Yeshaya 1:1-31
1 Tshikena kumona tshivua Yeshaya*+ muana wa Amoza mumone tshivua tshitangila Yuda ne Yelushalema mu matuku a Uziya,+ a Yotama,+ a Ahaza,+ ne a Hezikiya,+ bakalenge ba Yuda:+
2 Teleja, wewe diulu, ne teya ntema wewe buloba,+Bualu Yehowa mmuakule ne:
“Bana bandi mudiishe ne mukoleshe,+Kadi bobu mbantombokele.+
3 Ngombe mmumanye bimpe udi mumusumbe,Mpunda mmumanye bimpe tshidilu tshia mfumuende;Kadi Isalele ki mmummanye meme* to,+Bantu banyi kabena benza malu ne dijingulula dia malu nansha.”
4 Diakabi dikale kudi tshisamba tshia mpekatu,+Bantu badi banemeshibue bujitu kudi tshilema,Ndelanganyi ya bantu babi, bana banyanguke!
Mbalekele Yehowa;+Mbenzele Wa Tshijila wa Isalele malu kakuyi kanemu;Mbamuele nyima.
5 Mmuaba kayi wanukumabu kabidi panudi nuenda nusakidila buntomboji ku bukuabu?+
Mutu mujima udi usama,Ne muoyo mujima udi ne bubedi.+
6 Kumbukila muinshi mua dikasa too ne ku mutu, kakuena muaba udi kawuyi usama.
Kudi mputa ne mibundabunda ne mputa ya milengu,Ki mbayondope* anyi bayijingile tshilamba anyi bayitekeshe ne mafuta to.+
7 Ditunga dienu ndishale munda mutupu.
Bimenga bienu mbiosha ne kapia.
Bantu ba ku babende mbabutule ditunga dienu ku mêsu kuenu.+
Didi bu buloba buatuke bupawula kudi bantu ba ku babende.+
8 Mbashiye muana wa bakaji wa Siona bu muaba wa kueyema* mu budimi bua tumuma tua mvinyo,Bu mutanda mu budimi bua konkombre,Bu tshimenga tshidibu batshintshimike.+
9 Bu Yehowa wa biluilu kayi mutushile ndambu wa bantu badi bapanduke,Tuvua mua kuikala balue anu bu Sodoma,Ne tuvua mua kuikala bafuanangane ne Amola.+
10 Telejayi dîyi dia Yehowa, nuenu bakokeshi ba tshikisu* ba mu Sodoma.+
Tumayi ntema ku mukenji wa* Nzambi wetu, nuenu bantu ba mu Amola.+
11 Yehowa udi wamba ne: “Milambu yenu ya bungi idi ne dikuatshisha kayi kundi?+
Nkadi mutshioke milambu yenu ya kuosha ya bimpanga bia mikoko+ ne mafuta a nyama midisha bimpe,+Ne tshiena nsanka bua mashi+ a bana ba ngombe+ ne a bana ba mikoko ne a mbuji to.+
12 Panudi nulua bua kumueneka kumpala kuanyi,+Nnganyi udi munulombe bua kuenza bualu ebu:
Bua kudiatakaja mbanza yanyi nunku?+
13 Lekelayi kulua kabidi ne milambu ya ntete ya patupu.
Musenga wenu wa manananshi udi tshintu tshibi kundi.+
Kusekelela kua dibala dia ngondo,+ nsabatu,+ ne kubueja kua masangisha manene,+Tshiena mua kuanyisha dienza dia malu a mupongo+ pamue ne disangisha dienu dinene nansha.
14 Ndi* mukine bibilu bienu bia dibala dia ngondo ne bibilu bienu bia masanka.
Mbilue bujitu kundi;Ndi mutshioke ne dibitangila ne mêsu.
