Yobo 2:1-13
2 Pashishe, dituku diakalua divua bana ba balume ba Nzambi mulelela*+ babuele bua kuimana kumpala kua Yehowa,+ Satana pende wakabuela munkatshi muabu bua kuimana kumpala kua Yehowa.+
2 Nunku, Yehowa wakakonka Satana ne: “Udi ufumina penyi?” Satana wakandamuna Yehowa ne: “Ndi mfumina ku ditambakana eku ne eku pa buloba, ku diendakanapu eku ne eku.”+
3 Yehowa kuambila Satana ne: “Udi mutangile* muena mudimu wanyi Yobo anyi? Kakuena muntu mukuabu udi bu yeye pa buloba. Mmuntu mululame wa muoyo mutoke,*+ udi utshina Nzambi ne wepuka malu mabi. Utshidi anu mulamate bikole ku muoyo wende mutoke,+ nansha muudi unsonsola bua bualu buende+ bua kumubutula* kakuyi bualu.”
4 Kadi Satana wakandamuna Yehowa ne: “Dikoba ku dikoba. Muntu neafile bionso bidiye nabi bua muoyo* wende.
5 Kadi, bua kushintulula malu, olola tshianza tshiebe ne kuma mufuba wende ne musunyi wende, yeye neakudiule bushuwa ku mêsu kuebe.”+
6 Pashishe, Yehowa wakambila Satana ne: “Tangila! Yeye udi mu tshianza tshiebe!* Kadi anu muoyo* wende kuwangatshi to.”
7 Nunku, Satana wakumbuka kumpala* kua Yehowa, kutuaye Yobo biuwuja* bivua bisama bikole+ kutuadijila muinshi mua makasa ende too ne mu lubombo lua mutu wende.
8 Ke Yobo kuangata tshiyoyi bua kudikuanya natshi; ne uvua musombe mu butu.+
9 Ndekelu wa bionso, mukajende kumuambila ne: “Utshidi anu mulamate bikole ku muoyo webe mutoke anyi? Diula Nzambi, ufue!”
10 Kadi yeye wakamuambila ne: “Udi wakula anu bu umue wa ku bakaji badi kabayi ne lungenyi. Tuitabe anu disanka didi difumina kudi Nzambi mulelela katuyi tuitaba kabidi dikenga anyi?”+ Mu malu onso aa, Yobo kakenza mpekatu ne mishiku yende to.+
11 Balunda* basatu ba Yobo bakumvua lumu lua malu makole avua mamukuate, ne yonso wa kudibu wakafumina kuende: Elifaza+ muena Temana, Biledada+ muena Shuhi,+ ne Sofâ+ muena Nâmata. Nunku, bakumvuangana bua kutuilangana bua kuya kukenga ne Yobo ne kumusamba.
12 Pakamumonabu ku bule, kabakamumanya to. Bakatuadija kudila ne dîyi dikole ne kupanda bilamba biabu, bakela lupuishi muulu ne mu mitu yabu.+
13 Pashishe, bakasomba nende panshi matuku muanda mutekete, munya ne butuku. Muntu kakamuambila dîyi, bualu bavua bamone ne: dikenga diende divua dinene bikole.+
Note
^ Ngakuilu wa mu tshiena Ebelu udi uleja banjelu badi bana ba Nzambi.
^ Ku mua.: “mutume muoyo webe kudi.”
^ Anyi “muntu udi kayi mua kubandibua ne mululame.”
^ Ku mua.: “kumumina.”
^ Anyi “anyima.”
^ Anyi “ku bukokeshi buebe.”
^ Anyi “anyima.”
^ Ku mua.: “ku mêsu.”
^ Anyi “mputa mibuwe bibi menemene.”
^ Anyi “Bamanyangana nabu.”
