Yeshaya 36:1-22
36 Mu tshidimu tshia 14 tshia mukalenge Hezikiya, Saneheliba mukalenge wa Ashû+ wakabanda bua kuluisha bimenga bikolesha bionso bia mu Yuda ne wakabikuata.+
2 Pashishe mukalenge wa Ashû wakatuma Labashake*+ ne tshiluilu tshinene tshia basalayi bumbukila ku Lakisha+ baya kudi mukalenge Hezikiya mu Yelushalema. Bakimanyina pabuipi ne munkoloji wa mâyi wa dijiba dia ku mutu+ didi mu tshibeba tshia ku budimi bua musukudi wa bilamba.+
3 Pashishe Eleyakima+ muana wa Hilekiya, uvua utangila ba mu nzubu,* mufundi Shebena,+ ne Yoa muana wa Asafa, mufundi wa malu a bukalenge, bakapatuka kuluabu kudiye.
4 Ke Labashake kubambila ne: “Ambilayiku Hezikiya ne: ‘Mona tshidi mukalenge munene, mukalenge wa Ashû, wamba: “Nshindamenu wa tshieyemenu tshiebe udi tshinyi?+
5 Wewe udi wamba ne: ‘Ndi ne mayele ne bukole bua kuluangana nabu mvita,’ kadi mêyi aa mmêyi a patupu. Nnganyi uudi mueyemene bua wewe kupeta dikamakama dia kuntombokela?+
6 Tangila! Wewe udi utekemena dikuatshisha dia dilenge ditshibuke edi, Ejipitu mene, didi mua kutua muntu mu tshianza ne kubuelamu yeye mueyemenaku. Ke mudi Palô mukalenge wa Ejipitu kudi bonso badi bamueyemena.+
7 Wewe mungambile ne: ‘Tudi tueyemena Yehowa Nzambi wetu,’ ki nyeye muena miaba mitumbuke ne bioshelu bidi Hezikiya mumbushe,+ padiye eku wambila Yuda ne Yelushalema ne: ‘Nudi ne bua kuinama kumpala kua tshioshelu etshi’ anyi?”’+
8 Nunku mpindieu, diaku koku lupiku elu ne mfumuanyi mukalenge wa Ashû:+ nenkupeshe tubalu 2 000 ni udi mua kupeta batuendeshi bungi bukumbane.
9 Nunku, mmunyi muudi mua kuipata nansha nguvena umue udi mutambe bukese wa ku bena mudimu ba mukalenge wanyi, paudi eku weyemena Ejipitu bua matempu ne bendeshi ba tubalu?
10 Mpindieu ndi mubande bua kuluisha buloba ebu bua kububutula tshiyi ne dianyisha dia Yehowa anyi? Yehowa nkayende uvua mungambile ne: ‘Banda bua kuluisha buloba ebu ne ububutule.’”
11 Ke Eleyakima ne Shebena+ ne Yoa kuambilabu Labashake+ ne: “Akula koku ne bena mudimu bebe mu muakulu wa tshiena Alama,*+ bualu tudi tuwumvua; kuakudi netu mu muakulu wa bena Yuda mu matshi a bantu badi pa tshimanu to.”+
12 Kadi Labashake wakamba ne: “Mukalenge wanyi mmuntume anu kudi mukalenge wenu ne kunudi bua kuakula mêyi aa anyi? Ki mmuntume kabidi kudi bantu aba badi basombe pa tshimanu, bantu bikala ne bua kudia tumvi tuabu nkayabu ne kunua menyi abu nkayabu pamue nenu anyi?”
13 Pashishe Labashake wakimana, kuelaye dîyi dikole mu muakulu wa bena Yuda,+ wamba ne: “Telejayi dîyi dia mukalenge munene, mukalenge wa Ashû.+
14 Monayi tshidi mukalenge wamba: ‘Hezikiya kanushimi to, bualu kena ukumbana bua kunusungila to.+
15 Kanulekedi Hezikiya unufikisha ku dieyemena Yehowa+ padiye wamba ne: “Yehowa neatusungile bushuwa, ne tshimenga etshi katshiakufidibua mu tshianza tshia mukalenge wa Ashû to.”
16 Kanuteleji Hezikiya to, bualu monayi tshidi mukalenge wa Ashû wamba: “Lengejanganayi nanyi ne difilayi kundi,* yonso wa kunudi neadie tumuma tua ku muonji wende wa tumuma tua mvinyo ne tua ku mutshi wende wa mfigi ne neanue mâyi a mu tshina tshiende tshia mâyi,
17 too ne pandi ndua ne nya nenu mu buloba budi bufuanangane ne buloba buenu,+ buloba bua ntete ne mvinyo mupiamupia, buloba bua mampa ne madimi a tumuma tua mvinyo.
18 Kanuitabi Hezikiya unupambuisha padiye wamba ne: ‘Yehowa neatusungile.’ Nzambi nansha umue wa ku nzambi ya bisamba mmusungilaku buloba buende mu tshianza tshia mukalenge wa Ashû anyi?+
19 Nzambi ya Hamate ne Âpada idi penyi?+ Nzambi ya Sefâwayima idi penyi?+ Mmisungilaku Samalea mu tshianza tshianyi anyi?+
20 Nnganyi munkatshi mua nzambi yonso ya maloba aa udi musungile buloba buende mu tshianza tshianyi, bua Yehowa kusungila Yelushalema mu tshianza tshianyi?”’”+
21 Kadi bakashala bapuwe, kabakamuandamuna dîyi, bualu dîyi divua mukalenge mutume divua ne: “Kanuena ne bua kumuandamuna to.”+
22 Kadi Eleyakima muana wa Hilekiya, uvua ku mutu kua ba mu nzubu,* mufundi Shebena,+ ne Yoa muana wa Asafa, mufundi wa malu a bukalenge, bakalua kudi Hezikiya ne bilamba biabu bipanda, kumuambilabu mêyi a Labashake.
Note
^ Anyi “mfumu wa bafidi ba maluvu.”
^ Anyi “dibalasa.”
^ Anyi “Sulia.”
^ Ku mua.: “Enzayi nanyi dibenesha ne patukayi nulue kundi.”
^ Anyi “dibalasa.”
