1, 2. (a) Ntshinyi tshidi mua kuenzeka padi muntu kayi ulama mikoko yende? (b) Ku kale, mulami wa mikoko uvua ne mudimu kayi?

 HIROYASU wa mu ditunga dia Japon uvua muana mutekete pavua mamuende musumbe tshimpanga tshia mukoko ne lukungulu. Wakayilama ne kuvulayi bualu mukoko mukaji uvua ulela bana babidi ku tshidimu tshionso. Pakakumbajaye bidimu 12, ikavua mitue ku 12 anyi 13. Udi uvuluka ne: “Mu dinda dikuabu pantshivua mulale, ngakayumvua idila. Tshiakajuka diakamue bua kuya kuyitangila to. Kadi pangakalua kuya, ngakamona tshisumbu tshia mbua ya muitu inyema, yoyi mimane kupanda mikoko yanyi mafu. Meme kukeba mamuayi ne buôwa. Ngakamusangana weyela kadi mulale mu mashi. Anu tshimpanga nkayatshi ke tshivua tshishale ne muoyo. Ngakanyingalala bikole. Mvua mua kuikala muye kuyitangila diakamue pamvua muyumvue idila. Kayivua ne mushindu wa kudisungila kumpala kua mbua ayi to.”

² Kale mu Isalele, bantu ba bungi bavua bamanye mudimu wa mulami wa mikoko. Uvua ne bua kuyilombola miaba ivua mashinda mimpe ne kuenza muende muonso bua idie bimpe. Uvua kabidi uyisungila kudi nyama ya lonji ne ukeba ivua mijimine. (1 Sam. 17:34-36) Uvua ne bua kuyikebela muaba uvuayi mua kuikisha mu ditalala. Uvua kabidi wambuluisha ivua ilela ne utangila bana bayi. Bafundi ba bungi ba Bible bu mudi Yelemiya bakangata tshilejilu tshia mulami wa mikoko bua kuleja mudimu uvua nawu muntu uvua ne bujitu bua kulama bantu nansha kubakokesha anyi kubalombola mu malu a ntendelelu.

3. Yelemiya uvua wakula bua tshinyi pakakulaye bua “balami” ne “balami badi badisha bantu”?

 ³ Bantu bakuabu mu tshisumbu badi mua kuela meji ne: bakulu mbalami ba mikoko anu padibu baya kutangila bena Kristo nabu bua kubambuluisha ne kubakankamija. Kadi bilondeshile muvua Yelemiya muenze mudimu ne muaku “balami” ne “balami badi badisha bantu,” tudi tumona ne: biambilu ebi bivua bitangila malanda onso avua pankatshi pa bena Yuda ne balombodi babu. Misangu ya bungi Nzambi uvua wamba muvua banene ba mu Yuda, baprofete ne bakuidi bikale balami babi bualu kabavua bakeba diakalenga dia bantu to. (Yel. 2:8) Bavua bakengesha “mikoko,” bayipambuisha, bayilengulula ne badikebela anu masanka abu. Tshisamba tshia Nzambi katshivua kabidi ne bulombodi buimpe mu malu a ntendelelu to. Yehowa wakamba ne: ‘mulawu’ neukuate balami ba dishima abu ne wakajadikila batendeledi bende ne: uvua ne bua kubapesha balami bimpe bavua ne bua kubalama.​—Bala Yelemiya 3:15; 23:1-4.

4. Mbanganyi badi batangila tshisumbu tshia Nzambi lelu? Badi ne lungenyi kayi?

⁴ Mulayi wa Nzambi eu wakakumbanyina nangananga Yezu Mulami munene wa mikoko ya Yehowa wakalua Mfumu wa tshisumbu tshia bena Kristo. Yezu wakamba muvuaye “mulami muimpe wa mikoko” udi munange bantu badiye ulombola. (Yone 10:11-15) Lelu, Yehowa mmuteke balami badi ku bukokeshi bua Yezu bua kutangila mikoko yende idi pa buloba. Munkatshi mua bakulu abu mudi bana betu bela manyi badi mu kasumbu ka mupika wa lulamatu ne wa budimu ne bakulu ba mu “tshisumbu tshinene tshia bantu” badi benza mudimu ne muoyo mujima. (Buak. 7:9) Balami aba badi badienzeja bua kuikala ne lungenyi lua kudifila lua buena lua Yezu. Mbasue kudisha tshisumbu ne mbatshinange anu bu Kristo. Mulawu udi ukuata mulami yonso udi ulengulula bena Kristo nende anyi ubakokesha bibi ne diambu. (Mat. 20:25-27; 1 Pet. 5:2, 3) Ntshinyi tshidi Yehowa ulomba balami bena Kristo lelu? Mikanda ya Yelemiya idi itulongesha tshinyi bua ngikadilu mimpe idi bakulu  ne bua kuikala nayi padibu benza mudimu wabu wa kulama mikoko? Tukonkonone tshidibu ne bua kuenza padibu bambuluisha mikoko, bayilama, balongesha mu tshisumbu ne pambelu patshi ne padibu balumbuluisha.

