Bua tuetu kuenza mudimu bimpe ne bukole buetu, mbimpe tudifundile bipatshila bia mu nyuma. (1Ko 9:26) Bipatshila bitudi tudifundila ke biatuambuluishe bua kuenza mudimu bimpe ne dîba didi ditushadile kumpala kua nshikidilu wa ndongoluelu eu kuluaye. (Ef 5:15, 16) Nudi mua kuyukila mu ntendelelu wenu wa mu dîku bua malu anudi mua kukumbaja mu tshidimu tshia mudimu tshipiatshipia. Bua kunuambuluisha, mbele mu mabeji a tshisangilu aa bimue biena-bualu bidi biakule bua bipatshila kampanda binudi mua kuelela meji ne kubiambila Yehowa mu disambila.​—Yak 1:5.

Tshilejilu, bena mu dîku bonso badi mua kumvuangana bua bambuluishe muena mu dîku diabu nansha umue bua kuluaye mpanda-njila wa pa tshibidilu. Nuenu numona ne: pamuapa kanuakukokesha bua kukumbaja mêba malomba, nudi mua kulomba mibelu kudi bampanda-njila badi pabu ne nsombelu wa buena wenu. (Nsu 15:22) Pamuapa nudi nansha mua kubikidisha mpanda-njila kampanda mu ntendelelu wenu wa mu dîku bua kumuela imue nkonko. Pashishe funda programe webe pa dibeji. Biwikala ukavua muenze kabidi bumpanda-njila kale, mbimpe kukonkonona nsombelu webe bua umanye ni udi mua kuangatulula kabidi mudimu eu.

Muena mu dîku dienu udiku mua kuangata bumpanda-njila buambuluishi bua ngondo umue anyi mene ya bungi anyi? Wewe ne bukole bukese, udi pamuapa mua kukokesha bua kuenza bumpanda-njila buambuluishi uyisha mêba makese dituku dionso. Wewe kuyi ne dîba dia kuyisha munkatshi mua lumingu bua muutu wenza mudimu mu dinda too ne dilolo anyi bualu udi mulongi, pamuapa udi mua kuangata bumpanda-njila ngondo inudi mu dikisha anyi ngondo idi ne matuku a Disambombo atanu ne a Dia lumingu atanu. Funda ku kabala matuku ngondo iudi musue kuenza bumpanda-njila buambuluishi, wenze ne programe webe.​—Nsu 21:5.

NUTANGILE FILME WA IKALA NE DIKIMA WEWE . . . MPANDA-NJILA, PASHISHE NUANDAMUNE LUKONKO ELU:

• Tshivua tshifikile muanetu Aamand ntshikulongeshe tshinyi bua mushindu udi Yehowa munange ne utabalela bana betu badi badifile bua kuenza bumpanda-njila?