•  Mêyi a mbangilu 2

•  Biuma bia mu Dîyi dia Nzambi 3-5

  •  Muyuki 3

  •  Bubanji bua mu Dîyi dia Nzambi 4

  •  Dibala dia Bible 5

•  Difila ku mudimu wa buambi 6-14

  •  Mua kubanga kuyukila ne muntu 7

  •  Dipinganyina muntu 8

  •  Divuija bantu bayidi 9

  •  Umvuija malu audi witabuja 10

  •  Muyuki 11

  •  Malu adi mu midimu 12

  •  Mishindu ya diyisha 13

  •  Diyisha ne filme ne mikanda 14

•  Tuikalayi ne nsombelu wa buena Kristo 15-16

  •  Dilonga dia Bible dia tshisumbu 16

•  Mêyi a ndekelu 17

•  Diela balongi kalumbandi ne dibabela 18

•  Dîba dikosa 19

•  Dikumbula dia mutangidi wa tshijengu 20

•  Lumingu lua mpuilu anyi lua mpungilu 21

•  Lumingu lua Tshivulukilu 22

•  Mutangidi wa tshisangilu tshia Nsombelu ne mudimu wetu 23

•  Mulombodi wa tshisangilu tshia Nsombelu ne mudimu wetu 24

•  Mufidi wa mibelu muambuluishi 25

•  Tulasa tukuabu 26

•  Filme 27

1. Mêyi a kulonda adi mu mukanda eu neambuluishe bantu bonso badi ne midimu mu Tshisangilu tshia Nsombelu ne mudimu wetu. Badi ne bua kubala mêyi a kulonda adi atangila midimu yabu ayi adi mu Mabeji a tshisangilu tshia Nsombelu ne mudimu wetu wa buena Kristo ne mêyi makuabu a kulonda adi kuinshi eku kumpala kua kuyilongolola. Mbimpe kulomba bamanyishi bonso bua bikale badilongolola bua kuenza midimu ya balongi. Bantu bakuabu bakadi badifile bikole mu bisangilu bia tshisumbu badi mua kuyenza pabu bikalabu bitaba malongesha a mu Bible ne bikala nsombelu wabu upetangana ne mikenji ya buena Kristo. Muntu udi kayi muanji kuikala mumanyishi yeye muleje dijinga dia kubanga kuenza midimu mu tshisangilu etshi, Mutangidi wa tshisangilu tshia Nsombelu ne mudimu wetu udi ne bua kukonkonona nende malu malomba, pashishe kumuambila ni mmukumbane. Udi ne bua kukonkonona nende malu au mulongeshi wende wa Bible (anyi muledi wende udi muena Kristo muikalapu). Udi ne bua kukonkonona nende malu malomba a muomumue ne adibu bakonkonona ne muntu udi musue kulua mumanyishi udi kayi muanji kubatijibua.—od nshap. 8 tshik. 8.

2. Munite umue. Lumingu luonso, panyima pa musambu ne disambila bia ntuadijilu, mulombodi wa Tshisangilu tshia Nsombelu ne mudimu wetu neafile kadiosha ka malu adi mu programe wa dituku adi. Neatambe kuimanyina pa malu adi mua kuambuluisha tshisumbu bikole.

  3. Muyuki: Minite 10. Mbafile tshiena-bualu ne plan wa malu manene 2 anyi 3 mu Mabeji a tshisangilu tshia Nsombelu ne mudimu wetu. Muyuki eu ngua kupesha mukulu anyi musadidi wa mudimu udi mukumbane. Programe wa dibala dia Bible dia lumingu alu yeye wa kutuadija mukanda mupiamupia wa mu Bible, nebelele tshisumbu kafilme kadi kumvuija malu a mukanda au. Ngamba-malu udi mua kuleja mudi kafilme aku kapetangana ne tshiena-bualu tshia muyuki. Kadi enze muende muonso bua kumvuija malu manene adibu baleje mu mabeji a tshisangilu au onso. Pikalaku kabidi dîba, umvuije bimfuanyi bidi mu muyuki au bimpe bualu mbielamu bua kukumbajija ngenyi ku malu adiye ne bua kulongesha. Udi mua kutela malu adibu baledile miaba mikuabu owu ambuluisha bua kutata bimpe ngenyi idi mu plan.

