Yeshaya 48:1-22
48 Telejayi, nuenu ba mu nzubu wa Yakoba,Nuenu badi badibikila ku dîna dia Isalele+Ne badi bafumine ku mâyi a* Yuda,Nuenu badi baditshipa mu dîna dia Yehowa+Ne badi babila Nzambi wa Isalele,Nansha mudibi kabiyi mu bulelela ne mu buakane.+
2 Bualu badi badibikila ku dîna dia tshimenga tshia tshijila+Ne bakeba dikuatshisha kudi Nzambi wa Isalele,+Muena dîna dia Yehowa wa biluilu.
3 “Malu a diambedi* amvua munuambile kale kale.
Akapatuka mukana muanyi meme,Ne ngakaamanyisha.+
Diakamue ngakangata malu mu bianza, ne kuenzekawu.+
4 Bualu ndi mumanye muudi ne mutu mukole,Ne: nshingu webe ntshijilujilu tshia tshiamu tshifiike ne mpala webe ntshiamu tshia mitaku,+
5 Mvua mukuambile malu aa kale kale.
Kumpala kua kuenzekawu, mvua muenze bua uumvue,Bua wewe kuambi ne: ‘Lupingu luanyi luvua luenze malu aa;Lupingu luanyi lusonga ne lupingu luanyi lua tshiamu* ke yivua mitume dîyi bua enzeke.’
6 Udi mumvue ne mumone malu onso aa.
Kuakumanyisha malu aa anyi?+
Kutuadijila ku mpindieu ndi nkumanyisha malu mapiamapia,+Malu malama masokoka audi kuyi mumanye.
7 Adi afukibua anu mpindieu, ki nkale kale to,Malu auvua kuyi muanji kumvua kumpala kua dituku dia lelu,Bua kuambi ne: ‘Monayi! Nkadi muamanye.’
8 Tòo, kuena mumvue,+ kuena mumanye to,Ne kale matshi ebe kaavua makangula.
Bualu ndi mumanye ne: udi muena tshitungu wa dikema,+Ne badi bakubikila ne: mushipi wa mikenji katshia ku diledibua.+
9 Kadi bua bualu bua dîna dianyi nenkande tshiji tshianyi;+Bua butumbi buanyi meme, nendikande kuudiNe tshiakukushipa to.+
10 Mona! Ndi mukulengeje, kadi ki mbu mudibu balengeja arjan to.+
Ndi mukutete* mu mfulu wa dikenga wa kuenguluila biamu.+
11 Bua bualu buanyi meme, bua bualu buanyi meme nengenze bualu,+Bualu mmunyi mundi mua kulekela banyanga dîna dianyi?+
Tshiena mpesha muntu mukuabu butumbi buanyi nansha.*
12 Nteleja, wewe Yakoba, ne Isalele, undi mubikile.
Meme ndi anu Wa muomumue.+ Ndi wa kumpala; ndi kabidi wa ndekelu.+
13 Tshianza tshianyi meme tshivua tshiase tshishimikidi tshia buloba,+Ne tshianza tshianyi tshia balume tshivua tshibalule diulu.+
Pandi mbibikila, bidi bimana kuulu tshiapamue.
14 Disangishayi pamue, buonso buenu, ne telejayi.
Nnganyi wa munkatshi muabu uvua mumanyishe malu aa?
Yehowa mmumunange.+
Yeye neakumbaje tshidiye musue kuenzela Babilona,+Ne diboko diende nedilue kuluisha bena Kasada.+
15 Meme muine ndi muakule, ne ndi mumubikile.+
Ndi mulue nende, ne njila wende nealubuluke.+
16 Semenayi pabuipi nanyi, ne umvuayi bualu ebu.
Katshia ku tshibangidilu menemene, meme tshiena muakule mu musokoko to.+
Mvuaku katshia ku tshikondo tshivuabu buenzeke.”
Mpindieu, Mukalenge Mutambe Bunene Yehowa mmuntume, kabidi ne* nyuma wende.
17 Mona tshidi Yehowa, Mupikudi webe, Wa Tshijila wa Isalele, wamba:+
“Meme, Yehowa, ndi Nzambi webe,Yeye udi ukulongesha bua diakalenga diebe,*+Yeye udi ukulombola mu njila uudi ne bua kuendela.+
18 Bu wewe nansha muteye ntema ku mêyi anyi!+
Nunku ditalala diebe divua mua kulua anu bu musulu+Ne buakane buebe bu mavuala a mbuu.+
19 Bana* bebe bavua mua kulua ba bungi bu lusengaNe tunkanunuina tuebe bu tutete tua lusenga.+
Dîna diatu kadivua mua kumbushibua anyi kujimijibua kumpala kuanyi nansha.”
20 Patukayi mu Babilona!+
Nyemayi bena Kasada!
Manyishayi bualu ebu ne mbila ya disanka! Bumanyishayi!+
Bumanyishayi too ne ku ntengu ya buloba.+
Ambayi ne: “Yehowa mmupikule muena mudimu wende Yakoba.+
21 Kabavua bumvue nyota pavuaye ubalombola mu miaba ivua munda mutupu.+
Wakabapatuila mâyi mu dibue dinene;Wakapanda dibue dinene ne kupatulamu mâyi a bungi.”+
22 “Kakuena ditalala bua bantu babi,” ke mudi Yehowa wamba.+
Note
^ Anyi pamuapa: “badi bafumine kudi.”
^ Ku mua.: “kumpala.”
^ Anyi “lupingu luanyi lua tshiamu tshiengulula.”
^ Anyi “mukukonkonone.” Anyi pamuapa: “mukusungule.”
^ Anyi “Tshiena ngabanyangana butumbi buanyi ne muntu mukuabu nansha.”
^ Anyi “pamue ne.”
^ Anyi “bua bimpe biebe wewe.”
^ Ku mua.: “dimiinu.”
