Tshisangilu tshia mudimu wa buambi ne bikuabu bionso bia tshisumbu mbia kudi Yehowa. Bidi bituambuluisha bua kusakangana ku dinanga ne ku bienzedi bimpe. (Eb 10:24, 25) Tshisangilu tshia mudimu wa buambi tshidi ne bua kuenza minite 5 anyi 7. Anu mu minite ayi ke mudibu ne bua kulonga bantu mu tusumbu, kubapesha teritware, ne kuenza disambila. (Tshiotshi tshienzeka panyima pa tshisangilu tshikuabu, tshidi ne bua kuikala tshîpi menemene.) Mbimpe mulombodi alongolole lungenyi ludi mua kuambuluisha bantu bayisha dituku adi. Tshilejiu, tshisangilu tshiotshi tshienzeka mu Disambombo, ne bikalabi ne: bantu ba bungi kabavua bayishe katshia ku Disambombo anyi Dia lumingu dishale, mbimpe nulejangane tshia kuambila muntu mu buambi patupu. Mbiena-bualu kayi bikuabu bidi mua kutuambuluisha bitudi mua kuyukilangana?

• Mua kuyukila ne bantu mu Mabeji a tshisangilu tshia nsombelu ne mudimu wetu wa buena Kristo

• Mua kubuelela pa bualu budi buenzeke anyi pa ngumu kampanda bua kutuadija kuyukila ne muntu

• Tshia kuambila muntu udi ukupangisha bua kumuyisha bu mutubi bienzeka muaba unudi

• Mua kuandamuna muntu udi kayi witabuja ne: Nzambi utuku, muntu udi witabuja ne: bintu mbidienzekele, muntu udi wakula muakulu mukuabu, anyi muntu wa mu tshitendelelu tshidi katshiyi nangananga muaba unudi

• Mua kuyisha ne bintu bidi mu site wa jw.org, mu JW Library^®, anyi ne Bible

• Mua kuyisha ne tshimue tshia ku bia mudimu bidi mu Bintu bietu bia kulongesha nabi

• Mua kuyisha mu mushindu kampanda musunguluke, bu mudi kuyishila ku telefone, kufundilangana mikanda, kuyisha muaba udi bantu ba bungi, kupinganyina bantu, anyi kulombola malonga a Bible

• Malu a kuvuluka bua kudikuba, kuyisha muntu bilondeshile nsombelu wende, kuikala ne bukalanga, kumona malu mu buimpe, anyi bualu bukuabu bua muomumue

• Dilongesha anyi filme wa mu broshire wa Difila ku dibala ne ku dilongesha

• Mua kukankamija unudi nuyisha nende ne kumuambuluisha

• Mvese udi upetangana ne mudimu wa buambi anyi bualu kampanda buvua muntu mupete mu buambi budi bukankamija bantu