Yobo 7:1-21
7 “Muoyo wa muntu ufuafua eu pa buloba kawena bu mudimu mukole udibu benzejangana ku bukole anyi?Ne matuku ende kaena bu a muntu udibu bangate ku mudimu anyi?+
2 Bu mupika, yeye udi ujinga dileji ne muoyo mujima;Bu muntu udibu bangate ku mudimu, yeye udi windila difutu diende.+
3 Nunku, mbankosele ngondo ya malu a patupu,Mbambadile matuku a butuku a dikenga.+
4 Pandi ndala panshi ndi ndikonka ne: ‘Nenjuke dîba kayi?’+
Kadi padi butuku bunengakana, ndi ndiela eku ne eku tshiyi dikisha too ne padi dituku dituadija.*
5 Mubidi wanyi mmubuikila kudi bikusu* ne dikatshi dia manyanu;+Dikoba dianyi ndiuwule tente ne disama dia mbâmba ne tufina.+
6 Matuku anyi adi apita lubilu lupite lua mundongo wa muluki wa bilamba,+Ne adi atua ku ndekelu kakuyi ditekemena.+
7 Vuluka ne: muoyo wanyi udi lupepele,+Ne dîsu dianyi kadiakumona diakalenga* kabidi nansha.
8 Dîsu didi dimmona mpindieu kadiakummona kabidi to;Mêsu ebe neankebe, kadi tshiakuikalaku to.+
9 Bu divuba didi dienguluka ne dijimina,Muntu udi upueka mu Lukita* kena upatukamu to.+
10 Kakupingana kabidi ku nzubu kuende,Ne muaba wende kawakumumanya kabidi to.+
11 Nunku, tshiakukanda mukana muanyi to.
Nengakule mu kanyinganyinga kakole ka lungenyi luanyi;Nendilakane mu dikenga dianyi dikole!*+
12 Ndi mbuu peshi nyama munene wa mu mbuuBua wewe kuntekela nsentedi anyi?
13 Pandi ngamba ne: ‘Kalalu kanyi nekansambe;Bulalu buanyi nebungambuluishe bua kukepesha dikenga dianyi,’
14 Ke wewe kunkuatshisha buôwa bukole ne bilotaNe kuntshinyisha ne bikena kumona,
15 Nunku ndi* nsungula difua tshipuidiji,Eyowa, lufu pamutu pa mubidi wanyi eu.*+
16 Ndi nkina muoyo wanyi;+ tshiena musue kushala ne muoyo to.
Undekele, bualu matuku anyi adi anu bu lupepele lua mueyelu.+
17 Muntu ufuafua eu nnganyi bua wewe kumuelela meji,Ne bua wewe kutuma meji ebe* kudiye?+
18 Bua tshinyi udi umukonkonona dinda dionsoNe umuteta dîba dionso?+
19 Kuakumbushaku mêsu kundiNe kundekela mutantshi bule bukumbane bua meme kuminaku mate anyi?+
20 Bingikala muenze mpekatu, mmunyi mundi mua kukuenzela bibi, wewe Mutangidi wa bantu?+
Bua tshinyi udi mumvuije tshintu tshiebe tshia kuasa bintu?
Ndi mulue bujitu kuudi anyi?
21 Bua tshinyi kuena umbuikidilaku dishipa dianyi dia mikenjiNe umfuila luse bua tshilema tshianyi?
Bualu, mu katupa kîpi emu nendale mu lupuishi,+Ne neunkebe, kadi tshiakuikalaku to.”
Note
^ Anyi “too ne mu dinda patshidi panshi pafiike.”
^ Anyi “binya.”
^ Ku mua.: “kadiakumona malu mimpe.”
^ Anyi “ne kanyinganyinga kakole ka anyima wanyi!”
^ Anyi “anyima wanyi.”
^ Ku mua.: “pamutu pa mifuba yanyi.”
^ Ku mua.: “kutuma muoyo webe.”
