Yeshaya 33:1-24
33 Diakabi diebe, wewe mubutudianganyi udi kayi mubutudibue;+Wewe mutungidianganyi udibu kabayi batungile!
Paudi ujikija kubutulangana, nebakubutule pebe.+
Paudi ujikija kutungilangana, nebakutungile pebe.
2 Yehowa wetu, tulejaku bulenga buebe.+
Ditekemena dietu didi kuudi.
Ulue bukole buetu*+ mu dinda dionso,Eyowa, lupandu luetu mu tshikondo tshia dikenga.+
3 Ku mutoyi wa kayumbayumba, bukua bantu budi bunyema.
Paudi ujuka, bisamba bidi bimuangalaka.+
4 Bu mutu mpasu ya mikumbi idi ibutula idisangisha, ke muasangishabu bintu bienu bidibu banunyenga;Bantu nebadielapu bu bisumbu bia mpasu ya mikumbi.
5 Yehowa neatumbishibue,Bualu yeye mmusombele mu miaba mitumbuke ya muulu.
Neuwuje Siona ne kulumbuluisha kuakane ne buakane.
6 Yeye udi dishindama dia bikondo biebe;Divulangana dia lupandu,+ meji, dimanya, ne ditshina dia Yehowa,+Etshi ke tshiuma tshiende.
7 Monayi! Bilobo biabu bidi bidila mu musesu;Batuadi ba mukenji wa ditalala badi badila bikole menemene.
8 Bibeba mbishale munda mutupu;Kakuena muntu udi wendela mu tujila.
Yeye* mmushipe tshipungidi;Mmubenge bimenga;Kena utua muntu ufuafua mushinga to.+
9 Buloba budi budila* ne bufubidila.
Lebanona mmumvue bundu;+ mmunyanguke.
Shalona mmulue bu tshipela,Bashana ne Kâmele badi batutula mabeji abu.+
10 Yehowa udi wamba ne: “Mpindieu nenjuke,Mpindieu nenditumbishe;+Mpindieu nendipeshe bunême.
11 Nudi nuimita bisonsa biume, nulela nsona.
Nyuma wenu muine neanubutule bu kapia.+
12 Ne bukua bantu nebulue bu bishadile bia lupemba luosha.
Bu mêba makosa, nebabatue kapia.+
13 Nuenu badi kule, umvuayi tshingenza!
Ne nuenu badi pabuipi, itabayi bukole buanyi!
14 Benji ba mpekatu badi mu Siona badi ne buôwa;+Lukanku ndukuate batontolodi:
‘Nnganyi wa kutudi udi mua kusombela muaba udi kapia kadi kabutula?+
Nnganyi wa kutudi udi mua kusomba ne ndimi ya kapia idi kayiyi mua kujima?’
15 Mmuntu udi wenda mu buakane budi kabuyi bujika,+Udi wakula malu malulame,+Udi ubenga dishima, ne bintu bipeta mu mafi,Udi ne bianza bidi bibenga mbuejilu pamutu pa kumubakula,+Udi ujika ditshi diende ku muyuki wa diela dia mashi panshi,Ne udi ukanga mêsu ende bua kubenga kumona malu mabi,
16 Yeye neasombele mu miaba mitumbuke;Tshinyemenu tshiende tshikole* netshikale mu miaba ya kusokomena ya mabue,Nebamupeshe biakudia biende,Ne mâyi ende kaakujika nansha kakese.”+
17 Mêsu ebe neatangile mukalenge mu bulengele buende;Neamone buloba budi kule.
18 Mu muoyo webe neuvuluke* buôwa bukole ne:
“Mufundi udi penyi?
Muntu uvua upima bujitu bua mulambu udi penyi?+
Muntu uvua ubala bungi bua bibumba udi penyi?”
19 Kuakumona kabidi bantu bapange malu to,Tshisamba tshidi ne muakulu mukodiakane* bua kuwumvua,Tshidi ne ngakuilu wa tshikukumina uudi kuyi mua kumvua.+
20 Tangila Siona, tshimenga tshia bibilu bietu!+
Mêsu ebe neamone Yelushalema bu muaba wa kusombela wa bupole,Ntenta udibu kabayi mua kumbusha,+
Kabakutula mpopo ya ntenta wende nansha,Ne kabakukosa muonji nansha umue wa ku mionji yende.
21 Kadi muomu amu Mutambe Bunene, Yehowa,Neikale kutudi buloba bua misulu, bua minkoloji minene ya mâyi,Muikala matu adibu bita ne nkaya* kaayi mua kuyilaNe mazuwa manene kaayi mua kupitshila.
22 Bualu Yehowa udi Mulumbuluishi wetu,+Yehowa udi Mutueledi wa mikenji,+Yehowa udi Mukalenge wetu;+Yeye ke watupandisha.+
23 Mionji yebe neyisuluke;Kayakukuata mutshi wa kusuikila tshilamba tshitubu baludika natshi mazuwa peshi kubalula tshilamba tshia kuludika natshi mazuwa to.
Tshikondo atshi nebabanyangane bintu bia bungi binyenga;Too ne balema nebangate bintu bia bungi bipawula.+
24 Nunku, muntu nansha umue udi musombele mu ditunga kakuamba ne: “Ndi nsama.”+
Nebafuile bantu badi basombele mu ditunga luse bua tshilema tshiabu.+
Note
^ Anyi “diboko dietu.”
^ Bakula bua muluishi.
^ Anyi pamuapa: “buma.”
^ Anyi “Muaba wende mutumbuke mukole.”
^ Anyi “newelangane meji a.”
^ Ku mua.: “muondoke.”
^ Anyi “musangu, tshipu, nkapa.”