 4. Bubanji bua mu Dîyi dia Nzambi: Minite 10. Etshi ntshitupa tshia nkonko ne mandamuna tshienzabu kakuyi mêyi a mbangilu anyi a ndekelu to. Ntshia kuenzabu anu kudi mukulu anyi musadidi wa mudimu mukumbane. Ngamba-malu udi ne bua kuela bateleji nkonko yonso ibidi idimu. Bualu bukuabu, yeye ke wamona ni bidi bikengela kubadisha mvese idibu bafile. Bantu batelaye nebandamune mu sekonde 30 anyi muinshi.

 5. Dibala dia Bible: Minite 4. Mudimu eu nebawenze kudi muanetu wa balume. Mulongi neabale tshitupa tshidibu bamupeshe kayi wamba bualu bukuabu ku ntuadijilu anyi ku ndekelu to. Mulombodi wa tshisangilu neaditatshishe nangananga bua kuambuluisha balongi bua bikale babala malu majalame, mumvuike bimpe, mabala ne mbadilu mupepele, bashindika miaku bimpe, bashintulula dîyi, bikisha miaba idibi bikumbanyine, ne babala bu mutubu bakula pa tshibidilu. Mu bitupa bia kubala abi kudi bidi bile ne bidi bîpi, nanku mbimpe mutangidi wa tshisangilu tshia Nsombelu ne mudimu wetu atabalele wa kupesha mudimu au padiye wenda wabanya midimu.

6. Minite 15. Tshitupa etshi ntshilongolola bua kupetesha bantu bonso mushindu wa kudibidija bua mudimu wa buambi ne bua kuakaja mushindu wabu wa kuyukila ne bantu ne wa kuyisha ne kulongesha. Pikalabi bikengedibua, badi mua kupesha bakulu midimu ya balongi. Mulongi yonso udi ne bua kutumikila dilonga didi mu broshire wa Dilongesha anyi wa Nanga bantu didi mu tuboko ku ndekelu kua mudimu wende mu Mabeji a tshisangilu tshia Nsombelu ne mudimu wetu. Kudi misangu yikalabu bela mudimu wa diyukidilangana mu programe. Mudimu wa nanku ngua kuenzabu kudi mukulu anyi kudi musadidi udi mukumbane.—Bala  tshikoso 15 tshidi tshiakula bua mua kuenza midimu ya diyukidilangana.

 7. Mua kubanga kuyukila ne muntu: Mudimu eu badi mua kuwenza kudi muanetu wa balume anyi wa bakaji. Wawenzabu nende udi ne bua kuikala mulume anyi mukaji nende peshi wa mu dîku diabu. Mulongi ne udibu bayikila nende au badi mua kusomba anyi kuimanyina kuulu. Bua kumanya malu makuabu a tshidi mulongi ne bua kuenza bua mudimu eu ne bua mushindu wa kuyisha, bala  tshikoso 12 ne  13.

 8. Dipinganyina muntu: Mudimu eu badi mua kuwenza kudi muanetu wa balume anyi wa bakaji. Wawenzabu nende udi ne bua kuikala mulume anyi mukaji nende. (km 6/97 dib. 2) Mulongi ne udibu bayikila nende au badi mua kusomba anyi kuimanyina kuulu. Mulongi udi ne bua kuenza dinaya didi dileja tshia kuamba patudi tupinganyina muntu utuvua bayishe musangu wa kumpala. Bua kumanya malu makuabu a tshidi mulongi ne bua kuenza bua mudimu eu ne bua mushindu wa kuyisha, bala tshikoso 12 ne 13.

