Mukanda wa Bible utulongesha ne wa Bible ulongesha idi mumue. Mbiamu bia mudimu bidi ne malongesha malelela a muomumue ne malondangane kabidi mu mushindu wa muomumue. Kadi mu mukanda wa Bible utulongesha kamuena malu mapitepite bungi to. Mbawenze bua badi ne lutatu lua kumvua malu adi mu wa Bible ulongesha. Pamutu pa bisakidila, mbafunde note ku ndekelu kuawu idi ne mumvuija mapepele a imue miaku ne biambilu bidi mu bikoso. Nshapita idimu kayena ne nkonko ku ntuadijilu anyi ne kazubu ka diambulula to. Kadi, ku ndekelu kuayi mbambe mu tshikoso malongesha malelela a mu Bible adi mumvuija mu nshapita. Anu mutubi bua mukanda wa Bible ulongesha, tudi mua kupesha bantu mukanda wa Bible utulongesha dîba dionso nansha kawuyi mu mikanda ya kufila ngondo au. Mmunyi mutudi mua kulongesha bantu malu a pa buawu adi mu mukanda wa Bible utulongesha patudi tulombola dilonga dia Bible?

MU TSHIKOSO: Bua ba bungi, mushindu ututu tulonga Bible ne bantu, babala bikoso mu mukanda wa Bible ulongesha pashishe tubela nkonko newikale muimpe be. Kadi biobi ne: mulongi wa Bible ki mmumanye muakulu bimpe anyi kayi mumanye kubala bimpe. Mulongi wa nunku tudi mua kulonga nende malu adibu bambe mu tshikoso ku ndekelu kua nshapita ya mu mukanda wa Bible utulongesha, kadi kumulomba bua adibadile nkayende a munda mua nshapita. Tudi mua kuikala tulongesha muntu tshitupa tshia bulelela bua mu Bible tshionso mu minite mitue ku 15. Bu mudi malu adibu bambe mu tshikoso aa kaayi ne tumalu tuonso tudi mu nshapita, mulongeshi udi ne bua kudilongolola bimpe, muikale ne majinga a mulongi mu lungenyi. Yeye mujikije kulonga nshapita ne mulongi, udi mua kuenza diambulula ne malu adibu bambe mu tshikoso au.

MAMANYISHA A KU NDEKELU: Miaku ne biambilu bidibu bumvuije mu note mbabifunde bilondeshile mudi nshapita milondangane. Mulongeshi ke wamanya ni bidi bikengela kukonkonona note kampanda mu dilonga diabu dia mukanda wa Bible utulongesha.