Fuanyikija ne: udi musombele mu Galela mu tshikondo tshia Yezu. Udi muye ku Yelushalema bua kusekelela Tshibilu tshia Bitanda. Tshimenga ntshiuwule tente ne batendeledi ba Nzambi badi bafume ntanta mile. Udi musue kufila webe mulambu kudi Yehowa. Nunku udi wasa luendu ne mbuji webe musuika ku muonji mutangile ku ntempelo, wenda usambakena ne bisumbu bia bantu mu njila ya mu tshimenga. Paudi ufika, udi usangana ntempelo muwule ne bantu badi basue pabu kufila milambu. Mpindieu dîba diebe dia kupesha bakuidi mbuji webe didi dikumbana. Dîba adi udi uvuluka ne: muanenu udi pamuapa munkatshi mua bantu amu anyi muaba mukuabu udi nebe tshilumbu. Yezu udi uleja tshiudi ne bua kuenza. (Bala Matayi 5:24.) Mmunyi muudi wewe ne muanenu uudi munyingalaje mua kukeba ditalala anu mudi Yezu muleje? Mu tutoba tudi tulonda etu, sungula diandamuna didi dimpe.

UDI NE BUA . . .

• kuyukila ne muanenu anu paudi umona ne: udi ne bualu bulelela budiye mufiikile munda

• kuenza bua kuakaja lungenyi lua muanenu wewe mumone ne: yeye utu ufiika munda nansha bua tumalu tukese, anyi ne: yeye ke udi muenze bibi

• kuteleja muanenu ne lutulu luonso padiye wakula, nansha wewe kuyi mumvue bimpe bidiye wamba, umulomba luse ne muoyo mujima bua mudi bualu abu bumutonde anyi bua malu mabi adi bienzedi biebe bikebeshe auvua kuyi mutekemene

MUANENU UDI NE BUA . . .

• kukuatshila bantu bakuabu mu tshisumbu bua muudi mumuenzele bibi

• kukutandisha, ukuleja kalu ne kalu konso ka bubi buebe, ne ukuenzeja bua witabe tshilema tshiebe

• kuitaba ne: bivua bikengela wikale ne budipuekeshi ne dikima bua wewe kuyukila nende, ne ukufuila luse ne muoyo mujima

Nansha mutudi katutshiyi tufila milambu ya nyama mu ntendelelu wetu lelu, ntshinyi tshivua Yezu mulongeshe bua diumvuangana didi pankatshi pa kukeba ditalala ne bena Kristo netu ne ntendelelu udi Nzambi wanyisha?