Mu dia 23 ngondo 3, netubikile bantu batue ku miliyo 12 anyi bapite apu bua kubuela mu Tshivulukilu. Nebalonge malu mimpe a dikema pikala ngamba-malu ne bua kuakula bua dipa dia tshia kupikula natshi didi Yehowa mufile ne bua amue masanka atuadiladi bantu. (Yes 11:6-9; 35:5, 6; 65:21-23; Yne 3:16) Kadi ki n’ngamba-malu nkayende udi ne bua kulongesha mu tshikondo tshia pa buatshi etshi to. Tuetu bonso tudi ne bua kueleshangana nende diboko pa kuakidila benyi betu ne musangelu. (Lom 15:7) Mona amue malu atudi mua kuenza.

• Pamutu pa tuetu kuya kusomba muaba wetu bindile bua muyuki kutuadijawu, tuakidile benyi ne bana betu bakavua balekele kubuela mu bisangilu ne tubele muoyo ne disanka

• Nansha muudi ne bua kutabalela bikole bantu bauvua wewe mubikile, udi kabidi mua kutabalela bantu bakuabu badi balue bua kampanye ka dibikila bantu katuvua benze. Ulombe bapiabapia bua basombe nebe pamue, ubale nabu mvese mu Bible webe ne wimbe nabu misambu mu mukanda webe wa misambu

• Padi muyuki ujika, ikala mudiakaje bua kuandamuna nkonko ya bantu. Bikala dîba dikese bualu tshisumbu tshienu tshidi ne bua kushila tshisumbu tshikuabu muaba, numvuangane ne muntu au bua wewe kuya kumutangila panyima pa matuku makese. Wewe kuyi mumanye mushindu unudi mua kupetangana nende, udi mua kumuebeja ne: “Ndi musue kumanya tshiudi wamba bua muyuki wa lelu eu. Kadi netupetangane bishi?”