Yeshaya 34:1-17
34 Semenayi pabuipi bua kumvua, nuenu bisamba,Ne teyayi ntema, nuenu bukua bantu.
Buloba ne bionso bidipu biteleje,Buloba ne bionso bidibu bupatula.
2 Bualu Yehowa mmufiikile bisamba bionso munda,+Ne mmukuatshile tshiluilu tshiabu tshionso tshiji tshikole.+
Neabibutule;Neabifile bua babishipe.+
3 Nebimanshe bantu babu badi bashipibue,Ne mupuya mubi wa bitalu biabu newubande muulu;+Mikuna neyenguluke bua bualu bua mashi abu.*+
4 Musumba wonso wa bia mu diulu newubole,Ne nebavunge diulu bu muvungu.
Musumba wabu wonso newufubidile,Bu mudi dibeji difubidile dikuluka ku muonji wa tumuma tua mvinyoNe mfigi mufubidile ukuluka ku mutshi wa mfigi.
5 “Bualu muele wanyi wa mvita newuboleshibue mu diulu.+
Newupueke pa Edome bua kulumbuluisha,+Pa bantu bamvua mufundile kabutu.
6 Yehowa udi ne muele wa mvita; newikale mutote ne mashi.
Newikale mutote ne mafuta,+Ne mashi a bimpanga bia mikoko bitshidi biana ne mbuji,Ne mafuta a tuonyi tua bimpanga bia mikoko.
Bualu Yehowa udi ne mulambu mu Bosela,Dishipa dinene mu buloba bua Edome.+
7 Ngombe ya tshisuku neyipueke nayi,Bana balume ba ngombe pamue ne ngombe ya bukole.
Buloba buabu nebuboleshibue ne mashi,Ne lupuishi luabu neluwule ne mafuta.”
8 Bualu Yehowa udi ne dituku dia disombuela,+Tshidimu tshia kufuta bua tshilumbu tshia bualu bua Siona.+
9 Tusulu tuende* netukudimuke kabudimbu,Ne lupuishi luende nelukudimuke sufre,Ne buloba buende nebulue bu kabudimbu kadi katema kapia.
10 Butuku anyi mu munya kabuakujima to;Muishi wabu newutungunuke ne kubanda kashidi.
Neashale mubutula ku tshipungu ne ku tshipungu tshia bantu;Muntu kakupitshila munda muende kashidi ne tshiendelele.+
11 Nyunyi wa mukuekue ne nkese nebimupiane,Ne bipungulu bia matshi male ne bikololo nebisombele munda muende.
Yeye neolole nshinga wa kupima nende bule wa muaba mutupu pa mutu pendeNe nshinga wa tshiamu tshia plomb wa* kabutu.
12 Kabakubikila muntu wende munene nansha umue mu bukalenge,Ne bakokeshi bende bonso nebalue tshianana.
13 Mêba neatoloke mu bibumba biende bikolesha,Mpesa ne bisonsa bia mêba nebitoloke mu miaba yende mikolesha.
Nealue tshisombedi tshia mibuabua,+Tshipangu tshia nyunyi ya mfiondo.
14 Bifukibua bia mu tshipela nebituilangane ne nyama idi yela mikunda,Ne mbuji wa tshisuku* neele muena diende dîyi.
Eyowa, muomu amu nyunyi wa lubuta neasombelamu ne neapete muaba wa kuikishila.
15 Muomu amu nyoka wa mbuka neenzelamu disua diende ne neelelamu mayi,Ne neaatoye ne neaasangishe mu mundidimbi wende.
Eyowa, muomu amu nyunyi ya tubemba neyidisangishamu, yonso wa kudiyi ne muena diende.
16 Kebulula mu mukanda wa Yehowa ne bala bualu ebu ne dîyi dikole ne:
Nansha umue wa kudiyi kakupangika;Nansha umue wa kudiyi kakupangila muena diende,Bualu mukana mua Yehowa ke mudi mutume dîyi edi,Ne nyuma wende ke udi muyisangishe pamue.
17 Yeye ke udi muyelele nshobo,Ne bianza biende mbipime muaba udibu bayipeshe.*
Neyiwupiane bua kashidi;Neyisombelamu mu bipungu bionso bia bantu.
Note
^ Anyi “Mashi abu neapueke pa mikuna.”
^ Bakula pamuapa bua Bosela, tshimenga tshikulu tshia Edome.
^ Ku mua.: “mabue a.”
^ Anyi pamuapa: “demon udi bu mbuji.”
^ Ku mua.: “mbayabanyinawu ne nshinga wa kupima nende bule.”
