Yeshaya 11:1-16
11 Lutonga+ nelupatuke ku tshikuku tshia Yishai,+Ne mutoloku+ wa* ku miji yende newukuame mamuma.
2 Nyuma wa Yehowa neashale pambidi pende,+Nyuma wa meji+ ne wa dijingulula dia malu,Nyuma wa mubelu ne wa bukole,+Nyuma wa dimanya ne wa ditshina dia Yehowa.
3 Yeye neapetele disanka dia bungi mu ditshina dia Yehowa.+
Kakulumbuluisha anu bua malu adi amueneka ku mêsu kuende,Anyi kubela anu bilondeshile malu adi matshi ende umvua to.+
4 Nealumbuluishe bapuekele biakane,*Ne neafile mubelu bua bualu bua bena bupuekele ba pa buloba ne bululame.
Neakume buloba ne mutshi wa mukana muende+Ne neashipe benji ba malu mabi ne mupuya* wa ku mishiku yende.+
5 Buakane nebuikale mukaba mu tshimono tshiende,Ne lulamatu mukaba wa mu tshifuka tshiende.+
6 Mbua wa ditu neasombe bua tshikondo kampanda ne muana wa mukoko,+Ne nkashama nealale pamue ne muana wa mbuji,Ne muana wa ngombe ne ntambue* ne nyama wa manyi nebikale bionso kaba kamue;*+Ne muana mutekete neabilombole.
7 Ngombe mukaji ne nyama wa urse nebidie kaba kamue,Ne bana babi nebalale kaba kamue.
Ntambue neadie bisonsa bu ngombe.+
8 Muana utshidi wamua dibele neanayile pa buina bua nyoka wa kobra,Ne muana ukadi mulekele dibele neateke tshianza tshiende pa buina bua nyoka wa lulengu.
9 Kabiakuenzelangana bibi+Anyi kukebesha tshinyangu mu mukuna wanyi wonso wa tshijila to,+Bualu buloba nebuwule tente bushuwa ne dimanya dia YehowaBu mudi mâyi abuikila mbuu.+
10 Mu dituku adi muji wa Yishai+ newimane bu tshimanyinu* bua bukua bantu.+
Bisamba nebiye kudiye bua kupeta bulombodi,*+Ne muaba wende wa kuikishila neulue wa butumbi.
11 Mu dituku adi Yehowa neolole kabidi tshianza tshiende, musangu muibidi, bua kuangatulula bashadile ba bantu bende badi bashale mu Ashû,+ mu Ejipitu,+ mu Patelosa,+ mu Kushi,+ mu Elama,+ mu Shinâ,* mu Hamate, ne mu bidiila* bia mu mbuu.+
12 Neimanyike tshimanyinu* bua bisamba ne neasangishe ba mu Isalele badi batangalake,+ ne neasangishe pamue ba mu Yuda badi batangalake bumbukila ku ntengu inayi ya buloba.+
13 Mukawu wa Efelayima newikale mujike,+Ne badi baluisha Yuda nebikale bashipibue.
Efelayima kakumvuila Yuda mukawu to,Ne Yuda kakuluisha Efelayima to.+
14 Nebapueke pa mpulumuku ya* bena Peleshete ku ouest;Bonso pamue nebapawule bantu ba ku Est.
Nebolole tshianza tshiabu bua kuluisha* Edome+ ne Moaba,+Ne bena Amona nebalue bantu babu.+
15 Yehowa neapandulule* tshinkonya tshia* mbuu wa bena Ejipitu,+Neakupakaje tshianza tshiende pa mutu pa Musulu.*+
Neawukume mu tusulu tuawu* muanda mutekete ne mupuya* wende udi wosha,Ne neenze bua basabuke ne sandala yabu ku makasa.
16 Nekuikale tshibeba+ tshifumina mu Ashû bua bashadile ba bantu bende badi bashale,+Bu muvuabi bua Isalele mu dituku divuaye mupatuke mu buloba bua Ejipitu.
Note
^ Anyi “lutonga lua.”
^ Anyi “ne buakane.”
^ Anyi “nyuma.”
^ Anyi “muana wa ntambue wa musalala.”
^ Anyi pamuapa: “Ne muana wa ngombe ne ntambue nebidie pamue.”
^ Anyi “Bisamba nebimukebe.”
^ Anyi “mutshi wa tshimanyinu.”
^ Mmumue ne: Babilona.
^ Anyi “bisanga.”
^ Anyi “mutshi wa tshimanyinu.”
^ Ku mua.: “dikaya dia.”
^ Anyi “Nebalabaje bukole buabu pa.”
^ Anyi pamuapa: “neumishe.”
^ Ku mua.: “ludimi lua.”
^ Mmumue ne: musulu wa Pelata.
^ Anyi pamuapa: “Neawabulule mu tusulu.”
^ Anyi “nyuma.”
