TUIKALAYI NE NSOMBELU WA BUENA KRISTO
Baledi wetu, ambuluishayi bana benu bua bapete meji a kudi Nzambi
Umue wa ku mishindu mitambe buimpe idi baledi mua kuambuluisha bana babu bua kupeta meji a kudi Nzambi, ngua kubambuluisha bua bidibu balonga mu bisangilu bikale ne muaba kudibu. Malu adi bansonga bamona, bumvua, ne atubu bamba patubu bandamuna mu bisangilu adi mua kubambuluisha bua kulonga malu a Yehowa ne kulua balunda bende banene. (Dut 31:12, 13) Biwikala muledi, mmunyi muudi mua kuambuluisha muanebe bua ikale ukuata malu a bungi adibu balongesha mu bisangilu?
-
Dienzeja bua kuikala kubuelela bisangilu ku Nzubu wa Bukalenge.—Mis 22:22
-
Keba dîba dia kuikala kuyukila ne bena Kristo nebe ku Nzubu wa Bukalenge kumpala kua bisangilu kutuadija anyi padibi bijika.—Eb 10:25
-
Enza bua muena mu dîku yonso ikale ne mikanda inudi nulonga mu bisangilu, ya mu biamu anyi ya pa mabeji
-
Ambuluisha muanebe bua alongolole tshia kuamba mu bisangilu mu ende mêyi.—Mat 21:15, 16
-
Ikala wakula bimpe bua bisangilu ne bua bionso binudi nulongamu
-
Ambuluisha bana bebe bua badifile pabu mu midimu bu mudi kusukula Nzubu wa Bukalenge ne kuyukila ne bena mu tshisumbu bakadi bakulakaje
Bitu bilomba kudienzeja bikole bua kuambuluisha bana bebe bua kusemenabu pabuipi ne Yehowa, ne imue misangu bidi mua kumueneka bu ne: bidi bitshiokesha. Kadi udi mua kulomba Yehowa akuambuluishe.—Yes 40:29.
NUTANGILE FILME WA NUENU BALEDI, EYEMENAYI YEHOWA NE BUKOLE BUENDE, PASHISHE NUANDAMUNE NKONKO EYI:
-
Mmunyi muvua ditshioka ditatshisha Zack ne Leah?
-
Bua tshinyi baledi badi ne bua kulomba Yehowa bukole?
-
Mmushindu kayi uvua Zack ne Leah beyemene Yehowa bua abambuluishe?
