Mpungilu yetu ya ku tshidimu itu itusankisha bikole bua tshinyi? Anu muvuabi mu Isalele wa kale, mpungilu yetu itu itupetesha mpunga wa kutendelela Yehowa pamue ne bena Kristo netu binunu ne binunu. Tudi tusanka bua malongesha bungi tshianana adi akolesha bulunda buetu ne Yehowa. Tudi tusanka kabidi bua dîba ditudi tupitshisha ne balunda betu ne bena mu mêku etu. Dianyisha ditudi nadi ke didi ditusaka bua kubuelamu matuku onso asatu.

Patudi tupeta mpunga wa kudisangisha ne bana betu nanku, ki mbimpe tuetu kuela meji anu a bituapetamu to, kadi tukebe kabidi mutudi mua kubaleja dinanga. (Gal 6:10; Eb 10:24, 25) Tudi tuleja mutudi tutabalela malu a bakuabu patudi tukanguilaku bana betu tshiibi, anyi tulama miaba ya kusomba anu itudi nayi dijinga. (Flp 2:3, 4) Mu mpungilu tudi kabidi ne mpunga ya kupeta balunda bapiabapia. Tudi mua kukeba bua kumanyangana ne bena Kristo netu bakuabu kumpala anyi panyima pa mpungilu peshi pa mêba a dikisha. (2Ko 6:13) Bulunda abu budi mua kushalaku kashidi! Kupita bionso, padi bantu bakuabu bamona mutudi tulejangana dinanga mu tshienzedi, badi mua kuangata pabu dipangadika dia kutendelela Yehowa pamue netu.​—Yne 13:35.

NUTANGILE FILME WA MPUNGILU WA BANTU BAFUMINE MU MATUNGA A BUNGI WA “DINANGA KADIENA DISHIKILA NANSHA”!, PASHISHE NUANDAMUNE NKONKO EYI:

• Mmunyi muvuabu baleje bana betu bavua baye mu mpungilu wa bantu bafumine mu matunga a bungi wa 2019 dinanga?

• Dinanga ne buobumue bua bantu ba Yehowa bidi bikemesha bua tshinyi?

• Bena mu Kasumbu kaludiki bavua batambe kuakula bua bibadi kayi bia dinanga dia buena Kristo?

• Mmunyi muvua dinanga dia bena Kristo netu ditshimune mu Allemagne ne mu Corée du Sud?

• Mbimpe tudisuike bua kuenza tshinyi?