TUIKALAYI NE NSOMBELU WA BUENA KRISTO
Tuakajayi nyishilu wetu—Lenga muoyo wa mulongi ne mukanda wa “Nudilame mu dinanga dia Nzambi”
MUSHINGA: Bua bantu kutendelelabu Yehowa mu mushindu udiye wanyisha, badi ne bua kulonga mikenji yende ne kuyitumikila. (Yes 2:3, 4) Mukanda wa “Dinanga dia Nzambi,” mmukanda muibidi ututu tulongesha nawu bantu Bible udi ubambuluisha bua kujingulula mudi mêyi manene a Nzambi atangila nsombelu wabu wa matuku onso. (Eb 5:14) Tudi ne bua kudienzeja bua kulenga mioyo ya balongi patudi tubalongesha bua badiumvue nkayabu basakibue bua kushintuluka.—Lom 6:17.
TSHIA KUENZA:
-
Dilongolola bimpe, wikale ne majinga a mulongi webe mu meji. Umuele nkonko bua kumusaka ku dileja wende mmuenenu ne mudiye udiumvua bua malu adiye ulonga.—Nsu 20:5; be 259
-
Nuikale nukonkonona tuzubu tudimu bua mulongi amone mushinga wa kutumikila mêyi manene a mu Bible
-
Ambuluisha mulongi webe bua ikale welangana meji mu malu adi atangila kuondo ka muoyo, kadi kumuangatshidi mapangadika nansha.—Gal 6:5
-
Keba ne budimu buonso bua kumanya bikala mulongi webe dijinga ne diambuluisha bua kutumikila amue mêyi manene a mu Bible. Umukankamije ne bulenga buonso bua dinanga diende dia Yehowa dimusake ku dishintuluka.—Nsu 27:11; Yne 14:31