5-7. (a) Yehowa mmusue bua balame mikoko yende mushindu kayi? Bua tshinyi? (b) Mmushindu kayi udi bakulu mua kuleja mudibu banange bena Kristo nabu too ne badi bapambuke?

⁵ Mupostolo Petelo wakamba mudi Yehowa muikale ‘Mulami ne Mutangidi wa mioyo yetu.’ (1 Pet. 2:25) Mmushindu kayi utu Nzambi umona “mikoko” yende? Tudi tupeta diandamuna patudi tutangila malu avua menzeke mu matuku a Yelemiya. Yehowa mumane kupisha balami babi bavua batangalaja mikoko ne bayilengulula, wakamba muvuaye ne bua ‘kusangisha’ mikoko yende bua kuyipingaja mu mpangu yayi. Wakalaya bua kuyitekela balami ‘bavua ne bua kuyidisha bimpe’ ne kuyisungila kudi baluishi ba tshikisu. (Yel. 23:3, 4) Mbimueneke ne: mikoko ya Yehowa ivua ne mushinga kudiye. Ke mudibi kabidi bua mikoko yende lelu. Mmufile tshintu tshia mushinga mukole bua kupetayi muoyo wa tshiendelele.​—1 Pet. 1:18, 19.

 ⁶ Anu bu balami ba mikoko yetu ya bushuwa eyi, batangidi bena Kristo kabena ne bua kuenza mudimu wabu wa kulama tshisumbu ne lulengu to. Wewe muikale mukulu, utuku udienzeja bua kumona tshimanyinu tshionso tshidi mua kuleja lutatu ludi nalu bena Kristo nebe, ne utuku ubambuluisha ne lukasa luonso anyi? Mukalenge wa meji Solomo wakafunda ne: ‘Umanye bimpe mudi mushindu wa bisumbu bia mikoko yebe, ela meji muudi mua kulama bisumbu bia bimuna biebe.’ (Nsu. 27:23) Mvese eu udi uleja mudi balami ba mikoko yetu ya bushuwa eyi benza mudimu wabu ne tshisumi, kadi udi kabidi uleja mudi bakulu ne bua kulama tshisumbu. Wewe muikale mukulu, udiku uluisha ne muoyo mujima lungenyi lua kukokesha bakuabu anyi kubadiata anyi? Bu muvua Petelo muambile bakulu bua ‘kabikadi bu bakokeshi ba badi kunyima kuabu,’ bidi bileja ne: bakulu badi mua kufika ku dikokesha bena Kristo nabu. Ntshinyi tshiudi mua kuenza bua kukumbaja tshidibu bambe mu Yelemiya 33:12? (Bala.) Kudi bantu badi mua kuikala ne dijinga dia pa buadi dia kubatabalela ne kubambuluisha bu mudi baledi badi badikoleshila bana nkayabu, bantu badi bafuishe babayabu anyi bakaji babu, balume ne bakaji badi babuele tshiakabidi mu mabaka, bakulakaje ne bansonga.

⁷ Anu bu mutu mulami wa mikoko yetu ya bushuwa eyi wenza, mulami wa tshisumbu udi imue misangu mua kukeba bantu badi bapambuke mu tshisumbu bua bualu kampanda anyi kansanga ne kubambuluisha. Bua kuenzaye nunku, udi ne bua kudipuekesha ne kudipangisha amue malu. Udi upitshisha dîba dia bungi bua kulama ne lutulu luonso bantu badibu bamupeshe bua kulama. Mbimpe bakulu ba mu tshisumbu badiebeje ne muoyo mujima ne: ‘Mmu mushindu kayi untu ndienzeja bua kukankamija bena Kristo nanyi ne kubakolesha pamutu pa kubapisha ne kubamba mêyi mabi? Ndiku nkeba diakalenga diabu ne muoyo mujima anyi?’ Imue misangu bakulu badi ne bua kuambuluisha muntu njila ne njila bua kumonaye malu mutu Nzambi uamona. Bikala muanetu  wa balume anyi wa bakaji welakana bua kuitaba mibelu ya mu Bible (ki ngenyi ya bakulu to), bakulu badi ne bua kuvuluka tshilejilu tshia Yehowa Mulami Mutambe bunene ne Mutangidi. Wakatungunuka ne ‘kuambila’ batendeledi bende bavua bajimine malu ne lutulu luonso ne kudienzeja bua kubambuluisha. (Yel. 25:3-6) Batendeledi ba Nzambi ba bungi ba lelu kabatu batamba kuenza malu mabi to, kadi padibi bikengela kubabela, bakulu badi ne bua kubabela anu bu muvua Yehowa wenza.