15 Panudi nuolola bianza bienu,Ndi nnusokoka mêsu anyi.+
Nansha munudi nuenza masambila a bungi,+Tshiena nteleja to;+Bianza bienu mbiuwule tente ne mashi.+
16 Owayi mâyi, dikezulayi;+Umbushayi bienzedi bienu bibi ku mêsu kuanyi;Lekelayi kuenza malu mabi.+
17 Longayi mua kuenza malu mimpe, kebayi kulumbuluisha kuakane,+Pingajayi mukengeshanganyi mu njila,Akuilayi manême a muana udi kayi ne tatuende,*Ne lumbuluilayi mukaji mukamba.”+
18 Yehowa udi wamba ne: “Mpindieu, luayi tululamijayi malu pankatshi petu,+
Nansha mudi mpekatu yenu mikunze kunzuu,Neyivuijibue mitoke anu bu neje;+Nansha mudiyi mikunze tshididii bu tshilamba tshikunze,Neyilue mitoke bu miosa ya mikoko.
19 Nuenu bitabe ne bateleje,Nenudie bintu bimpe bia mu ditunga.+
20 Kadi nuenu babenge ne batomboke,Nebanubutule ku muele wa mvita,+Bualu mukana mua Yehowa mmuambe bualu ebu.”
21 Ke mudi tshimenga tshia lulamatu+ tshilue ndumba nunku!+
Uvua muwule tente ne kulumbuluisha kuakane;+Buakane buvua busombele munda muende,+Kadi mpindieu mudi bashipianganyi.+
22 Biamu biebe bia arjan mbikuate manyanu,+Ne maluvu ebe* mmatekesha ne mâyi.
23 Bakokeshi bebe badi ne mutu mukole ne mbadie bulunda ne bivi.+
Yonso wa kudibu mmunange mbuejilu ne udi wipatshila mapa.+
Kabena babingisha bana badi bafuishe batatuabu,*Ne tshilumbu tshia mukaji mukamba katshiena tshifika kudibu nansha.+
24 Ke bualu kayi Mukalenge mulelela, Yehowa wa biluilu,Wa Bukole wa Isalele, udi wamba ne:
“Tangilayi! Nendiumbushile baluishi banyi,Ne nendisombuele kudi bena lukuna banyi.+
25 Nenkudimune tshianza tshianyi bua kukuluisha,Nengengulule manyanu ebe bu mengulula ne buanga bua nsabanga,Ne nengumbushe bukoya buebe buonso.+
26 Nempingaje balumbuluishi bebe bu ku ntuadijiluNe bafidi bebe ba ngenyi bu ku mbangilu.+
Panyima pa bualu ebu nebakubikile ne: Tshimenga tshia buakane, Tshimenga tshia lulamatu.+
27 Nebapikule Siona ne kulumbuluisha kuakane,+Ne bantu bende badi bapingana, nebabapikule ne buakane.
28 Bantomboji ne benji ba mpekatu nebabatshibule tshiapamue,+Ne bantu badi balekela Yehowa nebafike ku ndekelu wabu.+
29 Bualu nebumvue bundu bua mitshi idi ne bukole inudi nujinga,+Ne nenufuishibue bundu bua madimi* anudi nusungula.+
30 Bualu wewe neulue bu mutshi munene udi ne mabeji adi afubidila,+Bu budimi budi kabuyi ne mâyi.
31 Muntu wa bukole nealue tshikamfu,*Ne mudimu wende newulue ditudika dia kapia;Buonso buabi nebilakuke kapia pamueKakuyi udi mua kubijima.”
Note
^ Diumvuija: “Lupandu lua Yehowa.”
^ Anyi “mmumanye mfumuende.”
^ Ku mua.: “mbayikame.”
^ Anyi “katanda.”
^ Anyi “bamfumu.”
^ Anyi “dilongesha dia.”
^ Anyi “Anyima wanyi.”
^ Anyi “muana wa nshiya.”
^ Anyi “maluvu ebe a ntete ya blé.”
^ Anyi “bana ba nshiya.”
^ Bimueneka ne: mmitshi ne madimi bivua mu diumvuangana ne ntendelelu wa mpingu.
^ Mionjonji idi itema kapia.
