Yeshaya 3:1-26
3 Bualu tangila! Mukalenge mulelela, Yehowa wa biluilu,Udi umbusha mishindu yonso ya diambuluisha ne ya bintu bidibu bakengela mu Yelushalema ne mu Yuda,Diambuluisha dionso dia biakudia ne mâyi,+
2 Tshilobo ne muena mvita,Mulumbuluishi ne muprofete,+ muena lubuku ne mukulu,
3 Mfumu wa bantu 50,+ muntu wa bunême, ne mufidi wa ngenyi,Muena majimbu wa dilambu ne muena mupongo wa ntekesha mupiluke.+
4 Nemvuije bana ba balume batekete bakalenge babu,Ne bantu badi kabayi bashindame* nebabakokeshe.
5 Bantu nebakengeshangane,Muntu yonso ne muinende.+
Muana wa balume neabunde muntu mukole,Ne muntu udibu balengulule neafunyine udibu banemeka.+
6 Muntu yonso neakuate muanabu wa balume mu nzubu wa tatuende wamba ne:
“Wewe udi ne tshizaku, ikala mututuminyi wa dîyi.
Ikala mutangidi wa mushiki wa bintu bidibu babumbule eu.”
7 Kadi dituku adi yeye neabenge wamba ne:
“Tshiakuikala munondopi wa mputa* to;Tshiena ne biakudia anyi bilamba mu nzubu muanyi nansha.
Kanunteki mutuminyi wa bantu dîyi to.”
8 Bualu Yelushalema mmulenduke,Ne Yuda mmukuluke,Bualu badi baluisha Yehowa ku mêyi ne bienzedi;Badi benza malu ne buntomboji mu mêsu a butumbi buende.*+
9 Tshilunji tshia mpala yabu tshidi tshibatuisha,Ne bobu badi bakula bua mpekatu wabu anu bu Sodoma;+Kabena bakeba bua kumusokoka to.
Diakabi diabu,* bualu badi badikebela dikenga!
10 Ambilayi bantu bakane ne: malu abu neende bimpe;Nebapete difutu bua bidibu benza.*+
11 Diakabi dikale kudi muntu mubi!
Dikenga nedimukuate,Bualu malu adi bianza biende bienze nebamuenzelawu!
12 Kadi bua bantu banyi, bafidi babu ba midimu mikole badi ne tshikisu,Ne bakaji badi babakokesha.
Bantu banyi, balombodi benu badi banulalula,Ne badi batatakaja njila yenu inudi nuyila.+
13 Yehowa udi wangata muaba wende bua kuasa tshilumbu;Udi wimana bua kukosela bukua bantu tshibawu.
14 Yehowa neapite ku tshilumbuluidi ne bakulu ne bakalenge ba bantu bende.
“Nuenu nudi boshe budimi buonso bua tumuma tua mvinyo,Ne bintu binudi bibe bapele bidi mu nzubu yenu.+
15 Mmunyi munudi nupeta dikamakama dia kuzaza bantu banyiNe dia kuvingila mpala ya bapele mu lupuishi?”+ ke mudi Mukalenge Mutambe Bunene, Yehowa wa biluilu ukonka.
16 Yehowa udi wamba ne: “Bu mudi bana ba bakaji ba Siona badibandisha,Benda bele mitu yabu muulu,*Bambishangana ne mêsu abu, batua ngendu bazunzuka,Badidisha bikanu bia mu tupombo tuabu,
17 Yehowa neatue kabidi mutu wa bana ba bakaji ba Siona disama dia mbâmba,Ne Yehowa neashiye mpala yabu tshianana.+
18 Dituku adi Yehowa neumbushe bulengele bua bikanu biabu,Mikaba ya bilamba ya ku mutu ne bilengejilu bidi bibendame,+
19 Tukanu tua ku matshi,* bikanu bia ku maboko, ne bilamba bia kubuikila ku mutu,
20 Bitambala, shene ya mu tupombo, ne bikaba bia pa tshiadi,*Tulondo tua manananshi* ne bijimba,*
21 Tukanu tua ku minu ne tukanu tua ku diulu,
22 Nkanzu ya bibilu, mizabi ya pa mutu, bizaku, ne tubuta,
23 Mmuenu ya ku bianza+ ne bilamba bia line,*Bilamba bia kujingila ku mutu ne bilamba bia kubuikila ku mutu.
24 Pamutu pa mafuta a bome,+ nekuikale mupuya mubole;Pamutu pa mukaba, nekuikale muonji;Pamutu pa nsuki milongolola bimpe, nekuikale dibala;+Pamutu pa tshilamba tshia mushinga mukole, nekuikale tshilamba tshikayabale;+Ne nekuikale nsalu mitapa pamutu pa bulengele bua mpala.
25 Bantu bebe nebakuluke ku muele wa mvita,Ne bilobo biebe nebikuluke mu mvita.+
26 Bibuelelu biende nebidile ne nebikale ne kanyinganyinga,+Ne yeye neasombe panshi kayi tshintu.”+
Note
^ Anyi “badi bakudimuka dîba dionso.”
^ Anyi “munondopi.”
^ Anyi “mu dikalaku diende dia butumbi.”
^ Anyi “dia anyima yabu.”
^ Ku mua.: “Nebadie mamuma a bienzedi biabu.”
^ Ku mua.: “bolole nshingu (mabodi) yabu.”
^ Anyi “Tudibu.”
^ Anyi “mikaba ya bilamba.”
^ Ku mua.: “Nzubu ya anyima.”
^ Anyi “bizubuzubu bia bilengejilu bidi bidila.”
^ Anyi “bilamba bia muinshi.”