8. Mmushindu kayi udi bakulu mua kuidikija Yelemiya?

⁸ Yelemiya uvua usambila bua bena Yuda bualu wakamona ne: kutshivua mushindu wa kupinganabu kudi Yehowa. Wakambila Nzambi ne: ‘Uvuluke mungakimana kumpala kuebe bua kubakuila kuudi, ne bua kukudimuna tshiji tshiebe bua katshifiki kudibu.’ (Yel. 18:20) Mêyi a Yelemiya aa adi aleja muvuaye ukeba malu mimpe avua bana babu benza, kayi ubelela meji mabi to. Lelu, batangidi bena Kristo badi ne bua kuidikija Yelemiya too ne padibu bamona ne: muntu ki mmusue kunyingalala to, kadi mmudisuike bua kuenza malu mabi. Bualu buimpe budibu mua kuenza nkuela badi benza malu mimpe kalumbandi, kubalombela Nzambi ne kusambila nabu.​—Mat. 25:21.

9, 10. Bua tshinyi kuikala mulami muimpe (anyi mukulu mu tshisumbu) kudi kumvuija kuikala mulongeshi?

⁹ Mu diumvuangana ne mêyi adi mu Yelemiya 3:15, balami bena Kristo badi ne bua ‘kudisha bakuabu ne lungenyi ne meji mimpe,’ tuambe ne: kubalongesha. (1 Tim. 3:2; 5:17) Yehowa wakambila bena mu tshisamba tshiende ne: ke tshivua balami bimpe ne bua kuenza. Wakakankamija  bena Yuda bua kuitaba malongesha a kudi muprofete wende Yelemiya avua ne bua kubalulamija. (Bala Yelemiya 6:8.) Bua mikoko kuikalayi ne mubidi muimpe, idi ne bua kudia bimpe. Bia muomumue, bua tuetu kutendelela Nzambi bimpe, tudi ne bua kupeta malongesha ne buludiki bua mu Bible.

¹⁰ Bakulu badi ne midimu ibidi pa bidi bitangila kulongesha bualu badi ne bua kuambuluisha bantu bakadi mu tshisumbu ne badi kabayi banji kulua bena Kristo balelela. Pa bidi bitangila bantu badi kabayi banji kulua bena Kristo, vuluka ne: tshisumbu tshia bena Kristo tshidiku nangananga bua kuyisha lumu luimpe lua Bukalenge bua Nzambi. Nunku, bakulu badi ne bua kuikala bamanyishi ba Bukalenge ba tshisumi. (Yel. 1:7-10) Dîba adi, badi bakumbaja mudimu wabu kumpala kua Nzambi ne bapesha bena Kristo nabu tshilejilu tshimpe. Wewe muikale mukulu, kuenaku umona ne: paudi uyisha ne bana betu ba balume ne ba bakaji bashilangane pa tshibidilu, udi upeta mushindu wa kubambuluisha bua balengeje ndongeshilu wabu ne ulengeja webe muine anyi? Paudi wa kumpala mu diyisha ne tshisumi, udi ukankamija tshisumbu tshionso bua kuyatshi kumpala.

11, 12. Mukulu udi musue kuikala mulami muimpe udi ne bua kutabalela tshinyi?

