Bipupu bia bungi bidi bienzeka lelu eu. Padi tshipupu tshienzeka, bidi bikengela kulongolola malu ne kualombola bimpe bua kuambuluisha baditshi tshikuate. Ke bualu kayi, Kasumbu kaludiki nkenze bua kuikale Tshibambalu tshia diambuluishangana mu bipupu mu Betele yonso.

Patu bana betu ba mu tshibambalu etshi bumvua ne: tshipupu ntshienzeke, diakamue batu babikila bakulu ba muaba au bua kumanya mudibu mua kuambuluisha bamanyishi. Bintu biobi binyanguke bikole kakuyi mushindu wa bamanyishi kudilongoluelabi, filiale neasungule bana betu bapiluke bua kulombola mudimu wa diambuluisha au. Bana betu abu badi mua kulomba bua babapeshe bena budisuile anyi bintu kampanda bisunguluke, peshi badi mua kusumba bintu anu muaba au ne kubiabanyina bana betu.

Kuenza malu mushindu eu nkuimpe bua malu a bungi. Kudi kuambuluisha bua kuepuka dienza mudimu wa tshidimudimu, kuepuka tshibuejakaji, ne dinyangakaja dia makuta ne bintu. Bidi mua kuenzeka nanku bana betu bobu badienzela malu nkayabu.

Bana betu badi filiale usungula badi mua kukosa bungi bua makuta adi akengela ne bungi bua bena budisuile benzabu nabu mudimu au. Badi kabidi mua kumanyangana ne bakokeshi ba muaba au. Bakokeshi aba badi mua kuenza bua midimu yetu yikale yenzeka lukasa. Nunku bantu kabena mua kusangisha makuta, anyi kutumina bakuabu bintu bia kubambuluisha nabi, peshi kuya muaba udi tshipupu tshienzeke au padibu kabayi babalombe bua kuenza nanku to.

Patu bipupu bienzeka, tutu anu basue kuambuluisha bantu. (Eb 13:16) Tutu banange bena Kristo! Tshia kuenza ntshinyi? Bualu bua mushinga menemene butudi mua kuenza nkusambila bua bana betu badi tshipupu tshiakuate ne bua badi babambuluisha. Tudi kabidi mua kufila makuta bua mudimu wetu wa buloba bujima. Ku bulombodi bua Kasumbu kaludiki, betele ke itu itangila bua kumanya bimpe muaba udi makuta au mua kuambuluisha bikole menemene. Tuetu basue kuambuluisha mu midimu ayi, tudi mua kuwuja formilere wa Demande d’admission comme volontaire local développement/construction (DC-50) bua bamanye ne: tudi basue kuambuluisha.

NUTANGILE FILME WA DIPASALALA DIA MÂYI DIAKANYANGAKAJA BINTU MU BRÉZIL, PASHISHE NUANDAMUNE LUKONKO ELU:

Ntshinyi tshidi tshikukemeshe wewe bikole bua bionso bidi Bantemu benze bua kuambuluisha pavua mâyi mapasalale mu Brésil mu 2020?