MUSHINGA: Bikala ‘meji a mu muoyo wa muntu bu mâyi male,’ nkonko yoyi idi bu mbeketshi bua kuasuna. (Nsu 20:5) Nkonko idi ituambuluisha bua kubueja batudi tuyukila nabu mu muyuki. Nkonko misungula bimpe idi yambuluisha bua mututeleji apatule tshitudi tujinga. Yezu uvua wela nkonko bimpe. Mmunyi mutudi mua kumuidikija?

TSHIA KUENZA:

• Ela nkonko bua muntu aleje wende mmuenenu. Yezu wakela nkonko milondangane bua kumanya mmuenenu wa bayidi bende. (Mat 16:13-16; be 238 §3-5) Nnkonko kayi iudi mua kuela bua muntu aleje mmuenenu wende?

• Ela nkonko bua muntu apatule tshiudi ujinga. Bua Yezu kulongolola ngelelu wa meji wa Petelo, wakamuela nkonko ivua mimufikishe ku difila mandamuna avuaye ukeba. (Mat 17:24-26) Nnkonko kayi iudi mua kuela muntu bua kumuambuluisha bua kufika ku diandamuna diudi ukeba?

• Ela muntu uudi uyukila nende kalumbandi. Panyima pa mufundi kampanda mumane ‘kuandamuna ne meji,’ Yezu wakamuela kalumbandi. (Mâk 12:34) Muntu uudi uyukila nende yeye mufile diandamuna, mmunyi muudi mua kumuela kalumbandi?

NUTANGILE TSHITUPA TSHIA KUMPALA TSHIA FILME WA ENZA MUDIMU UVUA YEZU MUENZE: LONGESHA, PASHISHE NUANDAMUNE NKONKO EYI:

• Bua tshinyi tshilejilu etshi katshiena tshifila dilongesha dimpe nansha mudi bualu buikale bulelela?

• Bua tshinyi katuena ne bua kuimanyina anu pa diumvuija bualu patupu?

NUTANGILE TSHITUPA TSHIBIDI TSHIA FILME EU, PASHISHE NUANDAMUNE NKONKO EYI:

• Bua tshinyi tudi mua kuamba ne: muanetu eu uvua muele nkonko mu mushindu muimpe?

• Mmalu mimpe kayi makuabu avuaye muenze pavuaye ulongesha atudi mua kuidikija?