 9. Divuija bantu bayidi: Mudimu wa mulongi eu badi mua kuwenza kudi muanetu wa balume anyi wa bakaji. Wawenzabu nende udi ne bua kuikala mulume anyi mukaji nende. (km 6/97 dib. 2) Mulongi ne muntu wenzaye nende mudimu eu badi mua kusomba anyi kuimanyina kuulu. Tshitupa etshi ntshia kuenza bu dinaya didi dileja bantu bamane kutuadija dilonga dia Bible, benda balonga. Kabiena bilomba mulongi mêyi a mbangilu anyi a ndekelu to, anu bobu bamulombe bua kutumikila dilonga didi dimulomba bua kuenza nanku. Kabiena anu bikengela kubadisha bikoso bionso ne diyi dikole to, nansha mudibi mua kuenzeka nanku misangu mikuabu.

 10. Umvuija malu audi witabuja: Bobu baleje bua kuenza mudimu eu bu muyuki, badi ne bua kuwenza kudi muanetu wa balume. Bobu baleje bua kuwenza bu dinaya, badi ne bua kuwenza kudi muanetu wa balume anyi wa bakaji. Wawenzabu nende udi ne bua kuikala mulume anyi mukaji nende peshi wa mu dîku diabu. Mulongi udi ne bua kufila diandamuna ditoke dia lukonko ludi luenza tshiena-bualu tshia mudimu au. Akule ne bukalanga buonso. Afile diandamuna adi bilondeshile malu adibu baledile. Mulongi yeye musue udi mua kutela mukanda udi ne malu maledila au anyi kubenga kuwutela.

 11. Muyuki: Mudimu eu badi ne bua kuwenza kudi muanetu wa balume kumpala kua tshisumbu. Muyuki eu wowu muimanyine pa bualu kampanda bua mu tshisakidila tshia A tshia mu broshire wa Nanga bantu, mulongi udi ne bua kuleja mutudi mua kuyisha ne mvese umue anyi ndambu idimu. Tshilejilu, udi mua kuleja dîba dia kubala mvese kampanda, mua kumumvuija ne mua kueleshisha nende muntu meji. Muyuki eu wowu muimanyine pa bualu kampanda bua mu dilongesha dia mu broshire wa Nanga bantu, mulongi udi ne bua kutamba kuleja mutudi mua kutumikila bualu abu mu buambi. Udi mua kufila tshilejilu tshidi mu bualu bua 1 bua mu dilongesha adi anyi biobi bikengela, udi mua kumvuija mvese mikuabu idimu.

  12. Muaba wa kupetela malu: Malu adi mu midimu ya balongi: Mêyi a kulonda adi mu tshikoso etshi ne tshidi tshilonda adi atangila mudimu wa “Mua kubanga kuyikila ne muntu” ne wa “Dipinganyina muntu.” Padibu kabayi baleje tshikuabu tshia kuenza, tshipatshila tshia mulongi ntshia kuambila muntu udiye uyukila nende bulelela bua mu Bible budi bukoke ntema yende, umuambilabu mu mushindu mupepele. Pashishe amushile lukonko luandamunabu musangu walua. Mulongi udi ne bua kusungula bualu budi mukana mua bantu ba mu teritware wabu budi mua kupatula bipeta bimpe. Udi mua kumona ni bidi bikengela kupesha muntu mukanda anyi kumuleja filme wa mu Bintu bietu bia kulongesha nabi. Pamutu pa balongi kukuata malu a mua kuenza dinaya edi ku muoyo, badi ne bua kudibidija bua kumanya mua kuyukila bimpe ne bantu; bu mudi kudibidija bua kumanya mua kubatabalela ne kuakula nabu bu mutubu bakula pa tshibidilu.

  13. Mishindu ya diyisha: Mulongi udi ne bua kulonda mushindu wa diyisha udibu baleje. Mbimpe awulonde bilondeshile nsombelu wa mu teritware wabu. Tshilejilu:

1) Ku nzubu ne ku nzubu: Kuyisha ku nzubu ne ku nzubu nkuyisha ku tshiibi ne ku tshiibi (nansha bikale mpala ne mpala, ku telefone, anyi kufundilangana mikanda) ne nkupinganyina muntu utuvua bayishe ku nzubu ku nzubu au.

