BUA TSHINYI? Anu bu biamu bia mudimu bikuabu, site ya dipetelangana ne bantu ku Enternete idi mua kutuambuluisha anyi kutuenzela bibi. Bamue bena Kristo batu mene babenga bua kubuelamu. Bakuabu bobu batu babuelamu bua kupetangana ne bena mu mêku abu anyi ne balunda babu. Kadi Diabolo mmusue bua tuenze mudimu bibi ne site eyi, bua tunyange lumu luetu anyi malanda etu ne Yehowa. Anu bu Yezu, mbimpe tukonkonone mêyi manene a mu Dîyi dia Nzambi bua kumanya njiwu idiku ne kuyepuka.—Luk 4:4, 8, 12.

NJIWU YA KUEPUKA:

• Kutamba kubuela mu site eyi. Kupitshisha mêba a bungi mu site ya dipetelangana eyi kudi mua kutupangisha dîba dia kuenza malu a mu nyuma

  Mêyi manene a mu Bible: Ef 5:15, 16; Flp 1:10

• Kutangila bintu bibi. Kutangila bimfuanyi bidi bijula majinga mabi kudi mua kutufikisha ku diditua mu ditangila bindidimbi bia bantu butaka anyi ku dienza malu a masandi. Kubala malu a batontolodi ku Enternete kudi mua kunyanga ditabuja dietu

  Mêyi manene a mu Bible: Mat 5:28; Flp 4:8

• Kuela foto mibi anyi kufunda malu adi kaayi makumbane. Bu mudi muoyo wa muntu utamba kumudinga, lungenyi luende ludi mua kumusaka anu ku diela foto mibi ku Enternete anyi ku difundaku malu mabi. Kadi kuenza nanku kudi mua kunyanga lumu lua muntu anyi kutekesha ditabuja diende

  Mêyi manene a mu Bible: Lom 14:13; Ef 4:29

NUTANGILE FILME WA IKALA NE MEJI PAUDI MU SITE WA DIPETELANGANA NE BANTU KU ENTERNETE, PASHISHE NUKONKONONE MUDI MUNTU MUA KUEPUKA MALU AA: