Tudi pa buloba budi bantu bamba tshidi tshimpe ne: ntshibi, tshidi tshibi ne: ntshimpe. (Yes 5:20) Bia dibungama, kudi bantu badi benza malu adi Yehowa mukine; mu bantu abu mudi badi benzelangana malu a mananga ne balume anyi bakaji nabu. Mu tulasa, balongi anyi bantu bakuabu badi mua kutuadija kusaka bana betu bua kulonda dikasa diabu. Mmunyi muudi mua kulongolola bana bebe bua kutantamena bualu ebu anyi mateta makuabu a mushindu eu?

Enza bua bana bebe bamanye mikenji ya Yehowa. (Lew 18:3) Padibu benda bakola, wikale wenda ubambila tshidi Bible wamba bua disangila. (Dut 6:7) Diebeja ne: ‘Nkadi mulongeshaku bana banyi mishindu miakanyine ya kulejangana dinanga, mushinga wa kuikala ne mvuadilu wa bupuekele, ne mudibu mua kuenza bua bakuabu banemeke bumuntu buabu anyi? Bana banyi mbamanyaku tshia kuamba padibu basua kubaleja malu a porno, anyi babasaka ku dienza bualu budibu bamanye ne: Yehowa mmubukine anyi?’ Kubalongesha kumpala kua dîba kudi mua kubepula ku ntatu ya bungi. (Nsu 27:12; Mbi 7:12) Paudi ulongesha bana bebe, udi uleja ne: udi munange bumpianyi bua mushinga mukole budi Yehowa mukupeshe abu.​—Mis 127:3.

NUTANGILE FILME WA IBAKA NZUBU WASHALAKU KASHIDI​—KUBA BANA BEBE KU “MALU MABI,” PASHISHE NUANDAMUNE NKONKO EYI:

• Bua tshinyi baledi bakuabu batu babenga kulongesha bana babu malu a disangila?

• Bua tshinyi bidi bikengela baledi bakoleshe bana babu “ne mibelu ne didimuija bia Yehowa”?​—Ef 6:4

• Mbintu kayi bidi bulongolodi bua Yehowa bupatule bua kuambuluisha baledi bua balongeshe bana babu malu a disangila?​—w19.05 12, kazubu

• Bua tshinyi mbimpe kuikala kuyukila ne bana bebe kumpala kua ntatu mikole kubakuatayi?