ku muelelu wa lupongo.’”
29 “Tudi bumvue lumu lua lutambishi lua Moaba, yeye udi ne didibandisha dia dikema,Lumu lua diambu diende, lutambishi luende, didibandisha diende ne didisua dia muoyo wende.”+
30 “‘Ndi mumanye tshiji tshiende tshikole,’ ke mudi Yehowa wamba,‘Kadi biakulakula biende nebilue tshianana.
Kabakuenza bualu nansha bumue to.
31 Ke bualu kayi nengele kabobo ka muadi bua Moaba,Nendile bua Moaba yonsoNe nengase muadi bua bantu ba mu Kile-helese.+
32 Ne muadi mupite undi ndila Yazê,+Nenkudile, wewe muonji wa tumuma tua mvinyo wa Sibema.+
Ntonga yebe idi isampila mmisabuke mbuu.
Mmifike too ne ku mbuu, too ne ku Yazê.
Pa mamuma ebe a mu muvu wa luya lukole* ne tumuma tuebe tua mvinyo tuudi mupole,Mubutudi mmupuekapu.+
33 Disanka ne musangelu mbiumbushibue mu budimi bua mitshi ya bimuma
Ne mu buloba bua Moaba.+
Ndi muenze bua mvinyo akame ku tshikaminu.
Muntu nansha umue kakudiata tumuma tua mvinyo ne mbila ya disanka.
Mbila ayi neyikale mbila ya mushindu mukuabu.’”+
34 “‘Kudi lubila lufumina ku Heshebona+ luya too ne ku Eleale.+
Badi babandisha dîyi diabu diya too ne ku Yahasa,+Kumbukila ku Soâ too ne ku Holonayima+ ne ku Egelata-shelishiya.
Nansha mâyi a Nimelima neakame.+
35 Nenjimije mu Moaba,’ ke mudi Yehowa wamba,‘Muntu udi uya ne mulambu pa muaba mutumbukeNe muntu udi ulambula nzambi wende milambu.
36 Ke bualu kayi muoyo wanyi newudile* bua Moaba anu bu lushiba,*+Ne muoyo wanyi newudile* bantu ba mu Kile-helese anu bu lushiba.*
Bualu biuma bivuaye mupete nebijimine.
37 Bualu mutu wonso mmukungula,+Ne muedi wonso mmubeya.
Mputa idi pa tshianza tshionso,+Ne tshilamba tshikayabale tshidi mu bimono biabu!’”+
38 “‘Pa misaka yonso ya nzubu ya MoabaNe mu miaba yende yonso ya tshinsangansanga,Kakuena bualu bukuabu, anu kabobo ka muadi.
Bualu ndi mutshibule MoabaBu mulondo mulekela,’ ke mudi Yehowa wamba.
39 ‘Ke mudiye mumvue buôwa nunku! Elayi kabobo ka muadi!
Ke mudi Moaba muele nyima bua bundu nunku!
Moaba mmulue tshintu tshia kuseka,Tshintu tshidi tshikuatshisha bonso badi bamunyunguluke buôwa.’”
40 “Bualu mona tshidi Yehowa wamba:
‘Tangila! Anu bu nyunyi wa mukanku udi upueka lubilu,+Yeye neabalule mapuapua ende pa Moaba.+
41 Nebakuate bimenga,Ne nebakuate miaba yende ya kusokomena.
Mu dituku adi muoyo wa bena mvita ba MoabaNewikale bu muoyo wa mukaji udi pa lulelu.’”
42 “‘Moaba neabutudibue bua kikadi kabidi tshisamba to,+Bualu yeye mmudibandishe kumpala kua Yehowa.+
43 Buôwa ne dijimba ne buteyi bidi kumpala kuebe,Wewe udi musombele mu Moaba,’ ke mudi Yehowa wamba.
44 ‘Muntu udi unyema buôwa bukole neakuluke mu dijimba,Ne muntu udi upatuka mu dijimba neakuatshibue mu buteyi.’
‘Bualu nentumine Moaba tshidimu tshia dinyokibua diabu,’ ke mudi Yehowa wamba.
45 ‘Bantu badi banyema, badi bimana kabayi ne bukole mu mundidimbi wa Heshebona.
Bualu kapia nekapatuke mu HeshebonaNe ludimi lua kapia nelufumine mu Sihona.+
Neloshe mpala wa MoabaNe kabalubalu ka bana ba tshimvundu.’+
46 ‘Diakabi diebe, wewe Moaba!
Bantu ba mu Kemoshe+ mbabutuke.
Mbakuate bana bebe ba balume,Ne bana bebe ba bakaji mbabakuate baye nabu ku babende.+
47 Kadi ku ndekelu kua matuku nensangishe bantu ba Moaba badibu bakuate,’ ke mudi Yehowa wamba.
‘Dilumbuluisha dia Moaba diashikididi apa.’”+
Note
^ Anyi “Muaba mutumbuke udi mukole.”
^ Anyi “anyima.”
^ Anyi “Tshibatabata.”
^ Anyi “mpata udi pa mukuna.”
^ Anyi pamuapa: “pa buloba bume.”
^ Anyi “mpata udi pa mukuna.”
^ Ku mua.: “Lusengu lua.”
^ Anyi “été.”
^ Mmumue ne: lushiba luimba bua kanyinganyinga mu madilu.
^ Anyi “newudiele.”
^ Mmumue ne: lushiba luimba bua kanyinganyinga mu madilu.
^ Anyi “newudiele.”