¹¹ Bua malu adi bakulu balongesha mu tshisumbu kuambuluishawu bantu, adi ne bua kufumina mu Bible. Ke bualu kayi bua balami kuikalabu balongeshi bimpe, badi ne bua kuikala balongi ba tshisumi ba Dîyi dia Nzambi. Fuanyikija bualu ebu ne tshivua Yelemiya muambe tshivua tshivuije balombodi ba tshisamba tshiabu balombodi babi. Wakamba ne: ‘Balami bonso bakuandamuka bapote, kabakulomba lungenyi kudi Yehowa; nunku kabakupeta diakalengele, ne bisumbu bionso bia bimuna biabu biakutangalaka.’ (Yel. 10:21) Balombodi bavua ne bua kulongesha bantu kabavua balonda mikenji ya mu Dîyi dia  Nzambi ne kabavua bamukeba to. Nunku kabavua benza malu ne meji to. Ke bualu kayi Yelemiya wakatamba kupisha bantu bavua badiamba muvuabu baprofete.​—Bala Yelemiya 14:14, 15.

¹² Batangidi bena Kristo mbashilangane ne balami ba dishima abu bualu bobu badi balonga Bible ne bidikija Yezu. Ke bualu kayi badi balama tshisumbu bimpe. Bidi mua kubakolela bua kuikala kudilongela pa tshibidilu bualu badi ne midimu ya bungi ya kuenza. Biwikala udi mukulu, ikala mutuishibue ne: bua dilongesha diebe kuikaladi dilelela ne kuambuluishadi bantu, ne bua kulejadi dimanya ne meji, didi ne bua kuimanyina mu Dîyi dia Nzambi ne pa malu adi afumina kudi kasumbu ka mupika wa lulamatu ne wa budimu. Wewe mumone ne: kutshiena udilongela bu kumpala, ntshinyi tshiudi ne bua kuenza bua utungunuke ne kuikala mushilangane ne balami ba dishima ba mu matuku a Yelemiya?

13. Ntshinyi tshivua tshiambuluishe Yelemiya bua kuikala mulongeshi muimpe? Ntshinyi tshidi balami bena Kristo mua kulongela kudiye?

¹³ Yelemiya uvua kabidi mulongeshi muimpe bualu uvua utamba kulongesha ne bilejilu. Bushuwa, Yehowa ke uvua umuambila tshia kuenza. Tshilejilu, bantu kabavua mua kupua muoyo muvuaye mukume luesu lua dima panshi ne muleje ne: ke muvua Yelushalema ne benamu ne bua kubutuka. (Yel. 19:1, 10, 11) Musangu mukuabu Yelemiya wakenza tshikokedi tshia mabaya ne kutshiteka pa makaya ende bua kuleja muvua bena Yuda ne bua kukenga bikole ku bukokeshi bua bena Babulona. (Yel., nshap. 27-28) Nzambi ki mmuambile bakulu ba mu tshisumbu tshienu bua kuenza malu bu Yelemiya bua kunulongesha to. Kadi kutuku usanka padibu bafila bilejilu bimpe ne balonda malu akadi menzeke padibu balongesha anyi? Bimfuanyi ne bilejilu bisungula bimpe bidi mua kukulenga bikole ne kukusaka bua kutumikila Nzambi.

14. (a) Pavua Yelemiya muakule bua “buanga mu Gilada” uvua wakula bua tshinyi? (b) Mmushindu kayi udi bakulu bena Kristo bambuluisha bena Kristo nabu?

 ¹⁴ Tudi ne dianyisha dia bungi bua mushindu utu balami bena Kristo batulongesha. Yelemiya wakamona ne: bivua bikengela kuondopa bantu ba mu tshikondo tshiende mu malu a ntendelelu. Wakebeja ne: ‘Kakuena buanga mu Gilada anyi? Kakuenaku ngangabuka anyi?’ (Yel. 8:22) Mu Isalele muvua mutshi uvuabu babikila ne: baume uvua mu Gilada ku Est kua Yadene. Bavua bangata manyi a mutshi eu bua kuondopa nawu, nangananga bua kutalaja mputa ne kuyondopa. Kadi bantu bavua basama mu malu a ntendelelu. Bua tshinyi? Yelemiya wakamba ne: ‘Baprofete badi bamba mêyi mu mêna a nzambi ya tshianana, bakuidi badi balombodibua ku bianza bia baprofete; bantu banyi badi bananga malu au ne: Ikale nunku.’ (Yel. 5:31) Netuambe tshinyi bua lelu? Kuenaku umona ne: kudi “buanga mu Gilada” tuambe ne: mu tshisumbu tshienu anyi? Tudi mua kufuanyikija buanga budi butalaja abu ne disanka ditudi tumvua padi balami bena Kristo batulombola ne dinanga dionso ku diambuluisha dia mikenji ya Nzambi, batukankamija, batulombela Nzambi ne basambila netu.​—Yak. 5:14, 15.