2) Padi mpunga umueneka: Eu mmushindu wa kubuelela pa bualu buonso bua tshianana bunudi nuyukila ne muntu bua kumuyisha. Udi mua kumvuija bantu mvese. Badi mua kuikala bena mudimu benu, balongi benu, bena mutumba nebe, bantu badibu banuambule nabu mu mashinyi anyi bantu banudi nuya nabu ku midimu yebe ya buatshia buila.

1. 3) Muaba udi bantu ba bungi: Mushindu eu udi utangila diyisha ne kaditempu, diyisha miaba ya midimu, mu njila, mu mpangu ya bikunyibua ya kuikishila, miaba ya dimanyikila mashinyi, anyi muaba wonso utu bantu ba bungi batuilangana.

 14. Diyisha ne filme ne mikanda: Mulongi udi mua kuyisha ne filme anyi ne mikanda bilondeshile nsombelu wa muntu udiye upeta. Mu mudimu wa mulongi muomu muikale filme anyi yeye musungule filme wa kuleja, kamueledi muntu to, kadi bayukidilangane bua malu adimu.

15. Panyima pa musambu, mu minite 15 idi ilonda ya tshitupa etshi nemuikale mudimu umue anyi ibidi milongolola bua kuambuluisha bateleji bua kutumikila Dîyi dia Nzambi. Kuoku kakuyi bualu bukuabu bumanyisha, nebenze midimu eyi kudi bakulu anyi kudi basadidi ba mudimu badi bakumbane, pa kumbusha majinga a tshisumbu enzabu anu kudi mukulu. Padiku mudimu wa diyukidilangana, muanetu udibu bapeshe mudimu eu udi mua kuela nkonko mikuabu. Mêyi ende a mbangilu adi ne bua kuikala makese bua ashale ne dîba dia kuakula bua ngenyi minene idimu ne bua bateleji bapete dîba dia kuandamuna. Kuoku kuikale tshitupa tshia diela muntu nkonko, mbitambe buimpe bua muntu udibu bela nkonko au akuile kumpala yeye ne mushindu.

  16. Dilonga dia Bible dia tshisumbu: Minite 30. Mudimu eu ngua kupesha mukulu udi mukumbane. (Miaba idi bakulu bungi bushadile, badi mua kuwupesha nansha basadidi ba mudimu badi bakumbane pikalabi bikengela.) Kasumbu ka bakulu ke kadi ne bua kusungula bantu badi bakumbane bua kulombola Dilonga dia Bible dia tshisumbu. Mbimpe bantu banyishilabu abu bikale bamanye mua kulombola dilonga mu mushindu muimpe bua kudijikija pa dîba, kushindika mushinga wa mvese minene, ne kuambuluisha bantu bonso bua kujingululabu dikuatshisha dia malu adibu balonge. Bua kupeta ngenyi ya mua kudilombola, mbimpe babalulule mibelu ya mua kulombola bitupa bia nkonko ne mandamuna idi mu mikanda yetu. (w23.04 dib. 24, kazubu) Malu a kulonga lumingu alu owu mamane kujika, kabiena bikengela kulepakaja dilonga to. Kuoku mushindu, mbimpe balombodi ba dilonga edi ne babadi bikale bashintuluka lumingu luonso. Mulombodi wa tshisangilu tshia Nsombelu ne mudimu wetu yeye mulombe bua kuipidijabu dilonga edi, dîba adi udi udilombola neakebe mushindu wa kudipidija. Udi pamuapa mua kubenga nansha bua kubadisha bimue bikoso.

