TUIKALAYI NE NSOMBELU WA BUENA KRISTO
Tungunuka ne kuindila ne muoyo mujima ne dinanukila
Kukadi bidimu bungi kayi katshia windila bua Bukalenge bua Nzambi bulue? Udi anu wenda unanukila ne lutulu nansha mudi nsombelu mukole anyi? (Lom 8:25) Kudi bena Kristo badibu bakine, babenzela malu mabi, babela mu maloko, anyi babashipa. Bakuabu ba bungi badi batantamena ntatu bu mudi masama a munanunanu anyi ntatu ya bukulakaja.
Ntshinyi tshidi mua kutuambuluisha bua kuindila ne muoyo mujima nansha tuetu mu ntatu ya mushindu kayi? Tudi ne bua kubala Bible dituku dionso ne kuelangana meji a bitudi tubala bua kukolesha ditabuja dietu. Tudi ne bua kutuishila mêsu ku ditekemena dietu. (2Ko 4:16-18; Eb 12:2) Tudi ne bua kusengelela Yehowa mu disambila ne kumulomba bua atuambuluishe ne bukole bua nyuma wende muimpe. (Luk 11:10, 13; Eb 5:7) Tatu wetu wa dinanga udi mua kutuambuluisha bua “kunanukila tshishiki ne lutulu ne disanka.”—Kls 1:11.
NUMONE FILME WA TUDI NE BUA ‘KUNYEMA NE DINANUKILA’: IKALA MUTUISHIBUE NE: NEUPETE DIFUTU, PASHISHE NUANDAMUNE NKONKO IDI ILONDA EYI:
-
“Malu adi kaayi matekemena” adi mua kutufikila mmalu kayi? (Mbi 9:11)
-
Mmunyi mudi disambila dituambuluisha patudi mu mateta?
-
Bituikala katutshiyi mua kuenza malu a bungi mu mudimu wa Yehowa bu kumpala, bua tshinyi tudi ne bua kuimanyina pa atudi mua kuenza?
-
Tangija mêsu ebe ku difutu
Ntshinyi tshidi tshikuambuluisha bua kushala mutuishibue ne: neupete difutu?