15, 16. Bua tshinyi mikoko yetu ya bushuwa eyi ne ya mu tshisumbu tshia bena Kristo idi ikengela kuyitabalela?

¹⁵ Ela meji mudi mulami wa mikoko yetu ya bushuwa eyi usanka bua mudimu mukole udiye muenze padiye uyimona ilela. Kadi mmumanye ne: bua bana ba mikoko abu kuikalabu ne mubidi muimpe, udi ne bua kubatabalela. Udi ne bua kuenza muende muonso bua bikale badia bimpe. Bana ba mikoko batu baledibua ne mikila mile idi mua kukoka bintu bia manyanu. Mulami yeye musue bua bikale ne mankenda ne mubidi muimpe, udi ne bua kuipidija mikila yabu kadi ne budimu buonso bua kubenga kuyisamisha. Bia muomumue, balami bena Kristo badi batabalela mikoko yabu, tuambe ne: bena mu tshisumbu tshiabu. (Yone 21:16, 17) Bakulu badi bumvua disanka dia bungi padibu bamona bantu badi banyisha bulelela bashintulula malu bua kulua bena Kristo balelela. Mbasue bua bena mu tshisumbu bonso, bakulumpe ne bana bikale ne ditabuja dikole, balongeshibue bimpe. Ke bualu kayi badi batungunuka ne kubatabalela ne kubambuluisha padibi bikengela. Kakuyi mpata mudimu eu udi ubalomba kabidi bua kuvuluija bena Kristo nabu tshidi ‘Yehowa wamba’ tuambe ne: tshidi Bible ulongesha.​—Yel. 2:2, 5; 7:5-7; 10:2; Tito 1:9.

¹⁶ Yelemiya uvua dijinga ne muoyo mukole bua kumanyisha bantu malu a kudi Nzambi. Ke mudibi kabidi bua bakulu, nangananga padibu ne bua kuela malu mabi patoke bua kulama bena Kristo nabu. Tshilejilu, bidi mua kuenzeka ne: mukulu udi umona mudibi bikengela kuambuluisha “mukoko” utshidi ufuma ku diledibua anyi wa kale bua kubenga kubuelakana mu malu a manyanu a mu bulongolodi bua Satana. Pamuapa muntu udi mu njiwu kena nansha ukeba mibelu to. Kadi mukulu udi wenza mudimu wende ne muoyo mujima udiku mua kushala muvunge maboko ulekela muena Kristo au udikebela ntatu anyi? Nansha kakese. Kena mua kulengulula tshilumbu atshi, wamba mudi malu onso enda  bimpe pabi bimueneke ne: kabiena nanku, ne bualu abu bufuanyike kufikisha muena Kristo bua kunyanga malanda ende ne Yehowa.​—Yel. 8:11.

17. Ndîba kayi didi mulami mua kutabalela mukoko kampanda? Mmushindu kayi udiye mua kuenza nunku?

¹⁷ Mukoko udi kauyi ne budimu wowu upambuka mu tshisumbu, mulami muimpe udi ne bua kuwambuluisha diakamue bua kupinganamu. (Bala Yelemiya 50:6, 7.) Bia muomumue, kudi misangu idi mukulu mua kuakula ne bantu badi bafuanyike kupambuka ne dinanga dionso kadi kayi ubengeleka to. Tshilejilu, udi mua kumona ne: bana betu babidi badi babangilangane badi basomba nkayabu bikole miaba idi mua kubafikisha ku dikuluka mu majinga mabi. Mukulu muimpe udi mua kubambuluisha bua kuepuka nsombelu idi mua kubafikisha ku dienza bubi. Udi mua kubaleja nsombelu idi mua kubafikisha ku dienza malu adi Yehowa mukine kadi kayi ubabanda to. Anu muvua Yelemiya muenze, bakulu ba lulamatu badi bapisha malu adi Yehowa upisha. Padibu benza nunku, badi bidikija Yehowa udi kayi muena malu makole, kadi uvua usengelela bena Yuda mukana mua muprofete wende wamba ne: ‘Kanuenji bualu ebu budi bumfuisha bundu, bundi nkina.’ (Yel. 5:7; 25:4, 5; 35:15; 44:4) Utuku wanyisha mutu balami ba dinanga batabalela bena mu tshisumbu anyi?

