Yobo 29:1-25
29 Yobo wakatungunuka ne kuakula,* wamba ne:
2 “Meme muikale nansha bu mu ngondo ikadi mipite,Mu matuku avua Nzambi undama,
3 Pavuaye muenze bua muendu wende ukenkeshe pa mutu wanyi,Pangakapitshila mu mîdima ku butoke buende,+
4 Pantshivua ne* bukole buanyi,Patshivua bulunda bua Nzambi bumvuika mu ntenta wanyi,+
5 Patshivua Wa Bukole Buonso muikale nanyi,Pavua bana* banyi bannyunguluke,
6 Pavua makasa anyi mazabika mu manteka,Ne mabue mampongoluele tusulu tua mafuta.+
7 Pamvua ne tshibidilu tshia kupatuka ku tshiibi tshia tshimenga+Ne kusomba muaba wa tshinsangansanga,+
8 Bansongalume bavua bammona, baya ku luseke,*Nansha bantu bakulumpe bavua bajuka, bashala bimane.+
9 Bakokeshi bavua badikanda bua kuakula;Bavua bateka tshianza tshiabu ku mishiku yabu.
10 Mêyi a bantu bende lumu avua apuwa;Ludimi luabu luvua lulamata mu tshilakalaka tshia mukana muabu.
11 Muntu yonso uvua unteleja uvua wakula bimpe bua bualu buanyi,Ne bavua bammona bavua bajadika bualu buanyi.
12 Bualu mvua nsungila mupele uvua udila ukeba diambuluisha,+Pamue ne muana udi mufuishe tatuende ne muntu yonso uvua kayi ne muambuluishi.+
13 Muntu uvua wamba kufua uvua unjingila diakalengele,+Ne mvua musankishe muoyo wa mukaji mukamba.+
14 Mvua muvuale buakane bu tshilamba tshianyi;Kulumbuluisha kuanyi kuakane kuvua bu muzabi* ne bu tshilamba tshia kudijingila ku mutu.
15 Ngakalua mêsu kudi mpofuNe makasa kudi mulema.
16 Mvua tatu kudi bapele;+Mvua ndondolola tshilumbu tshia bantu bamvua tshiyi mumanye.+
17 Mvua ntshibula mbanga ya muenji wa malu mabi+Ne ntula tshivuaye mukuate ku mênu.
18 Mvua ne tshibidilu tshia kuamba ne: ‘Nemfuile mu nzubu muanyi meme,*+Ne matuku anyi neikale mapite bungi bu tutete tua lusenga.
19 Miji yanyi neyilambe too ne mu mâyi,Ne lumuma nelushale butuku bujima ku matamba anyi.
20 Butumbi buanyi budi buvuijibua bupiabupia misangu yonso,Ne buta bua mikete budi mu tshianza tshianyi nebutungunuke anu ne kuasa.’
21 Bantu bavua bateleja ne muoyo kuulu kuulu,Bindila mubelu wanyi talalaa.+
22 Pamvua njikija kuakula, kabavua ne tshikuabu tshia kuamba to;Mêyi anyi avua amata bimpe bimpe* mu matshi abu.
23 Bavua bangindila bu mudibu bindila mvula;Bavua bakangula mukana bikole bu badi bakangula bua mvula ya ndekelu.+
24 Pamvua mbatuila mimuemue, bivua bibakemesha;Bukenke bua mpala wanyi buvua bubakolesha ku muoyo.*
25 Mvua mbaludika bu mfumuabu,Ne mvua bu mukalenge munkatshi mua bisumbu biende bia basalayi,+Bu muntu uvua usamba badi badila.+
Note
^ Ku mua.: “lusumuinu.”
^ Ku mua.: “mu matuku a.”
^ Anyi “bambuluishi.”
^ Ku mua.: “basokoma.”
^ Anyi “muzabi wa kawuyi maboko.”
^ Ku mua.: “mu disua dianyi.”
^ Ku mua.: “amata bu mamata.”
^ Anyi pamuapa: “Kabakabuitshidija butoke bua mpala wanyi to.”
