Nansha muvua Yehowa kayi muanji kuela mukenji bua ditendelela dia mpingu, Yakoba uvua mumanye ne: anu yeye nkayende ke wa kutendelela. (Eks 20:3-5) Ke bualu kayi pakamuambila Yehowa bua kupingana ku Betele, wakambila pende bonso bavua nende bua bumbushe mpingu yabu. Pashishe Yakoba kuyangataye, yoyi ne tukanu tua ku matshi tuvuabu pamuapa bavuala bu bijimba, kubijiikaye. (Gen 35:1-4) Tshienzedi tshiende atshi tshivua ne bua kuikala tshisankishe Yehowa bikole.

Ntshinyi tshitudi ne bua kuenza bua kuleja ne: anu Yehowa nkayende ke utudi tutendelela? Bualu bunene bua kumpala, nkuepuka tshintu tshionso tshidi mu diumvuangana ne ditendelela dia mpingu ne malu a mîdima. Tudi kabidi ne bua kumbusha tshintu tshionso tshidi tshipetangana ne nyuma mibi, ne kukonkonona bimpe menemene mishindu yetu ya dipitshisha kapepe. Tshilejilu, diebeja ne: ‘Ntu mpitshisha kapepe ne mikanda anyi filme ya malu a bilengulengu peshi a bazombi anyi? Ntu mmona malu a majimbu, a dituangana masama anyi a dielangana milawu anu bu malu a kuseka adi kaayi ne njiwu anyi?’ Tudi ne bua kuepuka tshintu tshionso tshidi Yehowa mukine.​—Mis 97:10.

NUTANGILE FILME WA “KANDAMENAYI DIABOLO,” PASHISHE NUANDAMUNE NKONKO EYI:

• Mbualu kayi buvua bufikile mulongi wa Bible kapanda diende Palesa?

• Bua tshinyi mbimpe kubikila bakulu tuetu babuelakane mu malu a mîdima?

• Tuetu basue bua Yehowa atukube, mmalu kayi atudi ne bua kuepuka?

• Ntshinyi tshiviua Palesa muenze ne muoyo mujima?

• Mmalu kayi audi mua kuenza bua kuepuka malu a bademon muaba unudi?