Yeshaya 61:1-11
61 Nyuma wa Mukalenge Mutambe Bunene Yehowa udi pambidi panyi,+Bualu Yehowa uvua mungele manyi bua kuambila bena bupuekele lumu luimpe.+
Uvua muntume bua kusuika mputa ya badi ne muoyo musunsuke,Bua kumanyisha dilekedibua kudi badibu bakuateNe dikanguka dinene dia mêsu kudi bena buloko,+
2 Bua kumanyisha tshidimu tshia muoyo mulenga wa* YehowaNe dituku dia disombuela dia Nzambi wetu,+Bua kusamba bonso badi badila,+
3 Bua kupesha badi badila bua Siona,Bua kubapesha tshitambala pamutu pa butu,Mafuta a disanka dikole pamutu pa madilu,Tshilamba tshia butumbi pamutu pa lungenyi lushikile.
Ne nebababikile ne: mitshi minene ya buakane,Bikunyibua bia Yehowa, bua kumutumbisha.*+
4 Nebibakulule bikulu bia kale kale;Nebajule miaba ya kale ivua mishiya munda mutupu,+Ne nebibakulule bimenga bivua bibutula,+Miaba ivua mishale munda mutupu ku tshipungu ne ku tshipungu tshia bantu.+
5 “Benyi nebajuke ne nebalame bisumbu biebe bia mikoko,Ne bantu ba ku babende+ nebikale babidime bebe ne basonji ba mionji yebe ya tumuma tua mvinyo.+
6 Kadi nuenu, nebanubikile ne: bakuidi ba Yehowa;+Nebanubikile ne: bena mudimu ba Nzambi wetu.
Nenudie mabanji a bisamba,+Ne nenuditumbishe bua bualu bua butumbi buabu.*
7 Pamutu pa bundu nenupete bitupa bibidi,Ne pamutu pa dipuekeshibua milongo nebele mbila ne disanka bua tshiabu tshitupa.
Eyowa, nebapiane bitupa bibidi mu buloba buabu.+
Disanka dia tshiendelele nedikale diabu.+
8 Bualu meme, Yehowa, ndi munange kulumbuluisha kuakane;+Ndi nkina buivi ne malu adi kaayi makane.+
Nembapeshe mafutu abu ne lulamatu luonso,Ne nempunge nabu tshipungidi tshia tshiendelele.+
9 Bana* babu nebamanyike munkatshi mua bisamba+Ne ndelanganyi yabu munkatshi mua bukua bantu.
Bonso badi babamona nebabajingulule,Nebamanye ne: bobu badi bana* badi Yehowa mubeneshe.”+
10 Nensankile bikole mu Yehowa.
Meme yonso mujima* nensankile mu Nzambi wanyi.+
Bualu mmumvuadike bilamba bia lupandu;+Mmumvungile mu muzabi* wa buakane,Anu bu musedianganyi udi uvuala tshilamba tshia kujingila ku mutu bu tshia muakuidi,+Ne bu mukaji udibu basela udi udilengeja ne bilenga.
11 Bualu, anu mudi buloba bupatula ntonga yabuNe mudi budimi bumenesha bintu bidibu bakunamu,Ke muikala Mutambe Bunene YehowaMua kutoluesha+ buakane+ ne butumbi kumpala kua bisamba bionso.
Note
^ Anyi “luse lua.”
^ Anyi “kumulengeja.”
^ Anyi “biuma biabu.”
^ Ku mua.: “dimiinu.”
^ Ku mua.: “dimiinu.”
^ Anyi “Anyima wanyi.”
^ Anyi “muzabi wa kawuyi maboko.”
