Mu katupa kîpi emu lutulu ludi nalu Yehowa bua ndongoluelu wa malu eu nelushikile. Nebabutule ntendelelu wa dishima, bisamba bidisange nebibunde bantu ba Nzambi, ne Yehowa neabutule bantu babi ku Armagedone. Bena Kristo mbindile ne muoyo kuulu kuulu bua kumona malu a dikema aa.

Mu bulelela katuena bamanye malu onso a dikenga dinene ne mu katoba to. Tshilejilu, katuena bamanye dîba dijalame diatuadijadi to. Katuena bamanye malu amba bakokeshi ba panu abasaka bua kuluisha bitendelelu to. Katuena bamanye ne: bisamba nebibunde bantu ba Nzambi tshikondo bule kayi anyi malu ikale mua kuenzeka dîba adi to. Katuena nansha bamanye mushindu mujalame wikala Yehowa mua kubutula bantu babi ku Armagedone to.

Nansha nanku, mu Bible badi batuambila malu onso a mushinga atudi ne bua kumanya bua tuikale ne dishindika ne dikima bua malu enzeka kumpala eku. Tshilejilu, tudi bamanye ne: tukadi ku ndekelu kua “matuku a ku nshikidilu.” (2Tm 3:1) Kabidi ne: “nebakepeshe” matuku a tshikondo tshiabundabu bitendelelu bua kababutudi ntendelelu mulelela to. (Mat 24:22) Tudi bamanye ne: Yehowa neasungile bantu bende. (2Pt 2:9) Tudi bamanye kabidi ne: Muntu udi Yehowa musungule bua kubutula bantu babi ku Armagedone ne kukuba bena musumba munene mmuntu muakane udi ne bukole bua bungi.​—Bua 19:11, 15, 16.

Malu enzeka kumpala eku neikale bushuwa mua ‘kushipesha bantu bipuka bua buôwa.’ Kadi patudi tubala bua bienzedi bia Yehowa bia lupandu bia kale ne bua bidiye mutumanyishe bua matuku atshilualua ne tubielela meji, tudi ‘tuimana tendee, tujula mitu yetu muulu,’ bajadike ne: dipikudibua dietu dikadi pabuipi.​—Luk 21:26, 28.