Yeshaya 25:1-12
25 Wewe Yehowa, udi Nzambi wanyi.
Ndi nkusamuna, ndi ntumbisha dîna diebe,Bualu udi muenze malu a kukema,+Malu malongolola* katshia ku bikondo bia kale,+Mu lulamatu,+ mu kueyemenyibua.
2 Bualu udi muvuije tshimenga mushiki wa mabue,Muvuije tshimenga tshikolesha bikulu bidi bienda bivingutuka.
Tshibumba tshia muntu wa ku babende katshiena kabidi tshimenga to;Kabakutshibakulula kabidi nansha.
3 Ke bualu kayi tshisamba tshia bukole netshikutumbishe;Tshimenga tshia bisamba bia tshikisu netshikutshine.+
4 Bualu udi mulue muaba mukolesha wa kusokomena kudi mupuekele,Muaba mukolesha wa kusokomena kudi mupele mu dikenga diende,+Muaba wa kunyemena mvula wa tshipupu,Ne dileji ku munya mukole.+
Padi ditayika dia bena tshikisu dikale bu mvula wa tshipupu ututa ku tshimanu,
5 Bu luya mu buloba bume,Wewe udi utalaja diyoyo dia benyi.
Anu mudi dileji dia ditutu ditalaja luya,Ke mudibu bakoseshe musambu wa bena tshikisu.
6 Mu mukuna eu+ Yehowa wa biluilu nealongoluele bukua bantu buonsoDidia dia disanka dia biakudia bimpe menemene,+Didia dia disanka dia mvinyo muimpe menemene,*Dia biakudia bimpe menemene biuwule ne buongo bua mu mifuba,Dia mvinyo muimpe menemene mutaata.
7 Mu mukuna eu yeye neumbushe* tshilamba tshidi tshibuikila bukua bantu buonsoNe tshibuikilu* tshidi tshilukila pa bisamba bionso.
8 Neamine* lufu kashidi,+Ne Mukalenge Mutambe Bunene Yehowa neakupule binsonji ku mêsu kua bantu bonso.+
Neumbushe bundu bua bantu bende pa buloba bujima,Bualu Yehowa muine mmuambe bualu ebu.
9 Mu dituku adi nebambe ne:
“Tangilayi! Eu udi Nzambi wetu!+
Tudi bamutekemene,+Ne yeye neatupandishe.+
Eu udi Yehowa!
Tudi bamutekemene.
Tuikalayi ne disanka ne tusankayi bua lupandu lua kudiye.”+
10 Bualu tshianza tshia Yehowa netshikale pa mukuna eu,+Ne Moaba neadiatakajibue mu muaba wende+Bu tshisonsa tshidiatakaja mu mushiki wa tumvi.
11 Neatutamu bianza biendeBu mudi muowedi ututa bianza biende bua kuowela,Ne yeye neapuekeshe didibandisha diende+Ne dinyungisha dipiluke dia bianza biende.
12 Tshimenga tshikolesha, pamue ne bimanu biebe bile bia bukubi,Neatshiele panshi;Neatshikulule mu buloba, mu lupuishi mene.
Note
^ Anyi “Mapangadija.”
^ Anyi “dia mvinyo muladika ndala.”
^ Ku mua. “neamine.”
^ Anyi “tshilamba tshikudika.”
^ Anyi “Neajimije.”