17. Minite 3. Mulombodi wa tshisangilu tshia Nsombelu ne mudimu wetu neambulule nangananga malu adi ne dikuatshisha anudi nufuma ku dilonga mu tshisangilu. Neafile kabidi kadiosha ka malu a lumingu ludi lulonda. Bikalaku dîba, udi mua kutela mêna a balongi bikala ne midimu lumingu ludi lulonda. Kuoku kakuyi bualu bukuabu buleja, mulombodi udi ne bua kubadila tshisumbu mamanyisha onso a mushinga ne mikanda yonso ya mushinga mu mêyi ende a ndekelu. Mamanyisha a pa tshibidilu (bu mudi a programe wa mudimu wa buambi wa pa tshibidilu ne programe wa disukula anyi dilongolola mu Nzubu wa Bukalenge) ki nga kumanyisha kumpala kua tshisumbu to, kadi nga kulamika ku tshibasa tshia mamanyisha. Bikala dîba difuane kupangika bua kubala mamanyisha anyi mikanda mu minite idibu bashiye bua mêyi a ndekelu, mulombodi udi ne bua kulomba bana betu badi ne midimu mu tshitupa tshia Tuikalayi ne nsombelu wa buena Kristo bua bipidijaku midimu yabu bu mudibi bikengela. (Bala  tshikoso 16 ne  19.) Tshisangilu etshi netshijike ne musambu ne disambila.

18. Panyima pa mudimu wa mulongi yonso, mulombodi wa Tshisangilu tshia Nsombelu ne mudimu wetu udi ne sekonde bungi buipatshila ku munite umue bua kuela mulongi yonso kalumbandi ne kumupesha mibelu miangatshila mu dilonga divuabu bamulombe bua kutumikila. Padi mulombodi utela mudimu wa mulongi, kena ne bua kumanyisha dilonga diatumikilaye to. Kadi udi pamuapa mua kumanyisha dilonga adi padi mulongi ujikija, ne panyima pa yeye mumane kumuela kalumbandi. Udi mua kuleja kabidi malu adi ajadika ne: mulongi mmutumikile mibelu ya mu dilonga adi bimpe anyi kumvuija ne bulenga buonso mudi mulongi ne bua kutabalela kabidi dilonga adi ne bua tshinyi udi ne bua kuditabalela. Mulombodi udi pamuapa mua kuakula kabidi bua malu makuabu adi mamueneke mu mudimu au bikalaye mumone ne: adi mua kuambuluisha mulongi anyi bateleji. Padi bisangilu bijika anyi dîba dikuabu, udi mua kumupesha mibelu mikuabu ya mu broshire wa Nanga bantu, wa Dilongesha anyi ya mu mukanda wa Kalasa ka Mudimu idi itangila dilonga divuabu bamulombe bua kutumikila anyi dikuabu dia tshianana.—Bua kumanya malu makuabu a mudimu wa mutangidi wa Tshisangilu tshia Nsombelu ne mudimu wetu ne wa mufidi wa mibelu muambuluishi, bala  tshikoso 19,  24, ne  25.

    19. Mudimu nansha umue anyi mibelu idi mulombodi wa Tshisangilu tshia Nsombelu ne mudimu wetu ufila kabipitshi pa dîba didibu babikosele to. Mbakosele tshitupa tshionso dîba mu Mabeji a tshisangilu tshia Nsombelu ne mudimu wetu. Nansha nanku, kabiena bikengela kusakidila malu makuabu anu bua ne: dîba adi dionso dijike pikala malu onso mamba mu minite mishadile to. Bena midimu bobu bapitshishe dîba dibakosela, mulombodi wa tshisangilu tshia dituku adi anyi mufidi wa mibelu muambuluishi neabapeshe mibelu muntu pa nkayende. (Tangila  tshikoso 24 ne  25.) Tshisangilu tshijima, kusangisha ne misambu ne masambila, bidi ne bua kuenza dîba dimue ne minite 45.