18. Mmalu mimpe kayi adi enzeka padi bakulu bena Kristo badienzeja bua kuambuluisha tshisumbu?

¹⁸ Ki mbantu bonso bavua Yelemiya mubele bavua bamuteleje to. Kadi kuvua bavua bamuteleje. Tshilejilu, pavua Baluka muenzejanganyi nende wa mudimu ne mufundi wende ukengela mibelu, Yelemiya wakamubela. (Yel. 45:5) Ntshinyi tshiakenzeka? Baluka wakapeta dianyisha dia Nzambi ne kupanduka ku kabutu ka Yelushalema. Bia muomumue lelu, malu mimpe adi enzeka padi bakulu bambuluisha bena Kristo nabu adi abasaka bua ‘kulamata ku disengelela ne ku diyisha’ bidi bisungila mioyo ya bantu.​—1 Tim. 4:13, 16.

19, 20. Mbujitu kayi budi nabu bakulu pa bidi bitangila benji ba malu mabi?

¹⁹ Mudimu mukuabu udi nawu bakulu lelu ngua kulumbuluisha. Kutu misangu itubu batangila bilumbu bia bantu badi baditue mu dienza malu mabi bua kubambuluisha bua kunyingalala. Yehowa wakambila patoke benji ba malu mabi bua balekele njila yabu mibi kadi wakenza nanku ne dinanga dionso. (Yel. 4:14) Padi muntu kayi musue kulekela njila wende mubi, bakulu badi ne bua kuenza tshidi tshikengela bua kulama tshisumbu ku malu mabi. Anu mudi Mukanda wa Nzambi wamba, badi ne bua kumuipata mu tshisumbu. Yehowa mmusue bua bakulu balonde buakane mu malu a mushindu eu. Mukalenge muimpe Yoshiya uvua tshilejilu mu bualu ebu bualu ‘wakalumbulula bilumbu bia bapele ne bakengi.’ Uvua munange buakane anu bu Nzambi. Ke bualu kayi Yehowa wakebeja bua bienzedi bia Yoshiya ne: ‘Bualu ebu kabuena bukuatshisha muntu bua kummanya anyi?’ Bu muvua Yoshiya muenze malu mimpe ne mulonde buakane, ‘wakapeta diakalengele.’ Kuenaku  udiumvua bimpe padi bakulu ba mu tshisumbu tshienu badienzeja bua kuidikija Yoshiya anyi?​—Yel. 22:11, 15, 16.

²⁰ Ikala mujadike ne: Yehowa udi unyoka benji ba malu mabi “ne kulumbulula kuakane.” (Yel. 46:28) Nunku, bilondeshile nsombelu ne ngikadilu idi muena Kristo nabu uleja, bakulu badi mua kumubela, kumusengelela anyi kumubela patoke. Badi kabidi mua kuipata muenji wa bubi udi kayi unyingalala. Dîba adi, bakulu kabakusambila patoke bua muntu udibu bipate mu tshisumbu ne utungunuka ne kuenza malu mabi to, bualu kabiena ne mushinga to. a (Yel. 7:9, 16) Kadi badi bidikija Nzambi padibu baleja muntu udibu bipate tshidiye mua kuenza bua Nzambi kumuanyishaye kabidi. (Bala Yelemiya 33:6-8.) Nansha mudi kuipata muntu kuenza bibi, tumanye ne: mikenji ya Nzambi mmiakane ne idi bua diakalenga dia bantu bonso.​—Muad. 1:18.

21. Tshisumbu tshia Nzambi tshidi ne bua kuikala bishi? Ntshinyi tshiudi mua kuenza pebe bua tshikale nanku?

²¹ Balami bena Kristo bobu bamanye mikenji ya Nzambi ne bayitumikila, nebadishe bena mu tshisumbu bimpe ne nebabalame bua bikale mu malanda mimpe ne Nzambi. (Mus. 23:1-6) Malu adi Yelemiya muambe bua ngikadilu idi bakulu bena Kristo ne bua kuikala nayi ne idibu ne bua kuepuka, adi mua kubambuluisha padibu bakumbaja mudimu munene udi Nzambi mubapeshe wa kulama mikoko yende. Nunku, yonso wa kutudi udi mua kudiebeja ne: ‘Nentungunuke ne kukuatshisha balami badi ‘badisha’ tshisumbu “ne lungenyi ne meji mimpe” bua kuleja mundi nganyisha malu adi Yehowa mulongolole bua kulongesha batendeledi bende, kubalombola ne kubalama anyi?’​—Yel. 3:15; 23:4.