BUA TSHINYI KUBUELAMU: Mikanda yonso ya mu Bintu bietu bia kulongesha nabi itu anu ituma bantu mu site wa jw.org. Tshipatshila tshinene tshia karte ka jw.org ne tshia trakte wa Udi mua kupetela mandamuna a nkonko minene muaba kayi? ntshia kutuma bantu mu site wetu. Paudi mu site wa jw.org udi mua kutumina muntu mukanda wa mu Bintu bietu bia kulongesha nabi mu mesaje a ku Enternete anyi kumutumina muaba wa kututa bua kubuelaye anyi lien. Kuenza nanku kudi mua kukuambuluisha bikole nangananga paudi uyisha muena muakulu mukuabu. Bualu bukuabu, bantu badi mua kukuela nkonko ikadibu bandamune mu mikanda idi kayiyi mu Bintu bietu bia kulongesha nabi. Tuetu tubuela mu site wetu, tudi mua kupatula bipeta bimpe mu mudimu wetu wa diyisha.

TSHIA KUENZA:

• Buela mu tshitupa tshia “MALONGESHA A MU BIBLE.” Fuanyikija ne: udi uyisha muledi udi ukeba mibelu ya mua kukolesha bana bende. Buela mu MALONGESHA A MU BIBLE > DIAMBULUISHA BUA BENA DIBAKA NE BALEDI.

• Buela mu tshitupa tshia “MIKANDA.” Tuteke ne: udi uyisha mulongi nebe mu kalasa padi mpunga umueneka, ne udi musue kumutumina broshire wa Nkonko 10 idi bansonga badiela ne mandamuna ayi. Buela mu MIKANDA > MIKANDA & BROSHIRE.

• Buela mu tshitupa tshia “MALU ETU.” Fuanyikija ne: udi uyisha muena mudimu nebe udi musue kumanya amue malu atudi tuitabuja. Buela mu MALU ETU > NKONKO ITU BANTU BATAMBA KUELA.

NUTANGILE FILME WA DIBUELA MU SITE WA JW.ORG, PASHISHE NUAMBE MUABA WA KUBUELA MU SITE EU BUA KUAMBULUISHA:

• muntu udi wamba ne: Nzambi kenaku

• muntu udi ufuma ku dipeta lutatu lukole

• muena Kristo netu udi mulekele kuyisha anyi kubuela mu bisangilu

• muntu utudi tupinganyina, udi musue kumanya mutudi tupeta makuta bua kuendesha mudimu wetu

• muntu wa mu ditunga dikuabu udi musue kubuela mu bisangilu bia mu ditunga diabu