20. Mu lumingu lua dikumbula dia mutangidi wa tshijengu, bisangilu nebienzeke anu mudibi bifunda mu Mabeji a tshisangilu tshia Nsombelu ne mudimu wetu; kadi nekuikale dishilangana edi: Mutangidi wa tshijengu neenze muyuki wa mudimu mu minite 30 pa muaba wa Dilonga dia Bible dia tshisumbu didi mu tshitupa tshia Tuikalayi ne nsombelu wa buena Kristo. Kumpala kua muyuki wa mudimu, mulombodi wa Tshisangilu tshia Nsombelu ne mudimu wetu neambulule malu adibu balonge dituku adi, neafile kadiosha ka malu a mu programe wa lumingu lualonda, neafile mamanyisha adi akengela kufila, neabale mikanda yonso idi ikengela kubala, pashishe neabikile mutangidi wa tshijengu bua muyuki wa mudimu. Panyima pa muyuki, mutangidi wa tshijengu neajikije bisangilu ne musambu wikalaye musungule. Udi mua kubikila muntu mukuabu bua kuenza disambila dia ndekelu. Mu dikumbula dia mutangidi wa tshijengu, kakuakuenzeka tulasa tukuabu mu muakulu wa tshisumbu to. Kasumbu ka muakulu muenyi kadi mua kuenza koku bisangilu biaku nansha padi mutangidi wa tshijengu ukumbula tshisumbu tshidiku kadisangisha natshi. Tshidibi, bena mu kasumbu aku badi ne bua kupingana bua kudisanga ne tshisumbu tshijima bua kulonda muyuki wa mudimu wa mutangidi wa tshijengu.

21. Mu lumingu elu bisangilu kabiakuenzeka to. Nudi ne bua kumanyisha tshisumbu ne: malu a kulonga mu bisangilu lumingu alu nga muntu yonso kulonga pa nkayende anyi mu dîku.

22. Tshivulukilu tshiotshi tshienzeka dituku dia munkatshi mua lumingu, Tshisangilu tshia Nsombelu ne mudimu wetu katshiakuenzeka to.

23. Kasumbu ka bakulu nekasungule mukulu bua kuikalaye mutangidi wa tshisangilu etshi. Neikale utangila malu bua tshisangilu etshi tshikale tshilongolola bimpe ne tshienzeke bilondeshile mêyi a kulonda aa. Udi ne bua kuikala weleshangana diboko bimpe ne mufidi wa mibelu muambuluishi. Panudi anu nupeta Mabeji a tshisangilu tshia Nsombelu ne mudimu wetu a ngondo kampanda, mutangidi wa Tshisangilu tshia Nsombelu ne mudimu wetu neabanye midimu yonso ya mu tshisangilu tshia munkatshi mua lumingu bua ngondo ibidi. Yeye ke udi kabidi wabanya midimu ya balongi ne idi kayiyi ya balongi ne ya dilombola tshisangilu lumingu luonso kudi balombodi badi kasumbu ka bakulu kasungule. (Bala  tshikoso 3-16 ne  24.) Padiye wabanyina balongi midimu, udi ne bua kutangila bidimu biabu, mamanya abu, ne kutangila kabidi ni badi ne ngakuilu mupepele bua kumvuija tshiena-bualu kampanda. Enze bia muomumue bua midimu mikuabu ya mu tshisangilu etshi. Mudimu wonso badi ne bua kuwufila mbingu yoyi mikese yikale isatu kumpala kua dituku dia kuwenza. Nebapeshe mulongi mudimu mufunda mu kabeji ka Mudimu wa mu tshisangilu tshia Nsombelu ne mudimu wetu wa buena Kristo. (S-89) Kasumbu ka bakulu kadi mua kusungula mukulu mukuabu anyi musadidi wa mudimu bua kumuambuluisha. Kadi anu mukulu ke udibu ne bua kusungula bua kuabanya midimu idi kayiyi ya balongi.

24. Ku lumingu luonso, mukulu umue neikale mulombodi wa Tshisangilu tshia Nsombelu ne mudimu wetu tshionso tshijima. (Mu bisumbu bidi ne bakulu bungi bushadile, badi mua kupesha nansha basadidi ba mudimu badi bakumbane mudimu eu pikalabi bikengela.) Yeye ke udi ne bua kulongolola mêyi a mbangilu ne a ndekelu. Yeye ke udi ubikila kabidi bonso badi ne midimu mu bitupa bionso, ne pikala bakulu kabayi ba bungi mu tshisumbu, udi mua kuenza pende midimu mikuabu kabidi, nangananga midimu idi ilomba anu bua kuleja filme patupu kakuyi bualu bua kuyukidilangana. Mêyi adiye wakula pankatshi pa mudimu ne mudimu wonso mbimpe aambe mu tshikoso menemene. Kasumbu ka bakulu nekakebe mua kusungula bakulu badi bakumbane bua kuenza mudimu eu. Bakulu bakumbane badibu basungula abu nebikale balombodi ba tshisangilu etshi, muntu ne muntu tshiende tshikondo. Bilondeshile mudi tshisumbu tshienu, mutangidi wa Tshisangilu tshia Nsombelu ne mudimu wetu udi mua kulombola tshisangilu etshi misangu ya bungi kupita bakulu bakuabu badi bakumbane. Bikala mukulu kampanda mukumbane bua kulombola Dilonga dia Bible dia tshisumbu, udi mua kuikala kabidi mukumbane bua kulua mulombodi wa tshisangilu etshi. Kadi numanye ne: mbalombe mukulu udi ulombola tshisangilu bua kuela balongi badi benza midimu kalumbandi ne dinanga dionso ne kubapesha mibelu idi mua kubambuluisha biobi bikumbane. Mulombodi udi kabidi ne bua kuenza bua tshisangilu tshijike pa dîba. (Bala  tshikoso 17 ne  19.) Bikala mulombodi musue, ne muaba wowu kuoku mukumbane, badi mua kumutekela mikro mikuabu kumpala aku bua ikale uleja mudimu wonso udi ulonda, padi eku muena mudimu au wenda uya bua kuimana ku tshibasa tshidi ku tshiakuidi. Bia muomumue, mulombodi udi mua kujinga bua kusombela ku mêsa matekela ku tshiakuidi padi mulongi wenza mudimu wa Dibala dia Bible ne mu tshitupa tshia Difila ku mudimu wa buambi. Abi bidi mua kuambuluisha bua kubenga kudia dîba.

25. Kuoku mushindu, mbimpe kupesha mukulu udi ngamba-malu ukadi mumonemone malu mudimu eu. Mudimu wende ngua kupesha bakulu ne basadidi ba mudimu mibelu muntu pa nkayende padibi bikengedibua bua midimu yonso idibu benza mu bisangilu, bu mudi ya bitupa bia mu Tshisangilu tshia Nsombelu ne mudimu wetu, miyuki ya patoke, ne dibala anyi dilombola dia Dilonga dia Tshibumba tshia Nsentedi, peshi Dilonga dia Bible dia tshisumbu. (Bala  tshikoso 19.) Mu tshisumbu muomu muikale bakulu ba bungi badi balongeshi ne bangamba-malu bapiluke, badi mua kuenza bua ku tshidimu tshionso mukulu mukuabu udi mukumbane enze pende mudimu eu. Kabiena anu bikengela ikale ufila mibelu panyima pa mudimu wonso to.

26. Bilondeshile bungi bua balongi, tshisumbu tshidi mua kulongolola tulasa tukuabu bua balongi kuenzamu midimu. Nudi ne bua kuteka mufidi wa mibelu mukumbane mu kalasa konso kibidi, nangananga mukulu. Biobi bikengedibua, nudi mua kutekamu nansha musadidi wa mudimu udi mukumbane. Kasumbu ka bakulu ke kasungula muntu udi mukumbane bua kuenza mudimu eu ne kumona ni bidi bikengela ikale ushintulukangana ne bantu bakuabu. Mufidi wa mibelu eu neaye ne malu anu mudibu baumvuije mu  tshikoso 18. Kuoku kuikale tulasa tuibidi, nulombe balongi badimu ne midimu bua kuyamu panudi nujikija mudimu wa Bubanji bua mu Dîyi dia Nzambi wa mu tshitupa tshia Biuma bia mu Dîyi dia Nzambi. Nebapingane mu tshibambalu tshinene panyima pa mudimu wa ndekelu wa mulongi.

27. Nekuikale filme kampanda ya malu a mu tshisangilu etshi. Nenuikale nupetela filme ya tshisangilu tshia munkatshi mua lumingu eyi mu programe wa JW Library®, anyi ku diambuluisha dia biamu bishilashilangane.

© 2023 Watch Tower Bible and Tract Society of Pennsylvania

S-38-SH 11/23