Yeshaya 19:1-25
19 Dîyi diamba bua bualu bua Ejipitu didi ne:+
Monayi! Yehowa mmubande pa ditutu didi diya lubilu lukole, udi ulua mu Ejipitu.
Nzambi ya tshianana ya mu Ejipitu neizakale kumpala kuende,+Ne muoyo wa Ejipitu newenguluke munda muende.
2 “Nensake bena Ejipitu bua kuluishangana ne bena Ejipitu,Ne nebaluangane umue ne mukuabu,Muntu yonso uluisha muanabu, uluisha ne muinende,Tshimenga tshiluisha tshimenga tshikuabu, bukalenge buluisha bukalenge bukuabu.
3 Ne nyuma wa Ejipitu neatatakane munda muende,Ne nentatakaje malu adiye mulongolole bua kuenza.+
Nebanyemene kudi nzambi ya tshianana,Kudi bena mupongo wa ntekesha ne kudi bena mbuku ne kudi bambidianganyi ba malu atshilualua.+
4 Nemfile Ejipitu mu tshianza tshia mfumu wa malu makole,Ne mukalenge wa tshikisu neabakokeshe,”+ ke mudi Mukalenge mulelela, Yehowa wa biluilu wamba.
5 Mâyi a mbuu neume,Ne musulu newuminyine ne newukame.+
6 Misulu neyinunke mupuya mubi;Minkoloji ya musulu wa Nile wa mu Ejipitu neyipueke ne neyuminyine.
Malenge ne ndawu nebibole.+
7 Bikunyibua bidi kumpenga kua musulu wa Nile, ku mushiku wa musulu wa Nile,Ne buloba buonso budibu bakune ntete kumpenga kua musulu wa Nile+ nebiume.+
Nebabipepule, ne kabiakuikalaku kabidi to.
8 Ne balobi nebadile,Bantu badi bela ndobo mu musulu wa Nile nebadilakane,Ne badi bela makondo abu pa mâyi nebakepele.
9 Bantu badi benza mudimu ne buanda bua line bupunga+Ne badi benza bilamba bitoke ne tshiamu tshia kuluka natshi bilamba nebafuishibue bundu.
10 Baluki bende ba manda nebazajibue;Bantu bonso badibu bangate ku mudimu nebanyingalale bikole.*
11 Bakokeshi ba Soana+ mbatatakane.
Bafidi ba ngenyi ba meji a bungi ba Palô badi bafila ngenyi idi kayiyi ne mutu.+
Mmunyi munudi mua kuambila Palô ne:
“Ndi muana wa bena meji,Muana wa bakalenge ba kale”?
12 Nunku, bena meji bebe badi penyi?+
Bobu bakuambile bikalabu bamanye tshidi Yehowa wa biluilu mupangadije bua bualu bua Ejipitu.
13 Bakokeshi ba Soana mbenze malu kabayi meji;Bakokeshi ba Nofa*+ mbadingibue;Bamfumu ba bisa biende mbapambuishe Ejipitu.
14 Yehowa mmumuitshikijile nyuma wa tshibuejakaji;+Mbapambuishe Ejipitu mu tshionso tshidiye wenza,Bu muntu mukuatshike udi utetuka mu bilushi biende.
15 Ejipitu kakuikala ne mudimu nansha umue wa kuenza,Nansha bua mutu anyi bua mukila, bua lutonga anyi bua ndawu.*
16 Mu dituku adi Ejipitu nealue anu bu bantu bakaji, uzakala ne utshina bua tshianza tshidi tshikeba kumuenzela bibi tshidi Yehowa wa biluilu mumujudile.+
17 Nunku, buloba bua Yuda nebulue tshintu tshidi tshikuatshisha Ejipitu buôwa. Bobu nebumvue buôwa bukole padibu babutela bua dipangadika didi Yehowa wa biluilu mubangatshile.+
18 Mu dituku adi nekuikale bimenga bitanu mu buloba bua Ejipitu bidi biakula muakulu wa mu Kanâna+ ne biditshipa bua kulamata Yehowa wa biluilu. Nebabikile tshimenga tshimue ne: Tshimenga tshia Diupula.
19 Mu dituku adi nekuikale tshioshelu bua Yehowa munkatshinkatshi mua buloba bua Ejipitu ne dikunji bua Yehowa ku mukalu wabu.
20 Nebikale tshimanyinu ne bujadiki bua Yehowa wa biluilu mu buloba bua Ejipitu; bualu nebadidile Yehowa bua badi babakengesha, ne yeye neabatumine mupandishi, mupandishi munene, wabapandisha.
21 Yehowa neamanyike kudi bena Ejipitu, ne bena Ejipitu nebamanye Yehowa mu dituku adi, nebafile milambu ne mapa, ne nebaditshipe mutshipu kudi Yehowa ne nebawukumbaje.
22 Yehowa neakume Ejipitu,+ umukuma ne umuondopa; ne nebapingane kudi Yehowa, ne yeye neandamune milombu yabu ne neabondope.
23 Mu dituku adi nekuikale tshibeba+ tshifuma mu Ejipitu tshitangile ku Ashû. Nunku Ashû nealue mu Ejipitu, ne Ejipitu neaye mu Ashû, ne Ejipitu neenzele Nzambi mudimu pamue ne Ashû.
24 Mu dituku adi Isalele neikale muisatu pamue ne Ejipitu ne Ashû,+ dibenesha munkatshi mua buloba,
25 bualu Yehowa wa biluilu neikale mubabeneshe, wamba ne: “Ejipitu, tshisamba tshianyi, abeneshibue kabidi ne Ashû, mudimu wa bianza bianyi, ne Isalele, bumpianyi buanyi.”+
Note
^ Anyi “nebanyingalale bikole mu anyima.”
^ Anyi “Mempi.”
^ Anyi pamuapa: “dilala dia dibue anyi dilenge.”
